Украина уруши: Путиннинг қизлари АҚШ санкциялари нишонига олинди

АҚШ Россия президенти Владимир Путиннинг яқин доиралари, жумладан, унинг қизларига қарши санкциялар жорий қилди.

Рўйхатда ташқи ишлар вазири Сергей Лавров оиласи ва йирик банклар ҳам бор.

Бу санкциялар Украинада Россия кучларининг ваҳшийликлари, жумладан, Киев яқинидаги Буча кўчалари бўйлаб сочилган тинч аҳоли жасадлари суратлари ошкор этилганидан кейин жорий қилинди.

Россия ҳеч қандай далилсиз суратлар Киев расмийлари томонидан саҳналаштирилганини даъво қилмоқда.

Сунъий йўлдошдан олинган суратлар руслар Бучани назорат қилаётганда тинч аҳоли ҳалок бўлганини кўрсатиб турса ҳам, чоршанба куни Путин воқеани "Киев режимининг қўпол ва масъулиятсиз провокацияси" деб атади.

Чоршанба куни АҚШ президенти Жо Байден Бучадаги қотилликларга тўхталар экан, "Катта ҳарбий жиноятлардан бошқа нарса эмас", деди.

"Бу жиноятчиларни жавобгарликка тортиш учун масъулиятли давлатлар бирлашиши керак", дея қўшимча қилди Байден.

АҚШ Путиннинг қизлари Катерина Владимировна Тихонова ва Мария Владимировна Воронцовага "мулки ва мулкий манфаатлари блокланган Путиннинг вояга етган фарзандлари бўлгани учун" санкция қўлланишини маълум қилди.

Санкция эълонида Тихонова "Россия ҳукумати ва мудофаа саноатини қўллаб-қувватлайдиган техник бўлим бошлиғи" сифатида келтирилган.

Унинг синглиси Воронцова, дейилади ҳисоботда, "давлат томонидан молиялаштириладиган дастурларни бошқаради, улар Кремлдан генетик тадқиқотлар учун миллиардлаб доллар олган ва Путиннинг шахсий назорати остидадир".

АҚШ нега Путиннинг қизларини нишонга олмоқда, деган саволга Байден маъмуриятининг юқори мартабали мулозими АҚШ улар отасининг баъзи активларини назорат қила олади деб ҳисоблашини айтди.

"Путин, унинг кўплаб гумашталари ва олигархлари ўз бойликларини, мол-мулкини оила аъзолари орқали яширин равишда АҚШ молия тизими ва дунёнинг бошқа давлатларига жойлаштирган", деди расмий.

"Биз Путиннинг кўплаб мулклари оила аъзолари номи остида яширинганига ишонамиз ва шунинг учун биз уларни нишонга олдик".

Оқ уй томонидан эълон қилинган АҚШ санкцияларига қуйидагилар киради:

Шу билан бирга, Буюк Британия саккизта олигарх ва Россия банкларига жумладан, мамлакатнинг энг йирик Сбербанки ва Москва Кредит банкига қарши кейинги санкцияларни эълон қилди.

Европа Иттифоқи, шунингдек, ҳарбий жиноятлар содир этилгани ҳақидаги хавотирлар ортиб бораётган бир пайтда Россиядан кўмир импортини тўхтатиш масаласини ҳам муҳокама қилмоқда.

Вашингтонда янги санкциялар эълон қилинишидан олдин Украина президенти Владимир Зеленский "ҳеч қандай қатъиятсизликка тоқат қила олмаслигини" айтди.

Чоршанба куни Ирландия парламентида сўзга чиқиб, у Европада "уруш ва уруш жиноятлари молиявий йўқотишларчалик ёмон эмас" деб ҳисоблайдиганлар борлигини, уларни қаттиқроқ санкцияларни қўллаб-қувватлашга ҳали ҳам ишонтириш зарурлигини айтди.

Унинг қўшимча қилишича, "Россия нефти Россия уруш машинасини тўйдира олмайди" ва Украина ташқи ишлар вазири "Twitter"да Россиянинг урушни молиялаштириш қобилиятига ҳақиқатан ҳам таъсир қилиш учун газ ва нефть эмбаргоси зарурлигини таъкидлади.

Европа Иттифоқининг бош дипломати Жозеп Боррел чоршанба куни алоҳида таъкидлаб айтдики, Европа энергия учун ҳар куни Россия берадиган бир миллиард евро (1,09 миллиард доллар; 833 миллион фунт стерлинг) босқин бошлангандан бери Украинага ҳарбий ёрдам кўринишида берилган миллиард евродан кескин катта.

Европанинг баъзи аъзо давлатлари, жумладан, Германия Россия энергетикасига қаттиқ боғлиқ ва бу секторни тўғридан-тўғри нишонга олишни истамайди.

Бироқ сешанба куни Европа Комиссияси барча 27 аъзо келишиб олиши керак бўлган Россиядан кўмир импортини тақиқлашни таклиф қилди. Европа ҳар йили Москвадан 4 миллиард евролик (4,4 миллиард доллар; 3,3 миллиард фунт) кўмир сотиб олади.

Россия уруш жиноятлари ҳақида далиллар пайдо бўлганидан кейин кайфият ўзгарганга ўхшайди - Франция президенти Эммануэл Макрон шу ҳафта бошида кўмирни тақиқлаш чақириқларига қўшилди.

Тақиқ АҚШ ва бошқа G7 давлатлари билан келишилган ҳолда эълон қилинадиган бир қатор санкциялардан олдин таклиф қилинган.

Европага аъзо давлатлар, шунингдек, Россиянинг тўртта банкига "жами транзакцияларни тақиқлаш" ва Россия ва Беларусдан 5.5 миллиард евролик бошқа импортни, жумладан, ёғоч, цемент, денгиз маҳсулотлари ва спиртли ичимликларни (6 миллиард доллар; 4,59 миллиард доллар) тақиқлаши кутилмоқда.

Еврокомиссия президенти Урсула фон дер Ляйен Европа Иттифоқи портларини Россия кемалари учун ёпиш, Россия ва Беларус автоташувчиларнинг минтақага киришини тақиқлаш ниятида эканини айтди.

Фон дер Ляйен хоним Россияни Украина тинч аҳолисига қарши "шафқатсиз уруш олиб бораётганликда" айблади ва Европа Иттифоқи "ушбу ўта оғир дамда Путин ва Россия ҳукуматига максимал босим ўтказиши" кераклигини айтди.

Бироқ сешанба куни кечқурун Литва ташқи ишлар вазири Габриэлюс Ландсбергис Европа Иттифоқи таклиф қилган санкциялар пакетини танқид қилиб, уни "заиф жавоб", яъни "янги ваҳшийликларга таклиф" деб атади.

"Кўмир, тўрт банк... портлар ва чегараларни ёпиш (истиснолар билан) ҳақиқатан ҳам ошкор қилинган қирғинларга қарши адекват санкциялар пакети эмас", деб ёзган жаноб Ландсбергис "Twitter"да.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek