FinCEN ҳужжатлари: Путиннинг санкцияга тушган дўсти Barclays орқали “миллионлаб доллар ювган” - янгиликлар

Сиздирилган ҳужжатларга кўра, Владимир Путиннинг яқин дўстларидан бири Лондондаги Barclays Bank орқали пул ювган ва санкцияларни четлаб ўтган бўлиши мумкин.

Миллиардер Аркадий Ротенберг Россия президенти билан болалигидан дўст.

АҚШ ва Европа Иттифоқи жаноб Ротенбергга қарши 2014 йили молиявий санкциялар қўйган эди. Яъни, у билан ишлаган Ғарб банклари жиддий оқибатларга дучор бўлиши мумкин.

Barclays берча қонуний талабларни ўрнига қўйганини айтади.

Сиздирилган махфий ҳужжатлар - банкнинг "шубҳали хатти ҳаракатлар ҳақидаги хабарномаси" жаноб Ротенберг назоратида экани ишонилган компаниялар махфий ҳисоб рақамларни қандай сақлаганини фош қилади.

FinCEN ҳужжатлари деб аталадиган файллар Би би сининг "Панорама" дастурига келиб тушган.

Ички хос доира

2014 йил мартида Қримнинг аннекция қилиниши ортидан АҚШ Россияга қарши иқтисодий санкцияларни жорий қилган эди.

АҚШ Молия вазирлиги 68 ёшли жаноб Ротенберг ва унинг укаси 63 ёшли Борисни "Россия раҳбариятидаги ички доира аъзоси" сифатида белгилаган эди.

Уларнинг ҳар иккиси ёшлигида Путин билан айни бир дзюдо залида машқ қилган ва беллашган.

Кейинги йилларда Аркадий Ротенбергнинг компаниялари давлат буюртмаси асосида йўл қуриш, газ қувурлари ўтказиш, энергия станциялари қуриш билан шуғулланмоқда.

АҚШ Молия вазирлигига кўра, бу ака ука "Путиннинг арзанда лойиҳаларига кўмак беради" ва "Путин берган имконият асосида Газпром ва Сочи қишки олимпиадаси учун шартномалар орқали миллиардлаб доллар ишлаб олган".

2018 йили АҚШ Аркадий Ротенбергнинг ўғли Игорни ҳам санкцияга тушган шахслар рўйхатига киритган.

Бу санкциялардан мақсад, рўйхатга киритилган шахсларни Ғарб молия тизимидан узиб қўйишдир.

Шунга қарамай, Ротенберглар пулни АҚШ ва Британия орқали айлантириб юрган кўринади.

Санъат асарлари ва пул ювиш

2008 йилда Barclays "Advantage Alliance" номли компания учун ҳисоб рақам очади.

Сиздирилган ҳужжатларга кўра, 2012-2016 йиллар давомида компания 60 миллион доллар ўтказади. Пулларнинг асосий қисми ака ука Ротенберглар санкцияга тушгандан сўнг ўтган.

Шу йили июлда АҚШ Сенати текшируви Ротенбергларни санкциядан қочиш учун қимматбаҳо санъат асарларини яширин суратда сотиб олганликда айблади. Бу схемада иштирок этган компаниялар ичида "Advantage Alliance" ҳам бор.

АҚШ терговчилари "Advantage Alliance" Аркадий Ротенбергга қарашли экани ва бу компания Лондондаги Barclays ҳисоб рақами орқали Ротенберг учун миллионлаб долларга санъат асарлари сотиб олгани ҳақида кучли далиллар борлигини хулоса қилган.

Ҳисоботда "махфийлик, анонимлик ва қоидасизлик пул ювиш ва санциялардан қочиш учун қулай муҳит яратаётгани" таъкидланган. АҚШ ва Британияда ўтадиган кимошди савдоларида санъат асари сотиб олаётган харидор ҳақида "муҳим саволлар берилмайди".

Санкцияларга қарамай, Аркадий Рене Магриттнинг "La Poitrine" картинаси учун 7.5 миллион доллар тўлаган.

2014 йил 17 июлда Аркадийга алоқадор компания Москвадан "Alliance"нинг Лондондаги ҳисоб рақамига пул ўтказган. Келаси куни Barclays пулни Нью Йоркдаги сотувчига ўтказиб берган.

Ҳисоб рақам ёпилди

I2016 йил апрелида Barclays Ротенбергларга алоқаси бор деган гумондаги бир нечта ҳисоб рақамлар бўйича ички текширув ўтказган.

Олти ой ўтиб, банк шубҳали пулларни айлантириш хавотири боис, "Advantage Alliance"нинг ҳисоб рақамини ёпган.

Аммо шубҳали фаолиятлар бўйича хабарномаларнинг (SARs) сиздирилиши Ротенбергларга қарашли ҳисоб рақамлар банкда 2017 йилгача очиқ бўлганини фош қилган.

Ана шундай компаниялардан яна бири "Ayrton Development Limited".

Ҳужжатларга кўра, Barclays "Ayrton"нинг фаолиятидан шубҳаланган ва "Бу компаниянинг эгаси Ротенберг" деган хулосага келган.

Би би сининг "Панорама" дастури Barclaysдан нечта ҳисоб рақам Ротенбергларга тегишли деб шубҳалангани ҳақида сўраган

Barclays сўзчиси шундай жавоб берган: "Биз барча қонуний мажбуриятларимизни, жумладан, АҚШ санкциялари бўйича мажбуриятларимизни бажарганимизга ишонамиз."

"SARда бирор файлнинг бўлиши қонунбузарлик учун далил эмас, биз мижоз билан алоқани жиддий ва холис текширувдан сўнггина, айбсиз мижознинг ҳайдалиш эҳтимолини камайтирган ҳолда узишимиз мумкин.

Ротенбергнинг ўзи изоҳ беришни рад этди.

Нега ҳамма FinCEN файлларига қизиқиб қолди?

FinCen ҳужжатлари йирик банклар қандай қилиб кир пулларни дунё бўйлаб айлантиришга қўйиб бераётгани ҳақидаги сиздирилган маҳфий ҳужжатлардир. Улар Британиянинг молиявий тизимдаги заиф нуқта экани ва Лондонга қанча рус пуллари оқиб келаётганини ҳам кўрсатади.

Бу ҳужжатлар "Buzzfeed News"га сиздирилган ва дунёнинг турли чеккаларидан тўпланган суриштирувчи журналистлардан иборат гуруҳга берилган, улар эса ҳужжатларни 88 мамлакатдаги 108 та ОАВга, жумладан Би би сининг "Панорама" дастурига берган.