Меркел: "Йирик саккизлик энди йўқ"

Олмония канцлери Ангела Меркел вужудга келган ҳозирги шароитда "йирик саккизлик" мавжуд бўла олмайди, деб айтган.

Меркелнинг сўзларига кўра, Оврўпо Иттифоқи ва "катта еттилик" яқин кунларда Қрим аннекциясидан сўнг Россияга муносабатлардаги аниқ ўзгаришларни эълон қилади.

"Шуниси аниқки, G8 каби муҳим гуруҳ учун сиёсий шароитлар йўқ экан, "йирик саккизлик"нинг ўзи ҳам мавжуд эмас. Саммит ҳам, бундай кўриниш ҳам энди бўлмайди", деган Маркел хоним Бундестагдаги чиқишида.

Олмония канцлери шунингдек, Овроиттифоқ Россияга нисбатан Қрим инқирози билан боғлиқ янги жазо чоралар киритиш, рўйхатдаги кишилар сафини кенгайтиришни кўриб чиқишини билдирган.

19 март куни Британия Россияга йирик саккизлик гуруҳидан чиқиш таҳдид қилаётганидан огоҳлантирганди.

Овроиттифоқ бундан олдин Россия ва Украинанинг Қрим воқеасига алоқадор 21 мулозимига виза тақиқи киритиш ва банк ҳисобларини музлатишга қарор қилган эди.

Пайшанба куни Оврўпо Иттифоқи аъзолари Брюсселда Россияга навбатдаги санкцияларни муҳокама этишмоқда.

Оврўпо Иттифоқининг кенгайтирилган рўйхатига президент Владимир Путинга яқин сиёсий ва ҳарбий мулозимлар киритилиши мумкин.

ББСнинг Бреюсселдаги мухбири Метю Прайсга кўра, муҳокамалар қизғин ўтиши айтилса ҳам, жуда кескин мурожаатлар кутиш қийин.

Оврўпо Иттифоқи раҳбарлари орасида вазиятда қандай йўл тутиш борасида аниқ позиция йўқ.

Ғарбий Оврўпо давлатлари шарқий Оврўпо вакилларидан фарқли эҳтиёткор йўл тутишни мақул кўришмоқда. Мухбирга кўра, улар маълум сабабларга кўра, Россиянинг кейинги нишони бўлишдан хавотир олишади.

Оврўпо дипломатлари парда ортида Россия билан муносабатларни, жумладан энергетика соҳасида Оврўпони Москвага камроқ қарам бўлиши борасида, ҳамда кейинги алоқаларни қандай тузишни кенгроқ муҳокама қилишади, дейди ББС мухбири.

G7 гуруҳи аъзолари бир неча бор Россияни Қримдаги барча ҳаракатларига чек қўйишга чақирган.

Қудратли еттилик раҳбарлари шунингдек, Қримнинг Россияга қўшилиши ҳақидаги референдум натижаларини тан олмасликларини билдиришган.

"Референдум Украина Конституциясини очиқдан -очиқ бузиш бўлиб, у юридик кучга эга бўла олмайди", дейишган улар.

Дунё ҳамжамияти Москва Қримга нисбатан манфаатларидан воз кечмас экан, киритиладиган янги санкциялар алоҳида сиёсатчиларга эмас, бутун Россия иқтисодига зарар келтириши мумкинлиги ҳақида огоҳлантирган.

Япония, Франция, Олмония, Британия бундан буён Россия билан ҳарбий ҳамкорлик тўхтатилишини маълум қилди.

Францияга кўра, "Санкцияда Ғарбнинг барча давлатлари иштирок этиши керак".

АҚШ нинг янги рўйхати эълон қилинди

Қўшма Штатлар Президенти Барак Обама Россиянинг Қримни қўшиб олишига қарши киритилган жазо чоралари кенгайтирилганини билдирди.

АҚШ Молия вазирлиги эълон қилган рўйхатга биноан, санкция Россия мулозимларига молиявий хизмат кўрсатадиган “Россия” банкига ҳам қўлланилади. Шунингдек, Дума депутатлари Сергей Наришкин, Сергей Железняк, бизнесменлар Геннадий Тимченко, Юрий Ковалчук ва бошқалар бор.

Оқ Уй вакилининг айтишича, Қримдаги вазиятга алоқадор яна 21 амалдорга талуқли бўлади.

Жазо чоралари аввало виза тақиқи, банк ҳисоблари музлатилиши ва Оврўпо Иттифоқи ва АҚШдаги мулкларига тўсиқ қўйишни кўзда тутади.

Барак Обама лозим бўлганда Россия иқтисодининг муҳим соҳаларига қарши санкцияларга йўл очадиган фармонни имзолаганини айтган.

“Путин англаши лозим, Украинага Россия ва Ғарбни танлаш шарти қўйилмаслиги кераклигини, Украина ўз тақдирини ўзи аниқлаши керак”, деган АҚШ президенти.

Ўз ўрнида Москва ҳам АҚШнинг қатор расмийларига Россияга кириш тақиқланганини билдирган.

Улар ичида Жон Маккейн, Мэри Лэндю, Даниэл Коутс, Бенжамин Пфаййер, Гарри Рид каби АҚШ Конгресси аъзолари ва расмий шахслар бор.

Қрим янги раҳбарлари қидирувга берилди

Киев ва Москва ўртасидаги муносабатлар таранглигача қолар экан, Украина ҳукумати Қрим бош вазири Сергей Аксёнов ва парламент раиси Владимир Константиновга қарши қидирув эълон қилган.

Украина Ички Ишлар вазирлигига кўра, бу икки шахс тергов идораларидан яшириниб юришда айбланмоқда.

Вазирлик айтишича, Аксенов и Константинов давлат тўнтариши ва ҳокимиятни эгаллаб олишда гумон қилинади.