عبدالحئی کاکڑ بی بی سی اردو ڈاٹ کام، پشاور

	حکومت کو اپنے ان حامی افراد کی حفاظت کرنی چاہیئے جنہیں طالبان قتل کرنا چاہتے ہیں

پاکستانی فوج کے سربراہ نے بدھ کو سوات میں جاری فوجی کارروائیوں کا جائزہ لینے کے لیے سوات کا دورہ کیا تھا جہاں پر انہوں نے کہا تھا کہ فوج حکومتی عملداری قائم کرنے کے لیے پُرعزم ہے۔

افضل خان لالہ نے بی بی سی کو بتایا کہ انہوں نے بدھ کو کانجو ایف سی کیمپ میں دو صوبائی وزراء واجد علی خان، ایوب اشاڑی اور اپنے بھتیجے ریٹائر کرنل عبدالغفور خان کے ہمراہ پاکستان فوج کے سربراہ کے ساتھ ملاقات کی۔

ان کے بقول انہوں نے آرمی چیف کو بتایا کہ سوات میں زیادہ تر لوگوں کو اب یہ یقین ہوچلا ہے کہ فوج اور طالبان ایک ہیں لہٰذا وہ اس سلسلے میں کچھ ایسے ٹھوسں اقدامات کریں کہ لوگوں کے ذہن سے یہ بات نکل جائے۔

افضل خان لالہ طالبان کے ’مطلوب افراد‘ کی فہرست میں شامل ہیں اور اس سے قبل ان پر طالبان نے پانچ حملے کیے تھے جس میں ایک میں وہ اور ان کا بھتیجا زخمی ہوگئے تھے۔ان کا کہنا ہے کہ وہ ’بھاگیں گے نہیں بلکہ طالبان کا ڈٹ کر مقابلہ کریں گے‘۔

انہوں نے کہا کہ جنرل اشفاق پرویز کیانی کو انہوں نے بتایا کہ پہلے تو یہ طے کرنا چاہیئے کہ مسئلہ کیا ہے۔ ’میں نے کہا میری نظر میں مسئلہ یہ ہے کہ طالبان نے حکومتی رٹ کو چیلنج کیا ہے لہٰذا ریاست کو پہلے تو اپنی رٹ بحال کرنی چاہیئے۔‘

ان کے بقول انہوں نے ان سے یہ بھی کہا کہ حکومت کو اپنے ان حامی افراد کی حفاظت کرنی چاہیئے جنہیں طالبان قتل کرنا چاہتے ہیں۔

’میں نے کہا کہ فوج یہ نہ کہے کہ وہ غیر جانبدار ہے اس لیے وہ اپنے حامی افراد کا تحفظ نہیں کرسکتی کیونکہ فوج کسی دو فریقین کے خلاف کارروائی کرنے نہیں آئی ہے بلکہ وہ ایک فریق کے طور پر یہاں ہے لہٰذا جو لوگ ان کی حمایت کرتے ہیں وہ انہیں تحفظ فراہم کرے۔‘

افضل خان لالہ کا کہنا تھا کہ ملاقات کے دوران آرمی چیف نے بہت کم باتیں کیں تاہم انہوں نے اتنا کہا کہ ’وہ صورتحال کو جانتے ہیں اور وہ ان کا بہت جلد علاج کریں گے جس کا اثر آپ لوگ بہت جلد محسوس کرلیں گے۔‘

انہوں نے کہا کہ ان کی جنرل اشفاق پرویز کیانی کے ساتھ پہلی ملاقات تھی جس میں انہوں نے انہیں ایک پُر عزم، مثبت اور عملی انسان پایا۔

افضل خان لالہ زندگی میں پہلی مرتبہ اپنے ہی آبائی گاؤں سے ہیلی کاپٹر میں سوار ہوکر آرمی چیف سے ملنے کانجو ایف سی کیمپ گئے جس سے سوات میں حکومتی عملداری، گزشتہ ڈیڑھ سال سے جاری فوجی کارروائی کے مؤثر ہونے اور طالبان کی بڑھتی ہوئی قوت کا بخوبی اندازہ لگایا جاسکتا ہے۔حالانکہ ان کا گاؤں دُریش خیلہ سے کانجو ایف سی کیمپ کا فاصلہ محض پندرہ کلومیٹر ہے۔

افضل خان لالہ طالبان کے ’مطلوب افراد‘ کی فہرست میں شامل ہیں اور اس سے قبل ان پر طالبان نے پانچ حملے کیے تھے جس میں ایک میں وہ اور ان کا بھتیجا زخمی ہوگئے تھے۔ان کا کہنا ہے کہ وہ ’بھاگیں گے نہیں بلکہ طالبان کا ڈٹ کر مقابلہ کریں گے‘۔