Ўзбекистон: Вазирлик квартирадан ҳайдалаётган ижарачиларга эслатма берди, Тошкентда тўрт одам ароқдан заҳарланиб вафот этди ва сентябрда қанча россиялик келган? O'zbekiston, Dunyo yangiliklar

"Ижара ҳуқуқингиз бузилса, судга мурожаат қилинг"

Чет элликлар оқими фонида ижара нархларининг кескин ошиши ва ижарачиларнинг квартиралардан мажбуран чиқариб юборилаётгани тўғрисидаги хабарлардан сўнг Адлия вазирлиги фуқароларга эслатма билан мурожаат қилган.

Эълон қилинган "қисман" сафарбарликдан қочган минглаб россияликларнинг Марказий Осиё, хусусан, Ўзбекистонга келиши пойтахт Тошкентдаги уй-жой ижараси нархларининг кўтарилиб кетишига сабаб бўлган.

Оқибатда, тармоқда ижара нархларининг бир томонлама оширилаётгани ва янги нархларга қурби етмаётган ижарачиларнинг квартиралардан мажбуран чиқариб юборилаётганига оид кўплаб хабарлар пайдо бўлган.

Айниқса, талаба экани ва оширилган нархни тўлашга имкони йўқлигини айтган бир неча қизнинг уй эгаси томонидан ҳайдаб солинаётгани тасвирланган видео қизғин муҳокамаларга сабаб бўлган.

Кейинроқ бу видеодаги ҳолат ЎзЖОКУ талабалари томонидан махсус саҳналаштирилганига оид расмий баёнот берилган бўлса-да, кўплаб фойдаланувчилар томонидан ижара ҳақини асоссиз ошираётган квартира эгалари кескин тақид этилган изоҳлар қолдирилган.

Алоқадор мазвулар:

Бундай хабарлар манзарасида Адлия вазирлиги уй-жой эгаларининг бу каби ҳаракатлари Фуқаролик кодекси ва бошқа қонунчилик ҳужжатлари талабларининг бузилишига сабаб бўлишини тилга олиб, фуқароларга квартира ижарасига оид бир қатор ҳуқуқий асосларни эслатиб ўтган.

Вазирликнинг билдиришича, уй-жой ижараси шартномаси бир томонлама ўзгартирилмайди ёки бекор қилинмайди ҳамда ижара ҳақи миқдорининг ҳам бир томонлама ўзгартирилишига йўл қўйилмайди.

"Ижара шартномасини ижарага берувчининг талаби билан бекор қилиш муайян асосларга кўра фақат суд тартибида амалга оширилади. Бу асослар жумласига қуйидагилар киради: ижара пули олти ой ёки қисқа ижарада эса шартномадаги муддатдан кейин 2 мартадан кўпроқ ҳақ тўланмаган бўлса; уй-жой вайрон қилинса ёки унга путур етказилса; уй-жойдан ғайриқонуний мақсадлар учун фойдаланилган бўлса", тушунтирган вазирлик.

Адлия вазирлиги ижарага берувчилар томонидан квартирадан чиқиб кетиш ёки кўпроқ ҳақ тўлашга оид ноқонуний талаблар устидан фуқаролик ишлар бўйича судларга мурожаат қилиш орқали бузилган ҳуқуқларни тиклаш мумкинлигини эслатиб ўтган.

Шунингдек, вазирлик уй-жойини ижарага бераётган мулкдорларга ҳам мурожаат қилган:

"Ўз манфаатларингиз ҳисобига бошқа шахсларнинг ҳуқуқ ва манфаатларига путур етказиб қонунчилик талабларини бузмасликка чақирамиз".

Ўзбекистонга келган россиялик туристлар

Сентябрь ойининг ўзида Ўзбекистонга 78,2 минг россиялик турист келган ва бу апрель ойидаги кўрсаткичдан 2,7 баробар кўп.

Бу ҳақда Давлат Статистика қўмитаси маълумотларига таяниб, Telegram'даги Bakiroo канали ёзмоқда.

8 октябрь куни Давлат Статистика қўмитаси йилнинг 9 ойи давомида Ўзбекистонга 3,6 миллион хорижлик туристик мақсадларда келганини хабар қилган эди.

Хабарда бу кўрсаткич ўтган йилнинг мос даврига нисбатан 2,5 миллион нафар ёки 3,2 баробарга ошгани айтилади.

Қўмитанинг маълум қилишича, январь-сентябрь ойларида Ўзбекистонга туристик мақсадда энг кўп Қозоғистон фуқаролари (1,07 миллион нафар) келган бўлса, Россия тўртинчи ўрин (395,1 минг нафар)ни эгаллаган.

