Россия: Бугун Путиннинг собиқ хотини ва унинг ҳозирги эри ҳақида нималар иддао қилинмоқда? Rossiya Dunyo Yangiliklar
Сурат манбаси, TASS
Пайшанба куни Алексей Навальний ҳамкорлари ўз текширувлари натижаларини эълон қилишди. Навальнийнинг ўзи қамоқда. Путин эса, хотини билан 2013 йилда ажрашган. Унинг собиқ хотини ҳақида нималар иддао қилинмоқда?
Қизиқ, Алина Кабаева деб, Путиннинг қаҳри келадими?
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Алоқадор мавзулар:
Людмила Путинa ҳали 2000-йилларда ўзи учун махсус ташкил этилган "Рус тилини ривожлантириш маркази"ни бошқарган. Бу эса, янгилик эмас. Чунки унинг марказга раҳбарлик қилаётгани ҳақида ҳатто "Российская газета" ҳам ёзган. 2009 йилда эса, марказ номи ўзгарган. Унинг ўрнига "Шахслараро алоқаларни ривожлантириш маркази" жамғармаси пайдо бўлган. Эр-хотин Путин эса, 2013 йилнинг июнь ойида расман ажрашишган.
Жамғармага ҳозир Артур Очеретний раҳбарлик қилади. Оммавий ахборот воситаларида эса, у Путин собиқ хотинининг янги турмуш ўртоғи экани айтилган. Хабарларга кўра, икковлон 2015 йилда оила қуришган. Тўйдан сўнг Людмила Путина унинг фамилиясига ҳам ўтган. Бу маълумот эса, ҳатто "Википедия"да ҳам бор.
Москва мэрияси ва президент маъмурияти Кремль яқинидаги Воздвиженка кўчасида жойлашган ва 1774 йилда қурилган қасрни мазкур фонд ихтиёрига ўтказиб беришган. Янги эгалари қасрга яна иккита қават қўшишган. Уларнинг бу иши орада фаолларнинг норозиликларига ҳам сабаб бўлган. Лекин бу ҳам янгилик эмас.
Навальний ҳамкорлари ёзишича, "Шахслараро алоқаларни ривожлантириш маркази" фонди қасрдаги барча биноларни шахсан Людмила Путина-Очеретнаяга тегишли бўлган "Меридиан" тижорат ширкатига ижарага берган. Бу ҳам янгилик эмас. 2017 йилда "Рейтер" ижара пулининг 99% "Интерьерсервис"га тегишли бўлган "Меридиан" тижорат ширкати ҳисобига тушиши ҳақида ёзган. Юридик шахсларнинг ягона давлат реестрида "Интерьерсервис" раҳбари сифатида Людмила Путин Шкребнева кўрсатилган. (Шкребнева - унинг қизлик фамилияси бўлади).
Ўшанда "Рейтер" ахборот агентлиги ижарачиларидан тушадиган пулни йилига 3 миллион АҚШ долларига баҳолаган. Навальнийнинг ҳамкорлари эса, ҳозир бунинг 250 миллион рублни ташкил этиши ҳақида ёзишган. Бу қарийб 4 миллион АҚШ доллари деганидир. Улар ижарачилар сифатида ВТБ, Сбербанк, "Бургер Кинг", дорихона ва коллекторлик идорасини тилга олишган.
Сурат манбаси, Alamy
Навальний ҳамкорларининг таъкидлашларича, улар "Шахслараро алоқаларни ривожлантириш маркази"да Путин собиқ рафиқасининг маошини ҳам билиб олишган: гўёки у 2020 йилнинг октябрига қадар ўзига ойига 1 миллион рубль, худди ўша йилнинг октябридан бошлаб эса, 2 миллион рублдан маош "тўлаган".
Текширувнинг асосий иддаоларидан бири шундаки - Путин собиқ хотини ва унинг эрининг тузилмаси Москва мэрияси, Газпромбанк ва Алексей Мордашовнинг "Северстал"идан маблағ олади. Ҳисобот муаллифлари ўзлари ўрганган банк операцияларига ишора қилиб, "Шахслараро алоқаларни ривожлантириш маркази"нинг учта йирик ҳомийси - айнан шу уч юридик шахс эканлигини даъво қилишган.
"Уч йил ичида марказ Москва мэрисидан 175 миллион рубль олган", - дейишмоқда Навальний ҳамкорлари. Газпромбанкдан - гўёки 140 миллион рубль, Северсталдан - 100 миллион рубль. Мэрия, Газпромбанк ва Северсталь бу даъволарга изоҳ бермади.
Текширувдан маълум бўлишича, Очеретний Франция, Швейцария ва Испания жанубидан квартиралар, уйлар сотиб олади. Ҳисобот муаллифлари хориждаги кўчмас мулкнинг умумий қийматини қарийб 600 миллион рублга баҳолашмоқда.
Муаллифлар, хусусан, Очеретнийларнинг Франциянинг Биарриц шаҳрида вилласи борлиги, уни 5,3 миллион еврога харид қилишганини ҳам даъво қилишган. Бу вилла ҳақида Коррупция ва уюшган жиноятчиликни ўрганиш маркази 2017 йилда ёзган. Марказ таъсисчиси эса, шу йил Россияда номақбул ташкилот сифатида тан олинган.
Коррупция ва уюшган жиноятчиликни ўрганиш маркази мазкур вилланинг нархини қимматроқ - 7 миллион еврога баҳолаган. Марказ текширувларига кўра, Путиннинг қизи экани айтилувчи Катерина Тихонова ҳам аллақачон ўша соҳилдан қўним топган.
Ҳисобот муаллифлари Испаниянинг Малагасида ҳам Путин собиқ рафиқасига тегишли иккита квартирани аниқлаганликлари ҳақида ёзишган.
Муаллифларнинг даъво қилишларича, биринчиси 2011 йилда, у ҳали Путиннинг хотини бўлган пайтда сотиб олинган. Иккинчисини Очеретний гўёки 2014 йилда - Россия президенти рафиқаси билан ажрашганидан сўнг харид қилган.
Навальний ҳамкорларининг таъкидлашларича, Очеретнийлар Европа Иттифоқининг санкциялар рўйхатига киритилмаган.
Британия эса, шу йилнинг май ойида Путин собиқ рафиқасига жазо чоралари қўллаган.
Яна бир арзимас тафсилот - Навальний ҳамкорларининг уқтиришларича, улар LiveJournal да Людмила Путина-Очеретнаянинг аноним блоги борлигини ҳам билиб олишган. У гўё бу блогини Лена (llenaa) деган тўқима ном остида юритган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
