Украинадаги уруш: Даҳшатли далиллар Киев яқинида уруш жиноятлари содир бўлганига ишора қилмоқда Ukraina Rossiya Putin

Март ойи бошида Киев яқинидаги шосседа россиялик ҳарбийлар икки қўлини кўтариб турган одамни отиб ташлагани тасвирланган видеолавҳалар интернетда тарқалди. Ҳозир руслар бу ҳудуддан сиқиб чиқарилган. Би-би-си мухбири Жереми Боуэн уларнинг қисқа муддатли ишғоли ҳудудда қандай даҳшатли оқибатлар қолдирганига гувоҳ бўлди.

Алоқадор мавзулар:

Мрия ва Мила қишлоқлари орасидаги узунлиги 200 метрдан ошмайдиган йўлда биз 13 жасадни ҳисобладик.

Ҳалок бўлганларнинг икки нафари руслар томонидан ўлдирилган Украина фуқаролари эканлиги тасдиқланган. Қолганларнинг шахси ҳали аниқланмаган - улар ўлдирилган жойда ётган бўлган - фақат иккитаси украина ҳарбий кийимида.

Бизнинг Би-би-си жамоамиз Е-40 трассаси Киевга яқинлашган жойида ушбу ҳудудга киришга муваффақ бўлди, чунки Украина кучлари бу ҳудудни атиги 10 соат олдин эгаллаганди.

Ҳамма жойда жанг ва портлашлар асоратлари бор эди. Ёқилғи қуйиш шохобчалари, курорт ва ресторани билан машҳур бўлган меҳмонхона вайронага айланган эди. Йўллар портлашдан қолган чуқурларга тўла эди.

Йўл бўйидаги гараж харобаларида ғилдирак алмаштираётган украиналик аскарларнинг айтишича, руслар 4 км нарида бўлган ва бир неча кун давом этган шиддатли жанглардан сўнг қолган аскарлари ва бронетехникаларини олиб эрта тонгда чекинган.

Вайронагарчилик марказида жасадлар қолди, улар кимлиги ва қандай ўлганлиги ҳақида кўплаб савол ва хавотирлар бор эди.

Руслар томонидан ўлдирилган ва 7 март куни шунчаки ташлаб кетилган жуфтликнинг жасадлари ҳақида баъзи жавоблар аллақачон мавжуд. Уларнинг занглаган, ракета парчалари илма-тешик қилган машиналари ёнилғи қуйиш шохобчаларидан бирининг ёнида турибди. Унинг ёнида куйиб кетган, букчайган одам жасади ётибди ва айрим қолдиқлардангина унинг кимлигини таниш мумкин. Никоҳ узуги ҳамон мурданинг бармоғида турибди. Машина ётган аёл жасади куйиб кетган, бир нарсадан қўрқиб бақираётгандек оғзи очиқ қолган эди.

Уларнинг қандай ўлгани 7 март куни Бугатти ҳудудий мудофаа бўлинмасининг Украина дрони томонидан тасвирга олинган. Бўлим бутун дунё бўйлаб медиа ташкилотлари эълон қилган видеони чиқарди. Бу кўплаб одамларнинг ғазабига сабаб бўлди, чунки унда қуролсиз эканини кўрсатиб қўлини кўтарган, таслим бўлган одам шавқатсизлик билан ўлдирилгани кўрсатилганди.

Би-би-си томонидан шу ойда олиб борилган суриштирув давомида топилган жасадлар Максим Иовенко ва унинг рафиқаси Ксенияникидир. Улар руслардан қочиб, Киевга етиб олишга уринган 10 нафар фуқаровий автомашинадан бирида бўлган.

Улар йўлда кетаётиб, ўтлар орасидаги рус танкини кўришди. Дрондан олинган видеодан кўриниб турибдики, у Россия қуролли кучлари қўллаган кўрсаткичлардан бири бўлган V ҳарфи билан аниқ белгиланган. Бошқа машиналар ортга бурилиб, тезликда кетишди. Аммо Максимнинг машинаси урилгани сабабли тўхтади.

Машина тўхташи билан Максим сакраб тушиб қўлларини кўтарди. Бир неча сониядан кейин у отиб ўлдирилган. Унинг хотини машинада ўлган. Шунингдек, машинада уларнинг олти ёшли ўғли ва Максимнинг дўстларидан бирининг кекса онаси бўлган. Уларнинг иккаласи ҳам тирик қолган, кейинроқ рус аскарлари уларни қўйиб юборган.

Улар йўл бўйлаб қайтишган ва аёл ўз қариндошларига Максим машинада бола борлигини айтиб қичқираётган вақтда отиб ўлдирилганини айтиб берди. Бугатти дрон бўлинмаси маълумотларига кўра, аёл ва бола ҳозир хавфсиз, аммо қаттиқ руҳий шикастланган.

