متاثرہ علاقوں میں اکثر لوگوں نے جمعرات سے کچھ نہیں کھایا

متاثرہ علاقوں میں امداد پہنچانے اور لاشیں نکالنے کا کام ابھی جاری ہے تاہم امدادی کام کرنے والوں کو متاثرہ علاقوں تک رسائی میں شدید دشواری کا سامنا ہے۔

طوفان سے ہلاکتیں، تباہی

1500 افراد ہلاک، امدادی کام جاری

متاثرہ علاقوں میں امداد کارروائیوں میں مصروف بین الاقوامی رضاکار ادارے ہلالِ احمر کے ایک عہدیدار رندہیر کمار داس کا کہنا ہے کہ نقل و حمل کے غیر موثر نظام کی وجہ سے انہیں امدادی کارروائیوں میں مشکلات پیش آ رہی ہیں۔

حکام کا کہنا ہے کہ ہیلی کاپٹروں اور کشتیوں کے ذریعے متاثرہ علاقوں تک پہنچنے کی ہی ممکن کوشش کی جا رہی ہے۔

بین الاقوامی ہلالِ احمر اور بنگلہ دیشی ریڈ کریسنٹ سوسائٹی پہلے دن سے ہی متاثرہ لوگوں کی مدد کے لیے مل کر کام کر رہے ہیں۔ تاہم متاثرہ علاقوں میں لوگوں کا کہنا ہے کہ انہوں اس دن سے کچھ نہیں کھایا جس روز طوفان آیا تھا۔

’سدر‘ نامی اس طوفان سے سب سے زیادہ نقصان بنگلہ دیش کے جنوبی ساحل پر ہوا ہے۔ اندازوں کے مطابق دسیوں ہزار گھروں کو نقصان پہنچا ہے اور فصلیں بھی تباہ ہوگئی ہیں۔ ٹیلی فون کے تاروں کے کٹ جانے اور سڑکوں پر پڑے ملبے کی وجہ سے راستے بند ہو گئے ہیں جس کے باعث متاثرہ علاقوں تک پہنچنے میں دشواریوں کا سامنا ہے۔

	متاثرین کی تعداد لاکھوں میں ہوسکتی ہے

فوجی ہیلی کاپٹروں اور جہازوں نے سنیچر کو امدادی کاموں میں حصہ لیا اور بعض دور دراز علاقوں میں امدادی اشیاء اور ادویات پہنچائیں۔ فوجی جہازوں نے بعض سمندری گزرگاہوں کو صاف کرنے کا کام بھی سر انجام دیا جو سمندری طوفان کے باعث کشتیاں ڈوبنے سے بند ہو گئی تھیں۔ بعض علاقوں میں ہاتھیوں سے سڑکوں پر پڑے ملبے کو ہٹانے کا کام لیا گیا۔

خلیج بنگال سے اٹھنے والا سمندری طوفان جمعرات کو بنگلہ دیش کے ساحلی علاقوں سے ٹکرایا تھا اور اس کے نتیجے میں دو سو چالیس کلومیٹر فی گھنٹہ کی رفتار سے ہوائیں چلیں تاہم یہ طوفان کوئی نقصان پہنچائے بغیر دارالحکومت ڈھاکہ سے گزر گیا۔ بعد ازاں کئی گھنٹوں بعد ملک کے شمال مشرقی ساحلی علاقے میں اس کا زور ٹوٹ گیا۔

بنگلہ دیش کے جنوبی حصے میں کم و بیش ہر سال سمندری طوفان اور سیلاب آتے ہیں تاہم ملک میں گزشتہ ایک دہائی سے زائد عرصے کے دوران آنے والا ’سدر طوفان‘ انتہائی طاقتور ہے۔ 1991 میں آنے والے ایک اور سمندری طوفان میں تقریباً ڈیڑھ لاکھ افراد ہلاک ہوئے تھے۔