Европа Иттифоқи Беларусни жазолашга қарор қилди - Belarus, Rossiya, Lukashenko, Putin, yangiliklar

Европа Иттифоқи Беларусь масаласини кўриб чиқди. Халқаро йўловчи самолётининг Минскка қўндирилиб, Лукашенко танқидчисининг қўлга олиниш амалини бежавоб қолдирмади. Иттифоқ Беларусга янги санкциялар киритишга қарор қилди.

АҚШ ва Европа Иттифоқи Беларусь президентини жавобгарликка тортишни ҳам ваъда қилишган.

Аммо ҳозирча қолган тафсилотларини очиқлашмаган.

Европа Иттифоқига аъзо 27 давлат лидерлари ҳодисадан кун ўтиб, кеча, душанба куни Брюсселда йиғилишган.

Улар Европадаги барча ҳаво ширкатларини Беларусь ҳаво ҳудудидан фойдаланмасликка чақиришган.

Беларусь самолётларининг ўз ҳудудлари ва аэропортларидан истифода этишига йўл қўймаслик борасида ҳам топшириқ беришган.

Бунга қўшимча, Беларусга янги иқтисодий жазо чоралари киритиш режасида эканликларини ҳам айтишган.

Видео

26 ёшли Роман Протасевич "бомба хавфи" сабаби билан Минскка қўндиртирилган самолётда Грециядан Литвага учаётган бўлган.

Бир йил аввал Беларусни тарк этган журналистнинг қидирувда бўлгани айтилмоқда.

Ғарб давлатлари Беларусни Ryanairнинг йўловчи самолётини "олиб қочиш"да айблашаётир.

Минск аэропортида ҳибсга олиниши ортидан, илк бор Роман Протасевичнинг видеоси ҳам бўй кўрсатган.

Видео босим остида ёзилгандек кўринган.

Душанба куни кечқурун эълон қилинган видеода журналист "соғлиги яхши" эканини айтган.

Беларусь давлати томонидан ўзига қарши илгари сурилган айбловларга иқрордек қиёфада акс этган.

Аммо фаоллар, шу жумладан, мамлакатнинг асосий мухолифат лидери мазкур видеони танқид қилишган.

"Айби"га бу тариқа иқрор бўлиши учун журналист босим остида бўлганини тахмин этишган.

АҚШ муносабати

Якшанба кунги ҳодисага АҚШ Президенти Жо Байден ҳам шахсан муносабат билдириб чиққан.

Ryanair йўловчи самолётининг мажбуран қўндирилиши ва Nexta Telegram-канали асосчисининг қўлга олиниши "халқаро ҳуқуқ меъёрларининг тўғридан-тўғри бузилиши" эканини айтган.

Байден Протасевичнинг ҳибсга олинишини "сиёсий ўзгача фикрлилик ва матбуот эркинлигига уятсизларча қилинган ҳужум", деб баҳолаган.

"Америка Қўшма Штатлари уни ва Лукашенко тузуми томонидан адолатсиз равишда тутиб турилган юзлаб сиёсий маҳбусларни озод қилишга чақираётган давлатлар қаторига қўшилиши"ни ҳам баён қилган.

Европа Иттифоқи эса, Беларусни умумий қиймати $3 миллиард долларга тенг сармоя ва молиявий кўмакдан ҳам мосуво этмоқчи.

Бу ҳақда Европа Комиссияси раиси Урсула фон дер Ляйен маълум қилган.

Беларусь токи демократик давлатга айланмас экан, юборишга тайёр турган бу маблағнинг музлатиб қўйилишини айтган.

Унга кўра, Европа Иттифоқи Беларусь мулозимларига қарши қўшимча индивидуал санкциялар киритишга ҳам қарор қилган.

"Бу демократия, фикр эркинлиги ва Европа суверенитетига қарши ҳужум...Бунга жавоб ҳам қатъий бўлиши лозим. Қўшимча индивидуал санкциялар киритилади", - деб айтган Урсула фон дер Ляйен.

Унинг бу сўзларидан Россиянинг "Интерфакс" ахборот агентлиги иқтибос келтирган.

Расмий Кремль эса, мазкур воқеага оғир-босиқлик билан муносабат билдиришга чақирган.

Россия Ташқи ишлар вазири кеча, душанба куни Сочида грециялик ҳамкасби билан матбуот анжумани берган.

Сергей Лавров юз берган ҳолатга "шошқалоқлик билан эмас, имконли бўлган маълумотлар асосида қаралиши шарт" эканлигини баён қилган.

Европа Иттифоқининг қарори ва АҚШ президентининг баёнотига расмий Минск муносабати ҳозирча имконли эмас.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek