Ўзбекистон, #mengaishbering: Мардикорчиликдан куйиб, энди доимий иш қидиряпман – сурхондарёлик йигит
Дунёнинг қатор илғор давлатларида коронавирус туфайли ишсизлар сони кескин ортиб бормоқда. Ривожланаётган давлатлар, хусусан Ўзбекистонда шундоқ ҳам ишсизлик даражаси юқори ва вирус туфайли мутахассисларга кўра, яна ўн минглаб ўзбекистонликлар иш ўринларидан ажралишлари мумкин. Би-би-си Ўзбек хизмати #mengaishbering лойиҳасини коронавирус пандемиясидан аввалроқ бошлаган эди. Сурхондарёлик Шодибек 16 ёшидан бери ёлланма меҳнат билан кун кечиришини айтар экан, мардикорчиликдан чарчаганини айтади. Бир неча бор алданиб қолганидан шикоят қилади. 23 ёшли Шодибек Қурбонов бир фарзанднинг отаси ва 16 ёши Тошкентга иш қидириб келган. Орада Россияга ҳам бориб ишлаб келган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
"Аввалига, цехларда ишлаганман, лекин уларнинг ойлиги жуда кам эди", хотирлайди у.
"Озроқ кунбай ишлар билан кун ўтказиб, 18 ёшимда Россияга ишлашга кетдим".
Шодибек Россияда қурилишда ишлагани, маоши ҳам яхши бўлганини айтади.
"Россияга кетганингиздан кейин икки-уч йилсиз келолмайсиз. Ватанни, оилани соғинасиз", дейди Шодибек.
У 2018-йилнинг ноябр ойида Ўзбекистонга қайтиб келгани ва яна доимий иш топа олмай, Тошкент шаҳрида кунбай ишларга яна ёллана бошлаганини билдиради.
"Ишлатиб, пулимни беришмади"
2019-йилнинг кузида эса Шодибекнинг кўнглини мардикорчиликдан батамом совутиб юборган воқеа содир бўлади.
У ва яна уч йигитни қурилишда икки ҳафта ишлатиб, келишилган ҳақни беришмайди.
"Ўтган сентябрда Ғазалкент тумани, Чимён қишлоғида ишладик. Саккиз миллионга договор қилгандик, етти миллионини ҳали ҳам ололмай юрибмиз", ҳикоя қилади Шодибек.
Йигит келишувни бажармаган қурилиш эгалари устидан қатор тегишли жойларга арз қилгани, аммо уни ҳеч ким эшитмаётганидан шикоят қилади.
"Оддий халқ дардига қулоқ солишсин", дейди у.
Шу воқеадан сўнг яна меҳнатига куйиб қолишдан қўрққан Шодибек доимий иш топиш масаласида жиддийроқ ўйлай бошлаган.
Шодибек беқарор ҳаёт ташвишлари туфайли ўқий олмагани, бирор касбнинг бошидан тутолмаганини айтади.
"Лекин қўлимдан қурилишда ёрдамчилик қилиш, кафел териш, бўёқчилик, дурадгорлик келади. Агар кимдир мени шогирдликка, ёрдамчиликка олса, уни ишончини албатта оқлайман".
"Менга доимий иш беринг", сўзлайди Шодибек.
Айни вақтда, Шодибек адолатсизликка учраган фуқароларга кўмаклашмаётган давлат органлари, авж олган ишсизлик, паст маошлар туфайли яна хорижга чиқиб кетиш ҳақида бош қотираётганини билдиради.
"Агар пулимни ололмасам, яқин орада доимий иш тополмасам, Наврўздан кейин яна Россияга кетишга ҳаракат қиламан".
"Аммо шу ердан иш топилса яхши эди. Ўз жойингга етмайди барибир", қўшимча қилади у.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
