Ғарб нашри Путин, Кабаева ва уч нафар бола ҳақида ёзди Rossiya Dunyo Yangiliklar
Сурат манбаси, Getty Images
Wall Street Journal нашри таъкидлашича, Россия президенти Владимир Путиннинг гимнастикачи Алина Кабаевадан учта фарзанди бор ва АҚШ унга нисбатан санкциялар қўллашни кўриб чиққан, бироқ "сўнгги дақиқада" бу ғоядан воз кечган.
Шу пайтгача Путин ва Кабаева ўртасидаги гўёки муносабатлар борлиги мавзуси нафақат Россия, балки аксарият Ғарб матбуотида ҳам табу бўлиб келган эди.
Россиянинг Украинага бостириб кириши муносабати билан Кабаевага санкция қўлланилиши мумкинлиги, аммо Путинни ғазаблантирмаслик учун санкциялар рўйхатига киритилмагани ҳақидаги маълумот сабабли Американинг "Wall Street Journal" бизнес-нашри ушбу мавзуни кўтарган.
Би-би-си бу маълумотни мустақил равишда тасдиқлай олмайди, фақат ушбу нашр маълумотларини келтириши мумкин.
WSJ нима деб ёзган?
"Wall Street Journal" ўз номини ошкор этмаган АҚШ расмийларига таяниб ёзишича, АҚШ ҳукумати 39 ёшли (аслида 38 ёш) Кабаева Россия президентининг дўсти ва у Путиндан камида уч фарзанд туққани, президентнинг чет элдаги шахсий бойлигини яширганликда гумон қилмоқда.
WSJ маълумотларига кўра, Кабаева АҚШ санкцияларининг потенциал нишони бўлиб қолмоқда, бироқ бу чорани муҳокама қилаётган расмийлар Олимпия чемпионига қарши санкциялар қўлланишини Путинга берилган шахсий зарба сифатида қарайди ва бу Россия ва Қўшма Штатлар ўртасидаги зиддиятни янада кучайтириши, Украина билан тинчлик музокараларига халал бериши мумкин, деб ҳисоблайди.
АҚШ ва Европа разведка хизматлари вакилларининг сўзларига кўра, Кабаева Швейцарияда кўп вақт ўтказган. Гимнастикачининг ҳаракатларидан хабардор АҚШ расмийлари у Женева яқинидаги баланд деворли қасрда яшаганини даъво қилмоқда.
WSJнинг қайд этишича, Украина расмийлари шу ойда Швейцария ҳукуматига Кабаеванинг мамлакатга киришини тақиқлаш ва унинг мол-мулкини мусодара қилишни талаб қилиб, мактуб йўллаган, бироқ Швейцария расмийлари унинг мамлакатда эканлигига далил йўқлигини айтган.
WSJ эслатганидек, Кабаеванинг исми Кремль сайтида биринчи марта 2001 йилда тилга олинган. 2008 йилда "Московский корреспондент" газетаси ўша пайтда расман никоҳда бўлган Путин Кабаевага турмуш қуришни таклиф қилганини ёзган эди. Путин, WSJ маълумотларига кўра, бу маълумотни "жаҳл билан рад этди" ва бир неча кундан кейин газета ёпилди. Тахминан шу вақтда Кабаева спортни тарк этди ва "Ягона Россия" партиясидан депутат бўлди, 2014 йилда у парламентни тарк этиб, Миллий медиа гуруҳи директорлар кенгаши раиси бўлди.
Тахминан 2013 йилдан бери, деб ёзади WSJ, Кабаева ва унинг қариндошлари Россияда олтита квартира, иккита уй ва энг нуфузли жойлардан ер сотиб олишди. Кабаева ва унинг оила аъзолари электрон почта орқали юборилган саволларга жавоб бермади, деб ёзади WSJ.
Нашрнинг Швейцария, Европа ва Америка расмийлари орасидаги манбалари таъкидлашича, 2015 йилда Кабаева Путиндан фарзанд кўрган ва туғилиш Лугано кўлига қараган ҳашаматли Швейцария клиникасида бўлган. Кейин оммавий ахборот воситалари Путиннинг саккиз кун давомида омма олдига чиқмагани, у Кабаева билан бирга бўлганини тахмин қилишди. Кремль буни яна рад этди.
2019 йилда, WSJ суҳбатлашган АҚШ расмийларига кўра, Кабаева Москвада бўлганида эгизак фарзанд дунёга келтирган. Нашр бу ҳақдаги хабар "Московский комсомолец" сайтида чоп этилгани, аммо тезда ўчириб ташланганига эътибор қаратади.
WSJ манбаларига кўра, аллақачон Кабаевага қарши санкциялар пакетини тайёрлаган АҚШ Молия вазирлиги изоҳ беришдан бош тортди. Путиннинг матбуот котиби Дмитрий Песков нашрнинг сўровларига жавоб бермади.
Путиннинг болалари ҳақида нима маълум?
Путиннинг Людмила Путина (Шкребнева) билан турмушидан икки қизи бор, у 2013 йилда ажрашганини эълон қилган эди. Россия президенти оиласи ҳақида гапиришни ёқтирмайди ва унинг қизлари билан тушган охирги сурати 2002 йилда чоп этилган.
6 апрель куни АҚШ Ғазначилиги Катерина Владимировна Тихонова ва Мария Владимировна Воронцовага қарши санкциялар киритди - айнан журналистлар уларни Россия президентининг расмий никоҳдан бўлган қизларини деб аташган.
2020 йил кузида «Проект» нашри (Россияда номақбул ташкилот деб тан олинган ва ёпилган) Путиннинг маъшуқаси бўлган, дўстларидан "қимматбаҳо совғалар" олган ва «Россия» банкининг акциядорига айланган Светлана Кривоногих исмли санкт-петербурглик аёл ҳақида ёзган эди. Бундан ташқари, нашр ёзганидек, Светлананинг қизи Элизабет "давлат раҳбарига ниҳоятда ўхшайди".
Россия президентининг матбуот котиби Дмитрий Песков Светлана ҳақидаги хабарга изоҳ берар экан, бундай аёл ҳақида биринчи марта эшитганини айтди.
Би би си Рус хизмати мухбири Андрей Захаров Путиннинг қариндошлари ҳақидаги маълумотлар нима учун муҳимлиги ҳақида
Жаҳон журналистикасида сиёсий лидерларнинг шахсий ҳаётини ёритиш бўйича иккита асосий дискурс мавжуд. Биринчисига кўра, агар бош вазирлар ёки президентлар оиласи аъзолари ўз мавқеидан фойдаланиб, бойиб кетса, бу маълумотлар жамоатчиликда қизиқиш уйғотади. Иккинчисини одатда «сариқ» деб аташади, унга кўра, мамлакат раҳбарининг ҳаётидан ҳар қандай янгилик қизиқ, ҳатто унинг рафиқасини кўчада маст ҳолда кўришган бўлса ҳам.
Путин оиласи ҳақидаги маълумотларни эҳтиёткорлик билан яширади. Аммо маълум бўлган нарсалар деярли ҳар доим биринчи дискурс соҳасига тегишли. Унинг қизларидан бири Катерина Тихонова давлат ва ҳукумат идораларидан кўплаб субсидиялар оладиган «Иннопрактика» илмий жамғармасини бошқаради.
Мен номақбул деб таснифланган «Проект»даги ҳамкасбларим билан биргаликда унинг учинчи қизи Светлана Кривоногихнинг онаси «Россия» банкининг акциядори эканлигини аниқлашга муваффақ бўлдим, уни АҚШ ҳукумати президентга яқин доиралар банки деб атаган.
Алина Кабаева билан ҳам худди шундай: у асосий акциядори «Россия» банки бўлган Миллий медиа гуруҳи директорлар кенгашини бошқаради. Бу гуруҳ бир нечта машҳур телеканалларга, жумладан, Биринчи каналда улушга эга. Тўғри, Украина билан уруш бошланганидан сўнг, холдинг веб-сайтидан Кабаеванинг у ерда ишлаши ҳақидаги маълумотлар йўқолди.