Ҳозир машина ёниб кетган, лекин ҳужум қилинганда ёнмаган эди. Руслар ўз қилмишларини тасдиқлайдиган далилларни йўқ қилиш учун жасадлар ва машинани ёқиб юборган бўлиши мумкинлиги айтилмоқда. Бугатти бўлинмаси видеотасвирларни Украина ҳукумати ва Лондон шаҳар полициясига тақдим этди.

Кейинги бир неча юз метр йўл бўйлаб ёниб кетган машиналар ва ўлик жасадлар тўпланиб қолган. Нима бўлганини кўрсатадиган видеотасвир чиқмади. Бу ўринда ҳар қандай тергов учун ишончли илк тахмин шуки, ҳалок бўлган бошқа одамлар рус танк экипажи ёки бошқа рус аскарлари томонидан ўлдирилган.

Бошқа жасадларни йўқ қилишга уринишлар бўлган. Баъзилари ўлдирилган жойда чиришга қолдириб кетилган. Аммо бошқа жасадлар бир ерга тўпланиб, атрофи шиналар билан ўраб қўйилганди. Куйган кийимлар улар атрофида ўт қўймоқчи бўлганликларини кўрсатарди. Шиналар жуда тез алангаланади ва жасадлар яхшироқ ёниши учун қўйилган бўлиши мумкин.

Танк турган хандақда 13 та жасад ётган ҳудуд бўйлаб аниқ кўриниб турган ёнғин изи бор. Танк жўнаб кетган, лекин унинг экипажи ўзидан вайроналар ва рус армиясининг дала рационини қолдирган. Яқин атрофда, ўрмонда, танкка қарши ракета билан урилганидан кейин ёниб кетган яна камида битта танк бор.

Украина аскари танкдан ҳамён топиб олди. Унда рус шахсни тасдиқловчи гувоҳномалари, рус валютаси ва Беларусь танга пуллари бор эди. Москва иттифоқчиси бўлмиш Беларусдан чегарани кесиб ўтган босқинчилар Киевнинг шимоли-ғарбий қисмига асосий зарбани берди.

Урилган танкнинг ёнида хандақ, стуллар, озиқ-овқат ва ичимликлар қолдиқлари бўлган узун стол бор. Атрофда катта ахлат уюмлари, чириган озиқ-овқат, спиртли ичимликларнинг бўшаган идишлари ётарди. Украина ҳарбийларига кўра, ёқилғи қуйиш шохобчаларидаги дўконлар талон-тарож қилинган.

Стол ёнида бир жуфт катта болт кесгич турибди. Олдинда сочилиб ётган кўмилмаган қолдиқлар уларнинг интизомсиз аскарлар бўлганини кўрсатади.

Украина аскарлари Россиянинг янада кўпроқ зирхли техникаси йўқ қилинганини айтишганидан кейин биз йўл бўйлаб икки-уч километр нарига боришга қарор қилдик.

Кичик бир қишлоқда рус танки ва иккита бронетранспортёри йўқ қилиниб ёқиб юборилганди. Уларнинг айримларидан ҳамон тутун чиқиб турарди. Танкни йўқ қилган қуролнинг кучи унинг боши ва асосий қуролини портлатиб учириб юборган, 10 метр нарида ярим кўмилган ҳолатда ётарди.

Йўлнинг икки томонидаги қарағай ўрмонида украиналик аскарлар белкурак билан хандақ қазиётган, қолганлари патруллик қилаётганди. Руслар бутунлай кетдими ёки қайтадими, жавоб беришга ҳали эрта эди.

Бироқ украин аскарларининг доимий босими остида рус қўшинлари Киев атрофидаги стратегик ҳудудни ташлаб кетишга мажбур бўлгани аниқ. Улар ҳар чекинганда, Украина пойтахти ва унинг аҳолиси бироз хавфсизроқ бўлади.

Руслар чекинар экан, тинч аҳоли ўлимига оид кўпроқ далиллар пайдо бўлиши мумкин, улар эса бундай воқеалар билан боғлиқ кўплаб хабарларни тасдиқлайди.

Йўлдаги даҳшатли манзаралар нафақат президент Путиннинг босқинчилик қарори қурбони бўлган одамларнинг даҳшатли ўлими эди, шу билан бирга, бу манзара уруш тугагандан сўнг тергов учун тўпланиши ва сақланиши керак бўлган далилларга эга жиноят содир этилган жой ҳамдир.

Уруш қонунларига кўра, тинч аҳоли ҳимоя қилинади ва уларни бу қонунларга зид равишда ўлдириш уруш жинояти ҳисобланади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek