رفعت اللہ اورکزئی بی بی سی اردو ڈاٹ کام، پشاور

	صوفی محمد مینگورہ سے تحصیل مٹہ جائیں گے

مولانا صوفی محمد حکومت کی طرف سے شرعی نظام عدل کے قیام کے اعلان کے بعد سکیورٹی فورسز کے خلاف برسر پیکار طالبان سے امن بات چیت کے لیے علاقے میں پہنچے ہیں۔

مولانا صوفی محمد مینگورہ سے تحصیل مٹہ جائیں گے۔ امکان ظاہر کیا جا رہا ہے کہ تحصیل مٹہ کے کسی نامعلوم مقام پر مقامی طالبان کے سربراہ مولانا فضل اللہ سے ملاقات کریں گے۔ مولانا فضل اللہ صوفی محمد کے داماد ہیں۔

صوفی محمد: سوات جانے کا اعلان

مولانا صوفی محمد کے ساتھیوں نے ان کے گرد گھیرا ڈال رکھا اور ذرائع ابلاغ کے کسی نمائندے کو ان کے نزدیک نہیں جانے دیا جا رہا ۔ مولانا صوفی محمد تصویر بنوانے سے گریز کرتے ہیں۔
امن مارچ میں شریک کوئی شخص نعرہ نہیں لگا رہا اور نہ ہی اسلحے کی نمائش کر رہا ہے۔

مولانا صوفی محمد کی مینگورہ میں آمد کے بعد وردی میں ملبوس اہلکار کہیں نظر نہیں آتے۔

مولانا صوفی محمد کو جو افغانستان پر امریکی حملے کے وقت اپنے ہزاروں ساتھیوں کے ہمراہ افغانستان میں طالبان کی حکومت کی مدد کرنےگئے تھے، افغانستان سے واپسی پر پاکستان سرحد پر حراست میں لے لیا گیا تھا اور انہیں کئی سال تک انہیں حراست میں رکھا۔

سرحد حکومت کے سینیئر صوبائی وزیر بشیر احمد بلور نے مینگورہ کے سرکٹ ہاؤس میں پریس کانفرنس سے خطاب کرتے ہوئے اس امید کا اظہار کیا کہ مالاکنڈ ڈویژن میں شرعی نظام عدل کے نفاذ سے علاقے میں امن قائم ہو سکے گا۔

مولانا صوفی محمد کا قافلہ ضلع دیر سے شروع ہوا اور تمیرہ گرہ سے ہوتا ہوا مینگورہ پہنچا ہے۔

مولانا صوفی محمد کی مینگورہ میں آمد کے بعد شہر میں چہل پہل نظر آ رہی ہےاور تمام بازار کھلے ہوئے نظر آئے ہیں۔ لوگوں کو امید ہے کہ اس معاہدے سے مینگورہ کی رونقیں بحال ہو سکیں گی۔