Депутат сайёҳларга тунги Тошкентни деразадан томоша қилишни маслаҳат берди

Газета.уз мухбири Никита Макаренконинг чиқишига давлатга тегишли сайтлар ва ижтимоий тармоқдаги айрим тоифалар кескин қаршилик кўрсатмоқда. Одамларнинг тунда кўчага чиқишини оқламаётган муаллифлардан бири, пойтахт меҳмонхоналарининг деразаларидан Тошкентнинг тунги манзаралари яна-да чиройлироқ кўринишини айтган.

Макаренкога қарши ёзилган мақолаларда кимдир Тошкентда тунги ҳаёт чекланмаган, деса яна бошқаси туристларга тунда кўчага чиқмасдан Тошкентни меҳмонхона деразасидан томоша қилишни таклиф қилган.

Биргина ЎзАда бир куннинг ичида журналист Никита Макаренкога қарши 4 та мақола чиқди. Муаллифлар журналистни танқид қилишга шу даражада киришиб кетганки, ўзлари билмаган ҳолда бир-бирига қарши фактларни келтирган.

Шарофиддин Тўлагановнинг ЎзАда чиққан мақоласида "Ҳурматли Никита Макаренко, сиз бир марта бўлса-да, Тошкентдаги дам олиш хиёбонларига борганмисиз ўзи? Умуман, тунги Тошкентни кўрганмисиз? Фавворалар атрофида тун ярмигача юрган тошкентликлар ва шаҳримиз меҳмонлари чеҳрасидаги қувончга кўзингиз тушганми?", деган фикрига ЎзАда ўша куни чиққан яна бир мақолада қарши фикрни кўрасиз.

Халқ депутатлари Тошкент шаҳар кенгашидан депутат Юнус Каримов Шарофиддин Тўлаганов билан бир позиция туриб, Макаренкога қарши фикр билдирган бўлса-да, тунги Тошкент борасида ҳамфикрининг гапларини инкор қилади.

"Сиз ҳам қайсидир давлатга борсангиз, тунги ўндан кейин кўчада юрмайсиз. Ахир сиз ўз Ватанингизда эмассиз. Қолаверса, пойтахтимиздаги меҳмонхоналарнинг деразаларидан Тошкентнинг тунги манзаралари яна-да чиройлироқ кўринади. Бу туристлар учун янада қулай", дейди Тошкентни дераза орқали томоша қилишни тавсия қилган депутат.

ЎзАнинг Фарғонадан ёзган яна бир мухбири М. Сулаймонов Макаренконинг "Тошкент жуда зерикарли шаҳар", деган жумласига ўзи яшаб турган шаҳар мисолида жавоб беришга ҳаракат қилган.

У жамоатчиликнинг эътирози сабаб бўлган, шаҳардаги азим чинорларнинг кесилишини кўчаларнинг ойдинлашуви деб изоҳлайди.

"Илгари тор йўлакларда чинор барги хазонларини кўришга кўникиб кетган кўзлар бугун яратувчиликнинг ёруғ изларидан яйрамоқда", дейди ЎзА мухбири.

Газета.уз мухбирига эътироз билдирган депутат Юнус Каримов тунги клубларни маънавиятсизлик бошланиши деб таърифлайди.

"Муаллиф оқлаётган «тунги ҳаёт» асл маънавиятсизликнинг бошланиши эмасми? Бу каби қарорда сайёҳларнинг Ўзбекистонга келишини чеклайдиган ҳеч қандай тўсиқ йўқ", дейди депутат Юнус Каримов.

ЎзАнинг яна бир мухбири Шоҳрух Нўъмонов ҳамкасби Никита Макаренконинг сўз эркинлигини чеклашга ҳаракат қилади. У Тошкентни сармоядорлар учун зерикарли, деб айтишга ҳуқуқингиз йўқ дейди.

"Аммо ҳеч қачон нафақат Ўзбекистон, балки дунё бешиги саналадиган азим Тошкентни сайёҳлар, инвесторлар учун зерикарли, дейишга ҳақингиз ҳам, ҳуқуқингиз ҳам йўқ!", дейди Шоҳрух Нўъмонов.

ЎзА мухбири журналистнинг фикр билдириши қайси қонун-қоида асосида чекланганлигини очиқламаган.

Қалампир.узда педогогика фанлари доктори Муҳаммаджон Қуронов томонидан ёзилган мақолада Никита Макаренко "тунги клуб қотилларининг омбудсмени", дея таърифланади.

Аслида Никита Макаренко ўз мақоласида курашчи Жамшид Кенжаевнинг қотилларини оқламаган. Балки қотиллик ортидан киритилган тушунарсиз чекловларга норозилик билдирган.

Никита Макаренокга эътироз билдирган ва уни айблаганларнинг бирортаси ҳам Тошкентда тунги клублар ўз фаолиятини давом эттираётганига эътибор қаратмаган.

Кузатувчиларга кўра, эътиборли жиҳати шуки, ҳукумат тунги клуб, кафе ва ресторанларнинг фаолиятини бутунлай тақиқламоқчи эмасга ўхшайди. Балки бу эркинликни пулга сотишни йўлга қўйиши мумкин.

Президентнинг «Тошкент шаҳрида бошқарувнинг алоҳида тартибини жорий этиш бўйича ҳуқуқий эксперимент тўғрисида»ги фармони иловасида айтилишича, дўкон ва ресторанлар алоҳида рухсатнома билан соат 23:00дан кейин ҳам ишлаши мумкин бўлади.

Рухсатнома алоҳида бир ойлик тўлов эвазига берилиши мумкин.

Кун.уз томонидан келтирилган бу хабарда тунги клублар фаолияти ҳам пуллик рухсатнома эвазига фаолият кўрсатиш мумкинлиги ажратиб кўрсатилмаган.

BBCUZBEK.COM билан Telegram орқали +44 7858860002 номери билан боғланинг.Telegram каналимиз: @bbcuzbek