رویراج کو تامل باغیوں کا حامی سمجھا جاتا تھا

نامعلوم مسلح افراد کی فائرنگ میں ندراجا رویراج کے علاوہ ان کا محافظ بھی ہلاک ہوگیا۔ رویراج پر اس وقت گولی چلائی گئی جب وہ اپنے گھر سے دفتر کے لیے نکلے۔

اس ہفتے سری لنکا میں تشدد کے کئی واقعات پیش آئے ہیں۔ بدھ کے روز ملک کے مشرق میں فوج کی شیلنگ میں درجنوں شہری ہلاک ہوگئے تھے۔

جمعرات اور جمعہ کو سری لنکا کی بحری فوج اور تامل باغیوں کے درمیان سمندر میں مسلح لڑائیاں ہوئی ہیں۔ فوج نے باغیوں کی بائیس کشتیوں کو ڈبونے کا دعویٰ کیا ہے جبکہ بحریہ کے بیس فوجی لاپتہ ہیں۔

دریں اثناء انڈیا کے دورے پر آئے ہوئے امریکی اسسٹنٹ سیکرٹری رچرڈ باؤچر نے نامہ نگاروں سے بات کرتے ہوئے سری لنکا کے حالات پر ’تشویش‘ کا اظہار کیا ہے۔

ذمہ داری کسی نے قبول نہیں کی  رویراج کی ہلاکت کی ذمہ داری کسی نے بھی قبول نہیں کی ہے لیکن اس کے ساتھیوں نے حکومت کو ذمہ دار ٹھہرایا ہے۔ ٹی این اے کے رہنما آر سمپنتھن نے خبررساں ادارے رائٹرز کو بتایا کہ ’بلاشبہ یہ حکومتی فورسز یا حکومت سے منسلک لوگوں کا کام ہے۔‘

رویراج شمالی جافنا سے تعلق رکھنے والے سیاسی اتحاد تامل نیشنل الائنس (ٹی این اے) کی پارلیمان میں نمائندگی کرتے تھے۔ اس سیاسی اتحاد کو تامل باغیوں کا حامی سمجھا جاتا ہے۔

رویراج کی ہلاکت کی ذمہ داری کسی نے بھی قبول نہیں کی ہے لیکن اس کے ساتھیوں نے حکومت کو ذمہ دار ٹھہرایا ہے۔ ٹی این اے کے رہنما آر سمپنتھن نے خبررساں ادارے رائٹرز کو بتایا کہ ’بلاشبہ یہ حکومتی فورسز یا حکومت سے منسلک لوگوں کا کام ہے۔‘

رویراج نے، جو کہ جافنا کے میئر بھی رہ چکے تھے، جنگ کے متاثرین کی ایک پناہ گاہ پر فوج کی شیلنگ کے خلاف جمعرات کو ایک مظاہرے میں شرکت کی تھی۔

سری لنکا کی فوج نے پناہ گاہ میں تاملوں کی ہلاکتوں پر افسوس کا اظہار کیا تھا لیکن ساتھ ہی تامل باغیوں پر شہریوں کو انسانی ڈھال بنانے کا الزام بھی لگایا۔