Украина: Россияликлар босиб олган жойларда украинларни нима қилишган? Dunyo, yangiliklar

Украинанинг шимоли-шарқидаги қарши ҳужумда Украина кучлари ҳудуднинг бир қисмини қайтариб олди ва рус қўшинларини қувиб чиқарди.

Россиянинг ойларча давом этган оккупацияси вақтида қийноқлар ва қотилликлар ҳақида хабарлар чиқар экан, янги озод қилинган ҳудудларда енгиллик ва қайғу бир-бири билан қўшилиб кетган.

Харков вилоятининг Балаклия шаҳрида яшовчи Артёмнинг Би би сига айтишича, руслар уни 40 кундан ортиқ ушлаб турган ва электр токи билан қийноққа солган.

Балаклея 8 сентябрда, ярим йилдан ортиқ вақт ўтиб, озод қилинди. Ваҳшийлик эпицентри шаҳар полиция бўлими бўлиб, рус қўшинлари ундан ўзларининг қароргоҳи сифатида фойдаланганлар.

Артёмнинг сўзларига кўра, у бошқа камералардан одамларнинг оғриқ ва даҳшатдан қичқирганини эшитган.

Унинг сўзларига кўра, ишғолчилар бинонинг шовқинли вентиляция тизимини ўчириш орқали ҳайқириқлар бемалол эшитилиб туришини осонлаштирган.

"Улар электр токи уриши пайтида одамларнинг қичқириғини ҳамма эшитиши учун уни ўчириб қўйишди, - деди у бизга. - Улар буни ҳар куни баъзи маҳбусларга қўллашди... Ҳатто аёлларга ҳам."

Улар буни Артемга ҳам қилишган, аммо фақат бир марта.

Алоқадор мавзулар

"Улар мени иккита симни ушлаб туришга мажбур қилишди", деди у.

"У ерда генератор бор эди. У қанчалик тез ишласа, кучланиш шунчалик юқори бўлади. "Уни қўйиб юборсанг, тамомсан", дейишди. Кейин улар савол бера бошладилар. Электр кучланишни орттириб, менга ёлғон гапиряпсан дердилар.»

Артёмнинг айтишича, у руслар унинг ҳарбий кийимдаги укаси суратини топиб олгани учун ҳибсга олган. Артемнинг сўзларига кўра, балаклиялик яна бир киши Украина байроғини кўтариб юргани учун 25 суткага ҳибсга олинган.

Татьяна исмли мактаб директорининг айтишича, у уч кун давомида полиция бўлимида сақланган ва бошқа камералардан ҳам қичқириқларни эшитган.

Биз полиция бўлимига бордик ва тор камералардан бирининг деворида қанча кун ўтганини кўрсатувчи белгилар ва унинг ёнида ибодат сўзларини кўрдик.

Украина полициясининг маълум қилишича, саккиз киши икки кишига мўлжалланган камераларда сақланган. Айтилишича, маҳаллий аҳоли руслар бўлган пайтда, уларнинг қўлига тушиб қолмаслик учун станция ёнидан ўтишга ҳам қўрқишган.

Украина байроғи яна ҳилпираб турган Балаклия марказида кичик озиқ-овқат юк машинаси атрофига оломон тўпланган. Навбатда турганларнинг кўпчилиги кексалар ва ўта ҳолдан тойганга ўхшаар, лекин руслар қувилганидан кейин бир бири билан топишган дўстлар ва яқинлар ҳам бўлди.

Бир оз пиёда юрилса, кимсасиз хиёбон охирида, русларнинг баъзи қурбонларини қўшнилари шошилинч равишда дафн этишади. Такси ҳайдовчи Пётр Шепелнинг вақтинчалик қабри дағал ёғоч хоч билан белгилаб қўйилган. Унинг ёнида унинг йўловчиси ётибди, унинг шахси ҳозирча номаълум.

Полиция уларнинг қолдиқларини қазиб олиб, жасад қопларига солиб қўйганида ҳавони ўлим ҳиди тўлдирди.

Расмийларга кўра, ишғолнинг сўнгги кунида Россия назорат пункти яқинида икки эркак отиб ўлдирилган.

Пётрнинг онаси Валентина жасадлар қазиб олинаётганини кузатиб, ёлғиз ўғлини ўлдиргани учун русларни қарғайди.

"Мен Путиндан сўрамоқчиман, нега у менинг ўғлимни отиб ташлади?" деб хитоб қилади у.

"Нега? Ким ундан бу ерга шундай даҳшатли қурол билан келишни сўради? У нафақат болаларимизни, балки бизни, уларнинг оналарини ҳам ўлдирди.

Бу кунларда мен ўлик аёлман. Мен дунёнинг барча оналарига мурожаат қилмоқчиман: бу қотилга қарши бош кўтаринг."

Балаклеяга кетаётганимизда йўлда қочаётган руслар ташлаб кетган «Z» белгиси туширилган ҳарбий техникани кўрдик.

Энг яқин қишлоқда бизга мактабга катта зарар етказилганини кўрсатишди. Маҳаллий ҳокимият бу руслар қувиб чиқарилишидан олдинги охирги вайронагарчиликлардан бири эканлигини айтди.

Вайроналар устида турган Харков вилояти раҳбари Олег Синегубовнинг айтишича, ҳозир энг муҳим вазифа сув ва электр таъминотини тиклаш, бироқ электр узатиш линиялари миналанган бўлиши мумкин деган хавотир бор.

Би би сининг руслар қайтиши мумкинми, деган саволига у шундай жавоб берди: "Биз урушдамиз, хавф доим бор".

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek