Ўзбекистон: Карантин кучайтирилмоқда - 1 июлдан нима ўзгаради?
Сурат манбаси, Yangiyer shahar hokimligi
Республика махсус комиссияси 1 июлдан бошлаб карантин чора-тадбирларини янада кучайтириш тўғрисида қарор қабул қилди.
Эндиликда:
- қизил" ва «сариқ» ҳудудларда соат 07:00 дан 23:00 га қадар жамоат жойларида уч кишидан ортиқ тўпланиш ҳамда 23:00 дан 07:00 га қадар кўчаларда, кўп қаватли уйлар ва ҳовлилар олдида бўлиш тақиқланади
- республиканинг барча ҳудудларида йирик буюм бозорлари ҳамда буюм савдоси билан шуғулланадиган йирик савдо мажмуалари ҳафтанинг шанба ва якшанба кунлари санитария-дезинфекция ишларини амалга ошириш учун ёпилади
- «қизил» ва «сариқ» ҳудудларда ҳафтанинг шанба ва якшанба кунларида жамоат транспорти ҳаракати камайтирилади
Белгиланган вақтдан ташқари фақатгина фуқароларнинг саломатлиги ёмонлашганлиги, ҳомиладорлиги муносабати билан шифокор кўригидан ўтиш учун даволаш муассасасига ёхуд зарур дори-дармон харид қилиш мақсадида дорихонага бориб-келишига рухсат берилади.
Бу талабларни бузган одамларга нисбатан маъмурий жазо қўллаш белгиланган.
Бундан ташқари санитария-карантин чекловларига риоя этиш устидан назорат ҳам кучайтирилмоқда.
Хусусан, сариқ" ҳудудларда соат 06:00дан - 22:00 га қадар, «қизил» ҳудудларда 07:00 дан - 10:00 гача ва 17.00 дан - 20.00 гача белгиланган вақтдан ташқари автомобилда ҳаракатланиш тақиқланмоқда.
Тўй-маросимларни 30 кишидан кўп бўлмаган ҳолда ўз уй-жойида ўтказиш, жамоат жойларида гигиена талабларига қатъий риоя этиш, фаолиятиг рухсат берилмаган тадбиркорлик билан шуғулланмаслик тартиби сақланиб қолинади.
Хавотирли вазият
30 июнь соат 10:00 ҳолатига кўра, Ўзбекистонда коронавирус инфекцияси қайд этилганлар сони 8298 (+76) нафарни ташкил этмоқда.
Шу вақтга қадар 5496 нафар бемор соғайган. 2778 бемор эса шифохоналарда қолмоқда.
Сўнгги кунларда вируснинг аҳоли орасида тарқалиши суръати сезиларли кучайиб вазият хавотирли тус олмоқда.
Соғлиқни сақлаш вазирлиги 29 июнь куни 274 та касалланиш ҳолатлари аниқланганини маълум қилган.
Ҳозиргача 24 та ўлим ҳолати қайд этилган.
Коронавирус беморлари тоифага ажратилади
Касалликнинг қандай кечаётганига қараб, коронавирус инфекциясини юқтириб олган беморлар уч тоифага ажратилади:
- коронавирус инфекциясининг енгил шакллари аниқланган (касаллик аломатларсиз ўтаётган) беморлар
- коронавирус инфекцияси ўртача оғир кечаётган (тана ҳарорати кўтарилаётган) беморлар
- коронавирус инфекцияси оғир кечаётган беморлар
Нукусда карантин чоралари кучайтирилди
Нукус 30 июндан «қизил» ҳудуд тоифасига киритилиб, шаҳарда қатъий карантин чоралари ўрнатилмоқда.
Жумладан, жамоат транспорти, буюм бозорлари, кафе-ресторанлар, сартарошхоналар, автомактаблар фаолияти тақиқланмоқда.
Коррупцияга қарши курашиш агентлиги тузилмаси тасдиқланди
Ўзбекистон Республикаси Коррупцияга қарши курашиш агентлиги фаолиятини ташкил этиш тўғрисида президент қарори қабул қилинди.
Қарорга кўра, агентлик бошқарув ходимларининг чекланган сони 50 та штат бирлиги миқдорида белгиланди.
Агентлик директори мақоми, меҳнатга ҳақ тўлаш шартлари, тиббий ва транспорт хизмати кўрсатиш шароитлари бўйича вазирга, директор ўринбосарлари эса вазир ўринбосарларига тенглаштирилади.
Агентлик директори ўринбосарлари агентлик директори тақдимномасига кўра президент томонидан лавозимга тайинланади ва лавозимдан озод этилади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
