Abdullahi Dikko Inde: Wo ẹ̀sùn ìwà àjẹbánu tí wọn fi kan ọ̀gá àgbà ilé-iṣẹ́ aṣọ́bodè tó kú

Ọ̀gá àgbà ilé-iṣẹ́ aṣọ́bodè(Customs) tẹ́lẹ̀ tó kú tí wọ́n fẹ̀sùn kíkó ẹgbẹ̀lẹ́gbẹ̀ bílíọ̀nù jẹ kan

Ọpọ eeyan lo n ṣe idaro ọga agba ileeṣẹ aṣọbode orilẹ ede Naijiria tẹlẹ, Abdullahi Dikko Inde to jade laye.

Koda Igbakeji Aarẹ Naijiria nigba kan ri, Atiku Abubakar darapọ mawọn to n ṣedaro Inde to ku l'Ọjọbọ, ọjọ kejidinlogun oṣu keji ọdun 2021 yii.

Dikko Inde jade laye lẹni ọdun mọkanlelọgọta gẹgẹ bi ileeṣẹ aṣọbobe Naijiria ti ṣalaye.

Iroyin kan tiẹ sọ pe Inde papoda nile iwosan kan niluu Abuja nibi to ti n gba itọju lẹyin ti o ṣaarẹ.

Ẹwẹ, ọga agba ileeṣẹ aṣọbode Naijiria n jẹjọ lọwọ lori ẹsun iwa ajẹbanu ṣáájú iku rẹ.

Lara ẹsun ti wọn fi kan an ni pe o ko ẹgbẹlẹgbẹ biliọnu owo naira to jẹ owo ijọba jẹ nigba to wa lori aleefa gẹgẹ bi ọga agba ileeṣẹ aṣọbode Naijiria.

Ajọ ICPC to n gbogun ti iwa ibajẹ lawujọ lo kọkọ gbe Inde lọ si ileẹjọ lori iwa ajẹbanu.

Lẹyin naa ni ajọ EFCC gba ọkọ bọginni mẹtadinlogun lọwọ Dikko nibi to ko wọn sì nile rẹ ni Kaduna lọdun 2017.

Ṣugbọn lọdun 2019, adajọ Nnamdi Dimgba ileẹjọ giga niluu Abuja pàṣẹ pe ki ajọ EFCC da ẹjọ ti o pe Inde duro lẹyin ti minisita eto idajọ, Abubakar Malami ati Inde buwọlu iwe adehun lati pari ẹjọ ọhún.

Iroyin kan sọ pe Dikko da biliọnu kan ati abọ pada fun ijọba lara owo to ko jẹ ni wọn pè e.

Amọ, loṣu keji, ọdun 2020, ileẹjọ giga ijọba apapọ kan l'Abuja tun paṣẹ pe ki wọn lọ gbe Inde pada nitori ko wá sí ile ẹjọ mọ.

Ṣugbọn agbẹjọro rẹ, Solomon Akuma fi iwe ẹri ile iwosan hàn pe Inde n ṣe aisan ni ko jẹ ko lanfaani lati wa sile ẹjọ.

Agbẹjọro Inde tun sọ pe o wa nile iwosan niluu London nibi to ti n gba itọju.