Ўзбекистон: Журналист сиёсатга аралашгани учун мажбуран карантинда ушланяптими? - O'zbekiston
Сурат манбаси, courtesy
"Ҳақиқат ва тараққиёт"социал-демократик партиясини тузишга ҳаракат қилаётган ташаббускорлардан бири Бахтиёр Карим сиёсий мақсадларда карантинда ушлаб турилганини даъво қилмоқда. У карантин давомида касаллик юқтиришидан хавотирга тушмоқда.
«Адабиёт» газетаси бош муҳаррири, 61 ёшли Бахтиёр Карим карантинга олинганига 25 кун бўлган бўлса-да уйига жавоб берилмаган.
Унинг Би-би-сига айтишича, ўғлининг ишхонасидан коронавирус чиққанидан сўнг 6 июнь куни уларни оилавий равишда карантин ҳудудига олиб кетишган.
"Сан эпидем станция ходимлари уйга келишиб, уйимизда 5 ойлик чақалоқ неварамиз борлигини кўришди. СEС ходимлари 5 ойлик чақалоқ билан карантин ҳудудида қийналиб қоласизлар, сизларни уй шароитида ҳам карантин қилиш мумкин, деган хулосага келишди. Лекин шу пайти бизни олиб кетишга келган Миллий гвардия аскарлари бошлиқлари билан гаплашиб СEС уларни қолдирмоқчи деганди, «йўқ, ҳеч қандай қолдирилмайди, дарров олиб кетинглар», деган маънода буйруқ беришди", дейди Бахтиёр Карим.
Ўртасаройдаги карантин ҳудудига ўрнатилган контейнерларда оиласи билан яшаган Бахтиёр Карим юраги безовта қилганидан шикоят қилади.
Журналистнинг айтишича, уни юрагини махсус жиҳозларда текширамиз деб карантин тугашига 3 кун қолганида Тошкентдаги вақтинча Covid-19 карантин ҳудудига айлантирилган Тери-таносил касалликлари диспансерига олиб кетишади. Бироқ журналистнинг айтишича, у ерда ҳам бу ускуналар йўқ бўлган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Бахтиёр Карим уни карантинда кўпроқ ушлаш учун бошқа ҳудудга олиб келишгани ва бунинг ортида куч ишлатар тизимлар турганини иддао қилмоқда.
«СEС ходимлари бизга шивирлаб, бу ерда куч ишлатар тизимларнинг роли кучайиб кетяпти, кимнинг қаерда ётишини улар ҳал қиляпти», деган гапни айтишди. Бунинг яққол мисоли бизнинг тақдиримиз бўлди. Бизни уйда карантин қилиши мумкин бўлган ҳолда, Ўртасаройдаги энг жазирама жойга олиб кетишди, у ерда икки кун қолганида бу ерга ёлғон-яшиқ гаплар билан олиб келишди. Бу ерда ҳам ҳеч қадай муолажа йўқ, ЭКГ аппаратлари йўқ, лекин янгитдан карантин муддатлари бошланган".
Бахтиёр Каримнинг таъкидлашича, у беш марта коронавирусни аниқлаш учун тест топширган бироқ ҳаммаси манфий чиққан. Журналистнинг қўлига тушган ёзишмаларда уни уйига жавоб бериш ҳақида мактублар ҳам бор. Бироқ уни коронавирус аниқланган шахс билан алоқа қилди, деб яна карантин муддатини чўзишган.
У карантинда белгиланганидан ортиқроқ ушлаб турилганини сиёсий фаолияти билан боғлайди.
Янги «Ҳақиқат ва тараққиёт» социал-демократик партияси тузиш ташаббускорларидан бири, иқтисодчи олим Хидирназар Аллақулов Бош прокурор ва Президент Шавкат Мирзиёевга мурожаат қилиб Бахтиёр Каримни карантинда ушлаб туриш сабаби унинг сиёсий фаолияти билан боғлиқлигини айтиб, зудлик билан қўйиб юборишларини ва айбдорлар жавобгарликка тортилишини сўраган.
«23 июнь куни Бахтиёр Каримнинг 3 нафар оила аъзолари Транспорт вазирлиги томонидан уйига етказилган. Лекин 24 июнга келиб, бу вазирлик ва бошқармалар ўртасида янгидан ёзишмалар бўлиб, 24 июнь куни Бахтиёр Каримга нисбатан карантин яна 14 кунга узайтирилиши маълум қилинган. Бунга асос қилиб гўёки Бахтиёр Карим коронавирусга чалинган беморлар билан мулоқотда бўлганлиги келтирилган. Мантиқан, бу карантин бўлса коронавирусга чалинган ва соғлом шахслар бир жойда ушлаб турилмайди-ку ахир. Бу карантиннинг қатъий ва бош қоидаси-ку», дейди Хидирназар Аллақулов.
Бахтиёр Карим янги ташкил қилинаётган партияда координатор эканлигини айтмоқда. Ташкилий масалаларда партия билан боғлиқ аксар сўзлашмаларни у олиб боради.
Соғлиқни сақлаш вазирлигидан ушбу ҳолат бўйича изоҳ олишнинг имкони бўлмади.
Бахтиёр Карим эса карантин ҳудудида коронавирус юқтиришдан хавотирда эканлигини айтмоқда.
«Бу ерга соғ ҳолатда келиб, касал бўлиб кетиш хавфи бор. Чунки кечагина бу ерда гумон қилиниб олиб келган беморларнинг ичида биттасида касаллик аниқланиб, уни вирусологияга олиб кетишди. Демак, бу ерда касалликдан ҳимоя қилишдан кўра, уни юқтириб олиш хавфи юқори бўлиб турибди», дейди у.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
