عبدالحئی کاکڑ بی بی سی اردوڈاٹ کام، پشاور

	جنرل اشفاق کیانی اس سے قبل بھی سوات کا دورہ کر چکے ہیں

جنرل اشفاق پرویز کیانی بدھ کی صبح ضلع سوات کے صدر مقام مینگورہ پہنچ گئے جہاں پر عسکری ذرائع کے مطابق انہیں جاری فوجی کارروائیوں کے حوالے سے بریفنگ دی جا رہی ہے۔

عسکری ذرائع کا کہنا ہے کہ بریفنگ کے بعد امکان ہے کہ فوج کے سربراہ سوات کے ان علاقوں کا فضائی جائزہ لیں گے جہاں پر اس وقت فوج کی کارروائیاں جاری ہیں۔اس سے قبل بھی جنرل پرویز اشفاق کیانی سوات کا دورہ کر چکے ہیں۔

ان کے دورے کے موقع پر بھی سوات کے نواح منگلور کے علاقے سے بدھ کو تقریباً آٹھ شہریوں کی لاشیں ملی ہیں۔ مقامی لوگوں کا کہنا ہے کہ تین لاشیں صبح اور پانچ دوپہر کو ملی ہیں۔ ان افراد کو گولیاں ماری گئی ہیں اور سبھی مقای بتائے جارہے ہیں۔ مقامی لوگوں کے مطابق یہ معلوم نہیں ہوسکا ہے کہ ان افراد کو کس نے اور کیوں مارا ہے۔

اس کے علاوہ ان کے مطابق سکیورٹی فورسز کی جانب سے منگلور میں طالبان کے مشتبہ ٹھکانوں پر مارٹر کے گولے بھی داغے گئے ہیں جس میں بعض مکانات پر گرے ہیں جس سے ایک خاتون ہلاک اور متعدد افراد زخمی ہوگئے ہیں۔ تاہم سرکاری سطح پر اس بات کی تصدیق نہیں ہوسکی ہے۔

منگلور میں گزشتہ تین دنوں کے دوران مجموعی طور پر اٹھارہ شہری ہلاک ہوئے ہیں جبکہ گزشتہ ایک ماہ کے دوران سوات کے مختلف علاقوں سے ملنے والی لاشوں کی تعداد ساٹھ سے تجاوز کر گئی ہے۔

سوات میں چند دنوں سے سکیورٹی فورسز کی کارروائیوں میں پھر سے اضافہ دیکھنے میں آیا ہے لیکن مقامی لوگوں کا دعویٰ ہے کہ کارروائیوں کے دوران طالبان کم جبکہ مقامی آبادی کو زیادہ جانی و مالی نقصان پہنچا ہے۔