Бир кунда уч ўлим - эпидемия чўққига чиқдими? Ўзбекистон, коронавирус O'zbekiston
Сурат манбаси, SSV
5 июль куни давомида Ўзбекистонда коронавирус билан боғлиқ жиддий салбий ўзгаришлар кузатилган.
Хусусан, кун якунига бориб, мамлакатда коронавирус юқтириб олганларнинг умумий сони 10 мингдан нафардан ортиб кетган.
Бундан ташқари коронавирус ҳолати расман қайд этилган санадан буён бир кун давомида уч беморнинг вафот этиши кузатилган.
Ўзбекистон: Бир кунда уч ўлим - эпидемия чўққига чиқдими? O'zbekiston, коронавирус - BBC News O'zbek
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
5 июль куни 71, 45 ва 49 яшарли СОВИД-19 беморлари оламдан ўтган. Уларнинг бари Тошкент шаҳрида истиқомат қилиб келган.
Шу кун мобайнида мамлакат бўйлаб жами 312 нафар янги бемор аниқланган. 121 та касалланиш ҳолати аҳоли орасида қайд этилгани айтилмоқда.
6 июль куни эса 67 ёшли яна бир пойтахтлик беморнинг ўлими тўғрисида хабар берилган.
Шу тариқа коронавирус туфайли вафот этган инсонлар сони 35 нафарга етган.
Соғлиқни сақлаш вазирлигининг маълум қилишича, 6 июль соат 10:00 ҳолатига кўра, Ўзбекистонда аниқланган коронавирус ҳолатлари 123 тага ортиб, инфекция юқтириб олганларнинг умумий сони 10,143 нафарни ташкил этмоқда.
Айни вақтга қадар 6,584 бемор соғайган, шифохоналарда 3,524 бемор даволанмоқда.
Улардан 25 нафари оғир, 8 нафари эса ўта оғир аҳволда экани маълум қилинган.
Эпидемия ўз чўққисига кўтарилдими?
Qalampir.uz нашри билан суҳбатлашган Вирусология илмий-текшириш институти директори, профессор Эркин Мусабоев Ўзбекистонда коронавирусга чалиниш ўзининг чўққисига чиқдими, деган саволга шундай жавоб берган:
"Ҳозирдан бирор нарса дейиш қийин. Аслида карантин ҳамон амалда, лекин фақат ижтимоий масофа сақлаш - бу карантин эмас. Биз ижтимоий масофа бўйича тадбирларни давом эттираётганимизда - уч ҳафта давомида, яъни карантин юмшаганда натижалар кунига 250-300 бўлса, ана шунда Ўзбекистонда коронавирусга чалиниш «пик»ка чиқди, деб айта оламиз.
Мана, охирги ҳафта касалланиш кунига 250-270 атрофида бўлди. Яна икки ҳафта кутишимиз керак. Агар рақамлар ўзгармаса, ана шунда пик, десак бўлади.
Карантин чораларини яна кучайтирсак, яна касалланиш ҳолатлари кунига 40-50 тага тушади. Лекин, бу вақтинча. Карантиндан чиққач, яна касалланиш кўпаяди".
Айрим коронавирус беморлари ўз уйида даволаниши мумкин
5 июлдан бошлаб коронавирусга чалинган беморларни даволашнинг янги тартиби амалга кирган.
Эндиликда, касаллик аломатларсиз кечаётган, аҳволи енгил бўлган беморлар шифокор тавсиялари асосида ҳамда санитария-гигиена ва парвариш учун талаб этилган шароитлар мавжуд ҳолларда уй шароитида даволаниши мумкин.
Бундан ташқари шифохоналарда ва уй шароитида даволанаётган касаллик аломатларисиз кечаётган енгил шаклдаги беморлар 10 кун муддатда клиник белгилари кузатилмаган тақдирда назоратдан чиқариш амалиёти ҳам жорий этилади.
Республика махсус комиссиясининг 30 июндаги қарорига кўра, коронавирусга чалинган беморлар 3 тоифага (касаллик аломатларсиз ўтаётган беморлар, тана ҳарорати кўтарилаётган беморлар ва коронавирус инфекцияси оғир кечаётган беморлар) ажратилган эди.
Деярли 17 минг корхона карантинда фаолиятини тўхтатган
Иқтисодий тараққиёт ва камбағилликни қисқартириш вазирлиги тарқатган маълумотларга кўра, карантин чоралари амалда бўлиши даврида республика бўйлаб 16,670 саноат корхонаси ўз фаолиятини вақтинча тўхтатишга мажбур бўлган.
Уларнинг катта қисми қурилиш материаллари ишлаб чиқариш ҳамда озиқ-овқат ва тўқимачилик саноатида фаолият юритувчи корхоналардир.
Корхоналарнинг аксарияти ишчиларга карантин талаблари, маҳсулотга талаб йўқлиги ва хомашё етишмаслиги туфайли фаолиятини вақтинча тўхтатган.
Вазирликка кўра, 1 июлга қадар корхоналарнинг 16,657 таси (99 фоиздан зиёд) ўз фаолиятини қайта тиклаган, карантин даврида ишдан вақтинча озод этилган 137,84 минг ишчи-ходимнинг 137,5 минг нафари ўз иш жойига қайтган.
Сурат манбаси, Davyergeodezkadastr
Мозорларнинг интерактив харитаси тузилади
Давлат кадастрлари, геодезия ва картография миллий маркази, Дин ишлари қўмитаси билан ҳамкорликда республика ҳудудида жойлашган мозорларнинг электрон интерактив харитаси шакллантирилмоқда.
Махсус илова орқали электрон харитада қуйидагилар акс этади:
• қабрнинг жойлашган жойи;
• унга тегишли бўлган маълумотлар;
• шажара тўғрисидаги маълумотлар.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
