Брексит: Британия расман Европа Иттифоқини тарк этди
Сурат манбаси, Getty Images
Буюк Британия 47 йиллик аъзолик ва умуммиллий референдумда овоз берганидан уч йил ўтиб, Европа Иттифоқини тарк этди.
GMT вақти билан жума куни 23.00да содир бўлган тарихий воқеа байрам қутловлари ва аксил-брексит намойишлари билан нишонланди.
ЕИда қолиш учун овоз берган Шотландияда шамлар ёқилган бўлса, брекситчилар Лондоннинг Парламент хиёбонида тантана қилишди.
Бош вазир Борис Жонсон мамлакатни бир орага келтириш ва ёруғ келажак сари бошлашга ваъда берди.
Европа Иттифоқидан чиқишдан бир соат олдин ижтимоий тармоқларда ёйинланган мурожаатида "кўпчилик одамлар учун бу ҳеч қачон келмайди деб ўйланган умид лаҳзалари" бўлганини таъкидлади.
Сурат манбаси, Reuters
"Албатта, йўқотиш ҳисси ва тараддудда бўлган кўпчилик ҳам бор", деган Жонсон ўз баёнотида.
Ўтиш даври жорий йилнинг 31 декабрига қадар қадар давом этса-да, Бирлашган Қироллик фуқаролари эндиликда мамлакат ЕИ аъзоси эмаслигини баъзи ўзгаришларда ҳис қилишади.
Европа Иттифоқининг кўпгина қонунлари йил охиригача амал қилишда давом этади.
Бу муддат ичида Буюк Британия Европа Иттифоқи билан янги савдо битимини имзолашга умид қилмоқда.
Аммо ЕИ раҳбарлари Британияни олдинда қийин музокаралар кутаётгани ҳақида огоҳлантиришган.
АҚШ эса ЕИ ва Буюк Британия брексит юзасидан келишувга эришганини олқишлаган.
АҚШ Давлат Котиби Майк Помпео Қўшма Штатлар Британия билан "мустаҳкам, сермаҳсул ва фаровон муносабатлар қуришда давом этиши"ни билдирган.
Американинг Лондондаги элчиси Вуди Жонсон Президент Трамп брекситни "кўпдан буён қўллаб-қувватлаб келгани"ни хотирлатган.
Шотландиядан келаётган охирги хабарларга кўра, шотланд ҳукумати иккинчи мустақиллик референдумини ўтказиш ва мамлакатни Европа Иттифоқига қайтаришни режалаётганини маълум қилган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