21 сентябрь куни Россияда "қисман" сафарбарлик эълон қилиниши ортидан юз минглаб россиялик хорижга чиқиб кетган. Масалан, Қозоғистон ҳукумати октябрнинг илк ҳафтасига қадар 200 мингдан ортиқ Россия фуқароси чегарадан ўтганини хабар қилган.

Бироқ ҳарбий сафарбарликдан қочган қанча россиялик Ўзбекистонга кириб келганига оид расмий маълумотлар ҳозиргача очиқланмаган.

Бакироо каналининг расмий статистика маълумотларига таяниб ёзишича, август ойида 69,7 минг, июль ойида 61,6 минг, июнь ойида 53,4 минг, май ойида 47,5 минг, апрель ойида 29,3 минг нафар Россия фуқароси Ўзбекистонга келган.

"Чуқурлиги доим танқид остига олинадиган ўзбек статистикаси ўтган йили ва туристик мақсаддан бошқа мақомда ташриф буюрган россияликлар тўғрисидаги маълумотларни очиқламаган", дея ёзган канал муаллифи.

Финални томоша қилган президент

Президент Шавкат Мирзиёев 10 октябрь куни "Humo Arena" спорт саройида дзюдо бўйича жаҳон чемпионати доирасидаги финал беллашувини шахсан томоша қилган.

Томошабинлари қаторида давлат раҳбари ҳам бўлган эркаклар ўртасида 90 килограммгача бўлган вазн тоифасидаги финал баҳсида ўзбекистонлик Давлат Бобонов италиялик рақиби Кристиан Парлатини енгиб, олтин медални қўлга киритган.

Ғолиб Бобонов ва бошқа совриндорларга медалларни Мирзиёевнинг ўзи топширган.

Билдирилишича, ушбу спорт тадбири нуфузи бўйича Олимпия ўйинларидан кейинги ўринда турувчи муҳим мусобақа ҳисобланади.

Ўзбекистонда илк бор ўтаётган дзюдо бўйича жаҳон чемпионатида 82 мамлакатдан 571 нафар спортчи иштирок этаётгани хабар қилинган.

Жаҳон чемпионати 13 октябрь куни ўз якунига етади.

Ўғирланган эҳсон пуллари

Қорақалпоғистонга бемор бола учун йиғилган 9 миллион сўм эҳсон пули фирибгар томонидан ўғирланди, дея хабар бермоқда ИИВ Киберхавфсизлик маркази.

Маълум қилинишича, Тахиатош туманида яшовчи 32 яшар фуқаро бемор фарзандига хайрия қилиш учун Telegram каналларида эълон берган.

Ўзининг беморлар учун эҳсон пулларини йиғиб тарқатиш билан шуғулланишини айтган шахс фуқарога алоқага чиқиб, унга 200 минг сўмни эҳсон тариқасида берган.

"…бироздан сўнг у яна кўп миқдордаги пулларини эҳсон қилмоқчи эканлигини айтиб фуқаро Т.Н.ни банк картаси маълумотлари ҳамда СМС-хабарни қўлга киритиб жами 9.034.000 сўм пулларини фирибгарлик йўли билан қўлга киритган", дейилади марказ хабарида.

Расмий хабарда эҳсон пулларини ўзлаштирган шахс Кегейли туманида яшовчи 17 яшар фуқаро экани аниқлангани ва ҳолат юзасидан жиноят иши қўзғатилгани қўшимча қилинган.

Ароқдан заҳарланганлар

Бош прокуратура Тошкент шаҳрида бир неча инсон спиртли ичимликдан заҳарланиб вафот этгани тўғрисидаги хабарларни тасдиқлаган.

Маълум қилинишича, 8-9 октябрь кунлари давомида Тошкент шаҳри туманларидан бирида яшовчи уч эркак ва бир аёл спиртли ичимлик истеъмол қилиниши ортидан соғлиғи ёмонлашиб, касалхонага ётқизилган, аммо кўрсатилган тиббий ёрдамларга қарамасдан уларнинг бари вафот этган.

Daryo.uz нашри соғлиқни сақлаш тизимидаги манбасига таяниб, 9 октябрь куни заҳарланиш сабаб касалхонага ётқизилган яна бир эркак комада қолаётганини ёзган.

Бош прокуратуранинг билдиришича, ҳолат бўйича Жиноят кодексининг 186-моддаси (Хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek