عبدالحئی کاکڑ بی بی سی اردوڈاٹ کام، پشاور

	مقامی لوگوں کو شکایت ہے کہ کارروائیوں میں عام آبادی کو نقصان پہنچنے کا امکان زیادہ ہے

مقامی لوگوں کا کہنا ہے کہ منگل کو صدر مقام مینگورہ کے نواح میں منگلور کے علاقے میں بعض مکانات مارٹر گولوں کا نشانہ بنے ہیں جس میں خاتون سمیت چار افراد ہلاک اور متعدد زخمی ہوگئے ہیں۔

ان کے مطابق مارٹر گولے سکیورٹی فورسز کی جانب سے داغے گئے ہیں جو اس علاقے میں مشتبہ طالبان کے خلاف کارروائی میں مصروف ہیں۔ تاہم سرکاری طور پر ان ہلاکتوں کی تصدیق نہیں ہوسکی۔ منگلور میں گزشتہ دو دنوں کے دوران مکانات پر مارٹر کے گولے گرنے سے مجموعی طور پر سات افراد ہلاک ہوگئے ہیں۔

ادھر تحصیل مٹہ میں کالج روڈ پر سکیورٹی فورسز کے قافلے پر ریموٹ کنٹرول بم حملہ ہوا ہے جس میں سوات میڈیا سینٹر کے مطابق کسی قسم کا جانی نقصان نہیں ہوا ہے البتہ عینی شاہدین کا کہنا ہے کہ اس واقعے میں تین اہلکار زخمی ہوئے ہیں۔

سکیورٹی فورسز نے منگلور، چہارباغ اور سنگوٹہ میں مشتبہ طالبان کے خلاف کارروائیاں تیز کردی ہیں مگر مقامی لوگوں کو شکایت ہے کہ ان کارروائیوں میں اکثر اوقات عام آبادی کو نقصان پہنچنے کا امکان زیادہ ہے۔

سوات کے کوزہ، برہ بانڈہ، ننگولئی اور سنگوٹہ میں کرفیو بدستور برقرار ہے جہاں پر حکام نے لوگوں کو خبردار کیا ہے کہ خلاف ورزی کرنے والوں کو دیکھ کر گولی مار دی جائے گی۔ مقامی لوگوں کا کہنا ہے کہ کرفیو کی وجہ سے نہ صرف مریضوں بلکہ کارروائیوں کے دوران زخمی ہونے والوں کو ہسپتال تک پہنچانے میں انہیں سخت مشکلات کا سامنا کرنا پڑ رہا ہے۔