22 яшар Тайлер Робинсон Чарли Киркни ўлдирганликда гумон қилинмоқда
Сурат манбаси, FBI
Сурат манбаси, RASMIY
22 яшар Тайлер Робинсон АҚШлик фаол Чарли Киркни отиб ўлдиришда гумондор сифатида эълон қилинди.
Президент Доналд Трамп фаол Чарли Киркни ўлдиришда гумондор ушланганини маълум қилди. Олдинроқ президент қотил ўлим жазоси олиши кераклигини айтганди.
"Менимча, катта эҳтимол билан биз уни ушладик", деди у Fox & Friends дастурига берган интервюсида.
Трампнинг айтишича, уни гумондорнинг жуда яқин одами тутиб берган. У гумондорнинг отасига чиққан, кейин у ҳуқуқ тартибот идорасига мурожаат қилган.
"Отаси боласини кўндирган", деган Трамп.
АҚШ президенти гумондор тез орада суд қилиниши ва ўлим жазосига ҳукм қилинишига умид билдирган.
11 сентябр: Чарли Кирк: Трамп иттифоқчисининг ўлдирилиши Американинг қонли ва "синган" сиёсатини очиб ташлади
Сурат манбаси, Reuters
Ҳамма нарсани ўзгартириб юборган ўқ овози янграшидан бир неча дақиқа олдин, Юта штатидаги гўзал коллеж кампусига консерватив сиёсат оламида "рок юлдузи" ҳисобланган инсонни тинглаш учун минглаб талабалар йиғилган эди. Энтони Зурчер мақоласи:
Чарли Кирк ким эди?
31 ёшли Чарли Кирк чодир остида ўтириб, микрофонда ўз навбатини кутаётган сиёсий мухолифлари билан баҳслашар экан, майдонга тўпланган кўпчилик уни олқишлади, баъзилар эса норозилик билдирди. Бир неча сония ўтиб, ҳамма даҳшат ичида қочиб кета бошлади.
Фаолнинг бўйнига теккан ўқ уни ўлимга маҳкум этди. Камералар ёниқ ҳолатда эди, баъзилари қотилликни қонли тафсилотлари билан кўрсатди. Бу лавҳаларни унутиш қийин бўлади, айниқса Киркни машҳур шахс деб билган кўплаб ёш консерваторлар учун.
Унинг ўлими сабаби нима бўлишидан қатъи назар, ҳаракат етакчиси эндиликда ўз ғояси учун шаҳид сифатида қабул қилинади.
Кирк ўтмишда ўзининг кескин консерватизм услуби туфайли танқидчилари томонидан зўравонлик таҳдиди остида эканлигини айтганди. Шунга қарамай, у сиёсат кўпинча сўл қанотга мойил бўлган коллеж кампусларига боришга ва барча рақиблари билан баҳслашишга тайёр эди.
У қурол олиб юриш ҳуқуқи ва консерватив қадриятлар ҳимоячиси, трансгендер ҳуқуқларининг очиқ танқидчиси ва Доналд Трампнинг содиқ тарафдори эди. У асос солган "Turning Point US" ташкилоти шу йилда президентнинг Оқ уйга қайтишига сабаб бўлган сайловчилар иштирокини ошириш кампаниясида муҳим рол ўйнади.
У ўққа тутилган чодир устида "менинг ноҳақ эканлигимни исботла" ёзуви бор эди. У, айниқса, ёш консерватор талабалар учун қаҳрамон бўлиб, улар билан учрашиб, уларга ўз ҳаракатларини таклиф қилди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Чарли Киркнинг ўлими ва сиёсий зўравонлик занжири
Киркнинг ўлдирилиши Америкадаги даҳшатли қуролли зўравонликнинг навбатдаги эпизоди ва яқинда содир бўлган сиёсий зўравонликларнинг узун занжирини давом эттиради.
Шу йил бошида Миннесотада Демократик партиядан бўлган икки штат қонун чиқарувчиси ўз уйларида отиб кетилди. Улардан бири олган жароҳатларидан вафот этди.
