Ер юзида қадам ташлаган энг улкан динозавр суяги топилди
Аргентинадаги чўлда тасодифан топилган динозавр суяклари қолдиқларидан хулоса чиқараётган археологларга кўра, бу шу пайтгача топилган, Ер юзида қачонлардир яшаган энг улкан жонзот қолдиқларидир.
Суякларга Аргентинанинг ҳозирга келиб саҳрога айланган, бироқ бундан 95-100 миллион йил олдин қалин ўрмонлар бўлган деб кўриладиган Патагонияда яшайдиган маҳаллий фермер дуч келиб қолган.
Сурат манбаси, NA
Аргентиналик палеонтолог олимлар тошга айланган суякларга қараб, бу жойда еттита динозавр қолдиғини топганларини айтмоқдалар.
Олимларга кўра, бу ўтхўр титанозаврлар турига кирадиган динозаврлар бўр даврининг охирларида яшаганлар.
Олимлар жониворнинг оёғининг бир сони суягига қараб, унинг умумий узунлиги 40 метргача етган, бўйи эса 20 метр баланд бўлган, деб ҳисобламоқдалар.
Сурат манбаси, AP
Бўйи ҳозирги кундаги етти қавватлик бинодай баландликда бўлган бу динозаврнинг оғирлиги 77 тоннани ташкил этган, деб тахмин қилинмоқда.
Янги динозаврга ҳали ном берилгани йўқ.
Бу динозавр шу пайтгача дунёдаги энг улкан динозавр деб кўриб келинган "Аргентинозавр"нинг "қариндоши" деб айтилмоқда.
Унга ном беришда, қанчалар улкан экани, у топилган жой ва уни топган фермер ҳам ҳисобга олинади, дейилаяпти.
