Индонезия: Бўғма илон аёлни ютиб юборди Dunyo Yangiliklar

Индонезияда тарқалган маҳаллий оммавий ахборот воситалари хабар тарқатишича, мамлакатнинг Жамби(Jambi) вилоятида яшаган аёлни питон - йирик бўғма илон ўлдирган ва ютиб юборган.

Каучук йиғувчи бўлиб ишлаган Жаҳранинг ёши 50 ларда бўлган.

У 23 октябрь, якшанба куни эрталаб каучук плантациясига ишга кетаётганида питон ҳужумига учраган деб кўрилаяпти.

Алоқадор мавзулар:

Якшанба кечқурун Жаҳра ишдан уйига қайтмаганидан кейин қидириш бошланган.

Эртаси куни қишлоқдошлари қорни шишиб кетган питонни топишган.

Қишлоқ одамлари бўғма илонни ўлдиришган, унинг ичидан аёлнинг жасадини топишган.

"Қурбон илоннинг ошқозонида топилди," деб айтган Бетара Жамби полициясининг раҳбари АКП Эс Харефа.

Полиция бошлиғининг сўзларига кўра, аёлнинг жасади бут-бутун бўлган.

Якшанба тунида Жаҳранинг эри аёлнинг айрим кийимлари ва каучук плантациясида ишлатадиган иш қуролларини топган ва ҳамқишлоқларига хабар берган.

Душанба куни маҳаллий одамлар узунлиги 5 метр бўлган питонни топишган.

Бўғма илонни тутиб ўлдиришган.

"Улар қорнини ёриб кўришганида ичида Жаҳрани топишган", деб айтган жаноб Ҳарефа CNN Индонезия телеканалига.

Бундай ҳодисалар жуда камдан-кам учраса-да, катта бўғма илонни одамни ўлдириб егани ҳодисаси Индонезияда биринчи марта рўй бераётгани йўқ.

Икки инсонни илон ютиб юборгани ҳодисаси мамлакатда 2017 йили 2018 йили ҳам хабар қилинган.

Питонлар ўлжасини бутунича ютиб юборади.

Уларнинг жағлари атрофидаги пайлари жуда қайишқоқ бўлиб, ҳар қанча катталикдаги ўлжани ҳам оғзини очиб ичига киритиб юбора олади.

Бир экспертнинг Би-би-сига айтишича, одатда питонлар каламушлар ёки улардан каттароқ ҳайвонлар билан озиқланади.

Бироқ каламушларга тўймаган пайтларида бу улкан бўғма илонлар янада каттароқ ўлжага ҳам ташланишлари мумкин.

"Шу боис илоннинг катталиги ўлжасини катталиги қанча бўлса, шунча кенгайиши мумкин", дейди Сингапур Ёввойи табиатини асраш ташкилоти мутахассиси Мэри-Рут Лоу.

Баъзан бўғма илонлар чўчқа ва ҳатто қорамоларга ҳам ҳужум қилиб қоладилар.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek