Ўзбекистон, коронавирус: Беморларга сарфланаётган миллионлар ва Туркия Ўзбекистонга қандай ёрдам юборди? O'zbekiston
24 апрель соат 10:00 ҳолатига кўра Ўзбекистонда коронавирус юқтириб олганлар 1778 нафарни ташкил этган.
Шу кунга қадар деярли 600 киши касалликдан соғайган, 7 киши вафот этган.
Akfa 3000 оилани оталиғига олади
Тошкент шаҳар ҳокими Жаҳонгир Ортиқхўжаев асос солган Akfa компаниялар гуруҳига кирувчи Artel, Crafers, Mediapark компаниялари келгуси 3 ойда давомида 3000 кам таъминланган оилани қарамоғига олишга қарор қилган.
Бу билан компаниялар 9 миллиард сўмлик беғараз ҳомийлик қилиши маълум этилган.
Тошкент шаҳар ҳокимлиги хабарида бу ишлар президент ташаббуси билан ташкил этилган «Саховат ва кўмак» умумхалқ ҳаракати доирасида олиб борилиши айтилади.
«Давлат ўз вазифасини тадбиркорлар елкасига илмоқчи эмас»
Иқтисодий тараққиёт ва камбағалликни қисқартириш вазири Жамшид Қўчқоров «Саховат ва кўмак» умумхалқ ҳаракатига нисбатан юзага келган фикрларга ана шундай жавоб берган.
Вазирнинг таъкидлашича, давлат муҳтож одамларга ёрдам қўлини чўзган тадбиркорларнинг барча харажатини қоплаб беради.
«Бу қандай бўлади, деган саволга шу суммага фойдага тортиш солиқ базаси камайтирилади ёки уни маҳаллий солиқлардан бўлган тўловлари - келгуси тўловларими, мисол бу ер-мулк ва ҳоказо солиқлар... Маҳаллий кенгашда ҳуқуқ бор, шуни 6 ойга чўзиб беришлари мумкин. Ёки банкка мурожаат қиладиган бўлса, банкда кредитларини узайтириш мумкин. Ёки керак бўлса, шу ташкилот 3-сменада ишлаяпмиз, кечасига электрни арзонлаштириб беринг деса, электр энергиясини 50 фоизгача арзонлаштириб берамиз», изоҳлаган Қўчқоров.
Президент Мирзиёев 20 апрель куни ўтган видеоселекторда «Саховат ва кўмак» умумхалқ ҳаракатини йўлга қўйишни таклиф этиб, унинг доирасида аҳолининг муҳтож қатламини қўллаб-қувватлаган тадбиркорларга давлат томонидан турли имтиёзлар берилишини маълум қилган эди.
Беморларга сарфланган миллионлар
Сурат манбаси, kun.uz
Соғлиқни сақлаш вазири Алишер Шодмонов коронавирусга чалинган беморлар давлат бюджетидан қанча харж қилинаётгани ва шу билан боғлиқ бошқа сарф-харажатларни очиқлаган.
Вазир берган маълумотлардан аён бўлишича, коронавирус инфекциясига чалиниб даволанаётган ўрта аҳволдаги ҳар бир бемор учун 32 миллион сўм, жонлантириш бўлимига ётқизилган оғир аҳволдаги ҳар бир бемор учун ўртача 64 миллион сўм сарфланмоқда.
Бундан ташқари, карантинда бўлиб турган фуқароларнинг ҳар бири учун 14 кунлик карантин давомида 2,4 миллион сўм, коронавирусдан тузалиб, реабилитацияга олинган ҳар бир бемор учун 2,8 миллион сўмдан сарфланмоқда.
Шодмонов Ўзбекистонда илк бор 15 мартда қайд этилган коронавирус эпидемиясига тайёргарлик 2 ой аввал бошланганини ҳам қўшимча қилган.
Бироқ вазир Шодмонов тилга олга сарф-харажатларни кўплаб ижтимоий тармоқ фойдаланувчилари шубҳа остига олган.
Туркия Ўзбекистонга ёрдам жўнатди
Сурат манбаси, dunyo, O'zbekiston TIV
Тошкентга Туркиядан жўнатилган 50 мингта тиббий ниқоб, 200 мингта комбинезон ва 200 мингта юз ҳимоя воситаларидан иборат ёрдам етиб келган.
Коронавирус эпидемиясига қарши кураш йўлидаги бу ёрдам туркиялик тадбиркорлар томонидан тақдим этилгани айтилади.
Пандемия оқибатларига қарши $3 миллиард
Президент имзолаган янги қарорда коронавирус пандемияси оқибатларини юмшатиш йўлида хорижий кредитларни жалб қилиш ҳақида сўз боради.
Ҳужжатга кўра, президент $3,1 миллиардга тенг грантлар ва имтиёзли узоқ муддатли кредитларни жалб қилишга кўрсатма берган.
Ўзбекистон юзланмоқчи бўлган молиявий институтлар рўйхатида Жаҳон Банки, Осиё Тараққиёт Банки, Ислом Тараққиёт Банки, Европа Тикланиш ва Тараққиёт Банки ҳамда Осиё Инфратузилма Инвестициялар Банкини кўриш мумкин.
Президент Мирзиёев март ойида ҳам коронавирус эпидемияси оқибатларини бартараф этиш учун 10 триллион сўм ($1 миллиарддан кўпроқ) капиталга эга Инқирозга қарши курашиш жамғармаси ташкил этишга кўрсатма берган эди.
Британияда вакцина синови
Икки нафар кўнгиллик шахс Европада илк бор коронавирусга қарши вакцина синовида эмланган.
Айни синов лойиҳа учун 800 дан ортиқ киши ёлланган.
Уларнинг ярми Covid-19 вакцинасини олишади, қолган ярмига эса менингитга қарши эмдори берилади.
Jenner Institute профессори Сараҳ Гилберт вакцина ижобий натижа беришига умид қилаётганини айтади.
Вакцина уч ой ичида Оксфорд университети олимлари томонидан ишлаб чиқилган эди.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