Ўтган йили Доналд Трамп икки марта суиқасдга учради. Пенсилвания штатининг Батлер шаҳрида очиқ митингда унга қарата ўқ отилгани, чоршанба куни Ютада юз берган ҳодисага жуда ўхшайди. Иккаласи ҳам очиқ жойда, кўпчилик олдида содир бўлган.
Бундан икки йил олдин, ўша пайтдаги Вакиллар палатаси спикери, таниқли демократ Нэнси Пелосининг уйига болға тутган босқинчи бостириб кирганди. 2017 йилда эса бир киши Виржиния штати шимолидаги бейсбол майдонида машғулот ўтказаётган республикачи конгрессменларга қарата ўт очган.
Америка сиёсати бундан кейин қаерга боришини айтиш қийин, аммо йўналиш аянчли.
Зўравонлик зўравонликни келтириб чиқаради. Ижтимоий тармоқлар ва қуролга осон кириш имконияти билан кучайтирилган бўлувчилик риторикаси асабларни таранглаштириб, қон тўкиш хавфини оширади.
Консерватив фаоллар, худди Миннесотадаги отишмалардан кейин маҳаллий сиёсатчилар каби, энди оммавий тадбирларда хавфсизликни қандай таъминлаш кераклигини қайта кўриб чиқмоқда.
Батулерда Трампнинг ҳаётига қилинган суиқасд, воқеа жойида малакали маҳаллий ва федерал хавфсизлик хизматлари бўлишига қарамай, деярли муваффақиятли бўлганди.
Агар ҳеч ким ўзини хавфсиз ҳис қилмаса – жамоат ҳаётининг ўзи қонли спортга айлангандек туюлса – бу Америка сиёсатига ўз ҳалокатли таъсирини кўрсатади.
Америка келажаги ҳақида хавотирлар
250 йил ўтиб, аҳволимиз шу бўлдими?
Трамп чоршанба куни кечаси "Truth Social" сайтида жойлаштирган видеомурожаатида Киркнинг ўлдирилишини "Америка учун қоронғу лаҳза" деб атади.
Аммо у Киркнинг ўлдирилишида "радикал сўл"ни айблашга шошилди. У яқинда содир бўлган сиёсий зўравонлик ҳодисаларидан баъзиларини — консерваторларга қарши қаратилганларини санаб ўтди ва унинг маъмурияти "бу ваҳшийликка ва бошқа сиёсий зўравонликларга ҳисса қўшганларнинг ҳар бирини" топишини айтди.
Бу шарҳлар, шубҳасиз, отишмадан кейинги соатларда сўл қанот гуруҳларига қарши чора кўришга чақирган ўнг томондагилар томонидан ижобий қабул қилинади.
"Қонун доирасида, бу тартибсизлик учун масъул бўлганларнинг барчасини тинтув қилиш, фаолиятини бузиш, ҳибсга олиш ва қамаш вақти келди", деб ёзди консерватив фаол Кристофер Руфо Х ижтимоий тармоғида.
Кўплаб таниқли республикачи ва демократлар, жумладан, 2028 йилги президентликка номзод бўлиши мумкин бўлганлар ҳам сиёсий зўравонликни қоралаш ва кескин риторикани юмшатишга чақирди.
Аммо чоршанба оқшомида Конгрессда Кирк хотирасига бир дақиқалик сукут сақлангандан сўнг дарҳол қонун чиқарувчилар ўртасида бақир-чақир бошланди, бу эса партиявий кескинликларнинг ҳали ҳам юқори эканлигини кўрсатади.
Кўпинча кескин сиёсий баҳслар ва иккига бўлинишга қарши чиқиб келган губернатор Спенсер Кокс матбуот анжуманида ҳиссий нутқ сўзлаб, ўз ташкил топганининг юбилейини нишонлаш арафасида турган мамлакатнинг "синган"лигини таърифлади.
"250 йил ўтиб, аҳволимиз шу бўлдими?" деб сўради у. "Умид қиламанки, бундай эмас", деб жавоб берди.
Унинг овозидаги шубҳа оддий ҳақиқатни кўрсатдики, бугунги кунда Американинг келажаги ва унинг зўравон сиёсати тузатилиши мумкинми ёки йўқми, ноаниқ бўлиб қолмоқда.
