دلاورخان وزیر بی بی سی اردوڈاٹ کام، پشاور

	’چارباغ کے علاقے سے لوگوں نے نقل مکانی شروع کردی ہے‘

فوج کے ترجمان کے مطابق اتوار کی کارروائی میں سولہ شدت پسند اور دو سکیورٹی اہلکار بھی مارے گئے ہیں جبکہ دو زخمی ہوئے ہیں۔ اس طرح حکام نے اڑتیس افراد کے ہلاک ہونے کی تصدیق کر دی ہے۔

سوات سے موصول ہونے والی اطلاعات کے مطابق سنیچر کی رات سکیورٹی فورسز نے چارباغ کے علاقے میں مشتبہ عسکریت پسندوں کے ٹھکانوں پر شدید گولہ باری کی۔ عینی شاہدین کا کہنا ہے کہ گولہ باری میں زیادہ تر عام شہریوں کے گھر نشانہ بنے ہیں جس میں انتیس افراد کے مارنے جانے کی اطلاعات ہیں تاہم سوات کے ایک اعلٰی سرکاری اہلکار نے ان جھڑپوں میں بیس افراد کی ہلاکت کی تصدیق کی ہے۔

ہلاک ہونے والے عام شہری بتائے جارہے ہیں جن میں خواتین اور بچے بھی شامل ہیں۔

شہری ہلاکتیں  سوات میں گزشتہ ایک سال تین ماہ سے جاری فوجی آپریشن کے دوران تقریباً بارہ سو شہری ہلاک ہوچکے ہیں رحمان ملک

حکام کے مطابق مینگورہ کے نواحی علاقے رحیم آباد سے بھی ایک پولیس سپاہی کی لاش ملی ہے جس کا سر تن سے جدا کردیاگیا ہے جبکہ کبل کے علاقے ہزارہ سے ایک نامعلوم شخص کی لاش ملی ہے۔

دوسری طرف ڈھیرئی پر سکیورٹی فورسز نے مارٹر کےگولے بھی داغے جن میں سے بعض مکانات پرگرے ہیں جس میں کسی جانی نقصان کی اطلاع نہیں ملی ہے۔ کبل میں بھی مکانات پر گولے گرنے سے کچھ لوگوں کے زخمی ہونے کی اطلاعات ہیں۔

گزشتہ پانچ دنوں کے دوران فوجی کارروائیوں میں شدت آنے کے بعد مکانات پر گولے گرنے کے نتیجے میں اب تک اسی کے قریب افراد ہلاک ہوئے ہیں تاہم سرکاری طور پر ان واقعات کی تصدیق یا تردید کرنے سے گریز کیا جارہا ہے۔

	مینگورہ کے علاوہ زیادہ تر علاقوں میں کرفیو نافذ ہے

دو دن قبل وزارت داخلہ کے مشیر رحمان ملک نے کہا تھا کہ سوات میں گزشتہ ایک سال تین ماہ سے جاری فوجی آپریشن کے دوران تقریباً بارہ سو شہری ہلاک ہوچکے ہیں۔

سوات میں دو ہفتوں سے صدر مقام مینگورہ کے علاوہ زیادہ تر علاقوں میں کرفیو نافذ ہے جبکہ مینگورہ کو بالائی سوات سے ملانے والی دونوں شاہراہوں کو دو دنوں سے ہر قسم کی آمد ورفت کے لیے بند کردیا گیا ہے۔