آصف فاروقی بی بی سی اردوڈاٹ کام، اسلام آباد

	کسی ملک نے باضابطہ طور پر معاہدے کے بارے میں تحفظات سے آگاہ نہیں کیا: ترجمان

یہ بات دفتر خارجہ کے ترجمان عبدالباسط نے ہفتہ وار بریفنگ کے دوران کہی۔ انہوں نے کہا کہ اس حوالے سے میڈیا میں شائع ہونے والی خبریں قیاس آرائی پر مبنی ہیں۔

عبدالباسط نے سوات میں نظام عدل کے نفاد کے بارے میں بعض ممالک کی جانب سے منفی ردعمل کے حوالے سے پوچھے گئے ایک سوال کے جواب میں کہا کہ ابھی تک کسی ملک نے باضابطہ طور پر اس معاہدے کے بارے میں اپنے تحفظات سے دفتر خارجہ کو آگاہ نہیں کیا ہے۔

بعض اخبارات میں نیٹو کی جانب سے شائع ہونے والے منفی جذبات کے بارے میں ترجمان نے کہا کہ یہ خبر قیاس آرائی پر مبنی ہے۔

ترجمان نے کہا کہ شدت پسندی اور دہشت گردی کے خلاف حکومت پاکستان کا عزم شک و شبہے سے بالا ہے اور امن کے قیام کے لئے تمام طریقے استعمال کئے جار ہے ہیں۔

دفتر خارجہ کے ترجمان نے کہا کہ ایک پاکستانی وفد آئندہ چند روز میں امریکہ جائے گا جہاں وہ نئی امریکی انتظامیہ کے ساتھ خطے کے بارے میں نئی پالیسی کے تیاری کے سلسلے میں تبادلہ خیال کرے گی۔

ترجمان نے کہا کہ پاکستان کو خطے کے بارے میں نئی امریکی پالیسی سے خاصی توقعات ہیں۔