رفعت اللہ اورکزئی بی بی سی اردو ڈاٹ کام پشاور

	یہ معلوم نہیں ہوسکا کہ گولا کس کی طرف سے داغا گیا تھا

سوات سے ملنے والی اطلاعات کے مطابق یہ واقعہ سنیچر کی صبح تحصیل مدئن کے علاقے میں پیش آیا جب نامعلوم حملہ آوروں کی جانب سے آنے والا ایک مارٹر گولہ ملنگ نامی شخص کے مکان پر گرا جس سے وہاں موجود چار افراد ہلاک ہوگئے۔

عینی شاہدین کا کہنا ہے کہ واقعے میں مکان کے مالک ملنگ، اس کی بیوی اور دو بیٹیاں شامل ہیں۔ تاہم یہ معلوم نہیں ہوسکا کہ گولا کس کی طرف سے داغا گیا تھا۔ مقامی لوگوں کا کہنا ہے کہ گولہ سکیورٹی فورسز کی طرف سے داغا گیا تھا تاہم دوسری طرف سوات میڈیا سنٹر نے اس واقعے سے لاعلمی کا اظہار کیا ہے۔

سوات میں پچھلے چند ماہ کے دوران سکیورٹی فورسز اور مسلح طالبان کے درمیان جھڑپوں میں سینکڑوں عام شہری مارے جاچکے ہیں۔

انسانی حقوق کی عالمی تنظیم ایمنسٹی انٹرنیشنل کی جانب سے جاری ہونے والی ایک رپورٹ میں سرکاری حکام کا حوالہ دیتے ہوئے کہا گیا ہے کہ سوات میں فوج اور طالبان کے درمیان ہونے والی کارروائیوں میں بارہ سو شہری ہلاک اور دو سے پانچ لاکھ تک بےگھر ہوچکے ہیں۔

دوسری طرف سکیورٹی فورسز کی طرف سے کئی ہفتوں کے بعد بالائی سوات کے علاقوں میں کرفیو میں نرمی کا اعلان کیا گیا ہے۔ سوات میڈیا سنٹر کے مطابق سنیچر کی صبح تحصیل مٹہ، چار باغ اور کبل میں صبح سے لے کر شام چھ بجے تک کرفیو میں نرمی دی گئی اور اس دوران مقامی لوگوں نے محفوظ مقامات کی طرف نقل مکانی کی ہے۔