Ғазо бўлгасида қурбонлар ортиб бормоқда

Фаластин расмийлари айтишича, ўтган кеча Ғазога ҳаво ҳужумларининг энг ҳалокатлиси бўлган, камида 20 киши Исроил ракета нишонларига учраб ҳалок бўлган. Уларнинг деярли ҳаммаси тинч фуқаролардир.

Соғлиқни сақлаш вазирлиги маълумотларига биноан, қурбонларнинг аксари жанубдаги Хон Юнус кафеси ва ўз уйларида бўлганлар, ўлганларнинг сони 76 тага етган, қарийб 500 киши турли даражада яраланган.

Ғазодаги жангарилар пайшанба куни ҳам Исроилни ракета ҳужумларига тутганлар.

Исроил ҳарбийларига биноан, шу пайтгача 108 мўлжални нишонга олганлар, ярим тундан кейин Ғазодан учирилган 12 ракетанинг еттитаси "ушлаб" қолинган.

Исроил ўзининг мақсади Хамасга тегишли манзиллар эканини иддао қилмоқда, бироқ тинч фуқаролар орасида қурбонлар кўп.

Фаластин Соғлиқни сақлаш вазирлигига кўра, беш бола дохил 17 киши ўз уйларида ва Хан Юнус кафесида ракета ҳужумидан ҳалок этилган. Хон Юнусдаги кафеда одамлар футбол бўйича ярим финал ўйинини томоша қилишга йиғилганлар, маълумотларга кўра, у ерда тўққиз киши ўлган. Исроил кафега снаряд тушганини тасдиқлади ва буни "кутилмаган фожеа" деб атади.

Фаластин мухбирларига кўра, Ғазо ғарбида Исроилнинг ҳужуми натижасида автомобилда кетаётган тўрт киши ҳалок бўлган, Рейтер агентлиги билдиришича, улар Исломий Жиҳод жангарилари бўлганлар.

Исроил жангарилар сешанбадан буён учирган 365 та ракетага қарши зудликда 780 та жавоб амали берганини таъкидлаган.

Пайшанба куни ҳужумлар сиреналар билан бутун мамлакат бўйлаб давом этгани кузатилган.

Ҳамас учирган икки ракетадан бири ракетага қарши ускуна ёрдамида ушланган, биноларга зарар етган, қурбонлар ҳақида маълумотлар йўқ.

Исроил ҳарбийси Хон Юнусдаги уйда саккиз киши ўлганини "ўзлари режалаштирмаганларини", одамлар уйларига махсус огоҳлантиришдан кейин жуда тез қайтганларини айтган.

Хабарларда айтилишича, Хон Юнусдаги уйда Ҳамас раҳбарларидан Одеҳ Кавайи бўлган деб кўрилган.

Исроил раҳбарларига қараганда, Ғазога қуруқликдаги ҳужумлар бошланишига кам фурсат қолган.

Айни пайтда Миср ҳукумати чегарадаги Рафаҳда Исроил ҳужумларидан яраланган фаластинликларни эвакуация қилиш учун йўлак очишга қарор берган.

Шимолий Синайдаги касалхоналар ярадорларга тиббий ёрдам кўрсатишга шай қилинган.

Минтақадаги аҳвол ҳар қандай вазиятда назоратдан чиқадиган ҳолатга келиб қолганидан хавотир билдирган БМТ Бош котиби Пан Ги Мун Ҳамасни ракета ҳужумларини тўхтатишга, Исроил ҳукуматини босиқликка ва тинч фуқароларни ҳимоя қилиш бўйича халқаро мажбуриятларга бўйсунишга чақирган. Жаноб Мун вазият ўта жиддийлигидан, Ғазо янги уруш бўсағасида қолганидан огоҳлантирган.

БМТ Хавфсизлик кенгаши пайшанба куни шошилинч мажлисга йиғилиши кутилмоқда.

Олдинроқ Исроил Бош вазири Бенямин Нетаняху Ҳамасга қарши ҳужумларни оширишни айтди ҳамда жангарилар ракета ҳужумлари учун қиммат тўлашларини ваъда қилди.

Фаластин қонунчилик кенгаши вакили Мустафо Барғутий Нетаняхуни Ғазода қирғин келтириб чиқариши эҳтимоли бўлган қуруқликдаги ҳужумларни режалаштираётганликда айблаган.

Унинг Би-би-сига айтишича, Ҳамас икки томонлама оташкесимга тайёр бўлган, бироқ Исроил келишувни рад қилган. "Жаноб Нетаняху кўринишидан, бу қўрқинчли урушни давом эттиришни хоҳламоқда", -дейди Барғутий.

Исроил Президенти Шимон Перес ҳам қуруқликдаги ҳаракатлар тез орада бошланиши эҳтимолини рад этмаган CNNга берган интервьюсида. Исроил армияси заҳирадаги 40 минг аскарни чақириб олгани хабар қилинмоқда.