عبدالحئی کاکڑ بی بی سی اردوڈاٹ کام، پشاور

کئی دن پہلے ڈسٹرکٹ آفسر ایف سی کو بھی اپنے تین ساتھیوں کے ہمراہ طالبان نے مبینہ طور پر اغواء کیا جنہیں چوبیس گھنٹے بعد رہا کردیا گیا

سولہ فروی کو ہونے والے امن معاہدے کے بعد دونوں جانب سے مستقل جنگ بندی کا اعلان تو ہوا لیکن اس دوران کئی ایسے واقعات رونماء ہوئے ہیں جس سے بظاہر یہ معلوم ہوتا ہے کہ جنگ بندی عملی نہیں بلکہ صرف زبانی ہی ہوئی ہے۔

طالبان کے سربراہ مولانا فضل اللہ نے جنگ بندی کے اعلان کے وقت اپنے مسلح ساتھیوں کو ہدایت کی تھی کہ وہ اسلحے کی نمائش، سکیورٹی فورسز پر حملے اور اہلکاروں کو اغواء نہ کریں۔

لیکن عملاً ہوا کیا؟ اگلے ہی دن مینگورہ کی نواح میں واقع طالبان کا گڑھ سمجھے جانے والے قمبر کے علاقے سے سوات کے ضلع رابطہ آفسر خوشحال خان کو طالبان نے اغواء کیا اور دو ساتھیوں کی رہائی کے بدلے میں انہیں واپس چھوڑ دیا۔

دو دن پہلے ڈسٹرکٹ آفسر ایف سی کو بھی اپنے تین ساتھیوں کے ہمراہ طالبان نے مبینہ طور پر اغوا کیا جنہیں چوبیس گھنٹے بعد رہا کردیا گیا۔ لیکن اس سے بھی بڑا واقعہ منگل کو پیش آیا جس نے فریقین کی جانب سے اعلان کردہ جنگ بندی کو غیر اعلانیہ طور پر توڑ دیا۔

سکیورٹی فورسز کا قافلہ تحصیل مٹہ رونیال کے علاقے میں بقول فوجی حکام پانی لانے جارہا تھا کہ مسلح طالبان نے اس پر حملہ کردیا جس کے بعد جھڑپ شروع ہوئی۔ اس جھڑپ میں دو سکیورٹی اہلکار ہلاک اور ایک زخمی ہوگیا ہے۔ اور منگل کو ہی مینگورہ کے قمر سے اینٹی کرپشن آفسر یامین خان کو اغواء کیا گیا جنہیں بھی بعد میں چھوڑ دیا گیا ہے۔

طالبان کا موقف ہے کہ سکیورٹی فورسز ان کے اجازت کے بغیر ان کے زیر کنٹرول علاقوں میں نقل و حرکت کرتے ہیں یعنی دوسرے لفظوں میں طالبان کی اپنی ایک ریاست ہے اور وہ اپنی ریاست کے اندر کسی دوسری ریاست کے قیام کی اجازت نہیں دے رہے ہیں۔ وہ یہ دعوی بھی کرتے ہیں کہ سکیورٹی فورسز نے وعدے کی خلاف ورزی کرتے ہوئے چیک پوسٹیں ختم نہیں کی ہیں۔

	طالبان کا موقف ہے کہ سکیورٹی فورسز ان کے اجازت کے بغیر ان کے زیر کنٹرول علاقوں میں نقل و حرکت کرتے ہیں

فوجی کاروائی کے دوران طالبان کو سوات کے جن علاقوں پر کنٹرول حاصل تھا وہاں اب بھی ان کی عملداری ہے۔ صدر مقام مینگورہ کے وسطی علاقے پر سکیورٹی فورسز کا قبضہ ہے جبکہ باقی مینگورہ کے مضافاتی علاقوں طاہر آباد، قمبر، تختہ بند، ملوک آباد میں طالبان کا گشت معمول کے مطابق جاری و ساری ہے۔ تحصیل مٹہ، کبل،خوازہ خیلہ اور چہارباغ وہ وسیع علاقے ہیں جہاں پر طالبان کا ویسا ہی کنٹرول ہے جیسے پہلے تھا۔

ان علاقوں میں اب بھی مقامی لوگوں کے مطابق طالبان لوگوں کو کوڑوں کی سزائیں دے رہے ہیں۔خود طالبان ترجمان مسلم خان نے چند دن قبل بی بی سی کو بتایا تھا کہ انہوں نے اپنے پانچ ساتھیوں کو اس بات پر سزا دی ہے کہ وہ لوگوں کے بال کاٹ رہے تھے۔ لیکن لوگوں کا کہنا ہے کہ یہ سلسلہ اب بھی جاری ہے۔

تحصیل کبل کے ٹال میں اے این پی کے مقامی رہنما ملک احمد، مانجہ کلاگئی میں خورشید خان اور الیاس خان کے بھائی کے گھروں کو نقاب پوشوں نے مکمل طور پر لوٹ لیا ہے البتہ اس بارے میں یہ تصدیق نہیں ہوسکی کہ کیا یہ کارروائیاں طالبان نے کی ہیں یا اس میں کوئی اور گروہ ملوث ہے۔

	صوبائی حکومت طالبان سےنمٹنے کے لیے صرف ایک ہی شخص مولانا صوفی محمد پر تکیہ کیے بیٹھی ہے

صوبائی حکومت طالبان سےنمٹنے کے لیے صرف ایک ہی شخص مولانا صوفی محمد پر تکیہ کیے بیٹھی ہے لیکن اب ان کے لب و لہجہ میں بھی غصہ اتر آیا ہے۔ انہوں نے حکومت کو دھمکی دی ہےاگر وہ معاہدے کی پاسداری نہیں کرتی اور سکیورٹی فورسز کی جانب سے’ طالبان کے علاقوں‘ میں نقل و حمل جاری رہتی ہے تو وہ امن معاہدے سے دستبرادر ہوجائیں گے۔

بظاہر ایسا لگ رہا ہے کہ امن معاہدے کے بعد حکومت نے دفاعی اور طالبان نے جارحانہ انداز اپنا یا ہوا ہے۔ طالبان کی کوشش ہے کہ وہ حکومت پر اتنا دباؤ ڈال دیں کہ وہ اپنے گرفتار شدہ ساتھیوں کو رہا کروائیں اور ساتھ میں حکومت کو انہیں عام معافی دینے پر بھی مجبو کر دے تاکہ اگر کل کلاں شرعی عدالتیں لگتی ہیں تو کوئی متاثرہ شخص انکی قیادت کو عدالت کے کٹہرے میں کھڑا نہیں کرسکے گا۔