Эрондаги самолёт ҳалокатида омон қолганлар йўқ

Эронда бортида 66 одам бўлган йўловчи учоқ қулаб тушди. Aseman Airlines авиаширкатига тегишли самолёт Теҳрондан Эрон жанубий ғарбидаги Ясуж шаҳрига учаётган бўлган. Учоқ мамлакат марказидаги тоғли худудда жойлашган Семиром шаҳри яқинида қулаб тушган.

Бу ҳақда ISNA агентлиги хабар бермоқда.

Эрон матбуотининг ёзишича, самолёт бортида 60 йўловчи, икки учувчи, икки борт стюарди ва икки қўриқчи бўлган.

Aseman Airlines вакили Муҳаммад Табатаий самолётдаги барчанинг ҳалок бўлганини айтди.

Учоқ етиб бориш қийин бўлган туманда қулаган. Айни дамда у ерга автомобилларга миниб олган қутқарувчилар етиб боришга ҳаракат қилмоқда. Ҳодиса жойи қуюқ туман бўлгани сабаб тикучар қўна олмаган.

Учоқ Теҳроннинг Меҳробод аэропортидан кўтарилганидан 50 дақиқа ўтиб радарлардан йўқолиб қолган.

Би-би-си Форс хизматининг "Форс" агентлигига таяниб ҳабар беришича, ушбу авиаширкатнинг яна бир самолёти ноқулай об-ҳаво сабаб фавқулодда қўнишни амалга оширган.

Бошқа мамлакатлар билан солиштирганда Эронда авиаҳалокатлар тез-тез содир бўлиб туради.

Теҳрон бунинг сабабини Америка томонидан қўйилган санкциялар билан боғлайди. Санкциялар оқибатида мамлакат янги Ғарб учоқлари ёки Эрондаги учоқларга эҳтиёт қисмларини сотиб ололмайди.