احمد رضا بی بی سی اردو ڈاٹ کام، کراچی

	سوات میں تباہی کے خلاف کراچی کے بچے بھی سڑکوں پر نکل پڑے

مظاہرے کا اہتمام پختونخواہ سٹوڈنٹس آرگنائزیشن نے کیا تھا جس میں کافی لوگ شریک ہوئے۔

مظاہرین دہشتگردی اور انتہاپسندی کے خلاف نعرے لگارہے تھے اور ان کا مطالبہ تھا کہ حکومت سوات میں اپنی رٹ بحال کرے۔

اس موقع پر بی بی سی سے بات کرتے ہوئے پختونخواہ سٹوڈنٹس آرگنائزیشن کے رہنما احمد جان نے کہا کہ سوات میں لڑکیوں کے دو سو سے زائد سکولوں کو تباہ کیا گیا ہے اور ڈھائی ہزار سرکاری اور نجی تعلیمی ادارے بند کردیےگئے ہیں۔

انہوں نے کہا کہ دہشتگردی اور انتہاپسندی سوات پر مسلط کی گئی ہے اور اس کی قیمت وہاں کے معصوم عوام اور سیاسی کارکن چکا رہے ہیں۔

انہوں نے اقوام متحدہ سے مطالبہ کیا کہ وہ سوات کی صورتحال کا فوری نوٹس لے۔

احمد جان نے کہا کہ سوات اور قبائیلی علاقوں میں موجود عسکریت پسندوں کے خلاف کارروائی پر حکومت اور ریاستی اداروں کی ایک متفقہ پالیسی نہیں ہے۔

’ملک کی خفیہ ایجنسیوں کی ایک پالیسی ہے اور حکومت جو اعلانات کررہی ہے وہ کچھ اور ہیں۔ بظاہر وہ اعلانات کررہی ہے لیکن عملی طور پر ہو یہ رہا ہے کہ چند شرپسندوں اور انتہاپسندوں نے سوات کی سولہ لاکھ آبادی کو یرغمال بنارکھا ہے۔اگر واقعی حکومت کی رٹ ہوتی تو وہاں پر یہ صورتحال نہ ہوتی۔‘

ان کا کہنا تھا کہ اگر سوات کے مسئلے کا سنجیدگی سے حل نہیں ڈھونڈا گیا تو یہ پورے ملک کو اپنی لپیٹ میں لے سکتا ہے۔