رفعت اللہ اورکزئی، بی بی سی اردوڈاٹ کام، پشاور

فوجی آپریشن میں بھی بہت سے لوگ ہلاک ہوئے ہیں

آجکل شاہد ہی کوئی ایسا اخبار یا ٹی وی چینل ہوگاجس پر سوات کا تذکرہ موجود نہ ہو۔ عام طورپر جب کسی علاقے میں لڑائی طوالت اختیار کرلیتی ہے تو ذرائع ابلاغ کے لیے وہ ایک عام سی کہانی بن جاتی ہے۔ جب لڑائی میں شدت آتی ہے ، عام شہری نشانہ بنتے ہیں تو ساتھ ساتھ اخبارات اور ٹی وی چینلز پر بھی واویلا شروع ہوجاتا ہے اور اس طرح ایک سلسلہ چلتا رہتا ہے۔

لیکن جب سے سوات میں لڑکیوں کے سکول جانے پابندی کا اعلان کیا گیا ہے اور سکولوں پر حملوں میں اضافہ ہوا ہے تو اس کے بعد ملکی اور غیر ملکی میڈیا میں ایک تحریک سی پیدا ہوگئی ہے اور ہر طرف سوات کی بات ہورہی ہے۔

پاکستان کے انگریزی اور اردو اخبارات میں آجکل سوات کے معاملے کو خصوصی جگہ مل رہی ہے ۔ ہر چھوٹے بڑے اخبار میں جنگ زدہ وادی کے حوالے سے رپورٹیں، تجزیئے، ڈائریاں اور کالم شائع ہورہے ہیں جس میں سوات کا تجزیہ ہر زاویئے اور پہلو سے کیا جارہے ہے۔ بعض انگریزی اخبارت کے ادارتی صفحات پر تو روزانہ کے حساب سے دو سے تین مضامین اور کالم شائع ہو رہے ہیں جس کا بڑا موضوع لڑکیوں کے تعلیم پر پابندی اور سکولوں پر حملے ہیں۔ ان لکھنے والوں میں سوات اور مالاکنڈ سے تعلق رکھنے پاکستانی بھی شامل ہیں جو بیرونی ممالک میں آباد ہیں۔

اس حالیہ رپروٹنگ کی وجہ سے حکومت سخت دباؤ کا شکار نظر آتی ہے اور اس کا اثر کچھ علاقوں میں شدید آپریشن کی صورت میں بھی سامنے آیا ہے۔

سوات کے ایک سینیئر صحافی غلام فاروق کا کہنا ہے کہ سوات کے معاملے میں ملکی اور بین الااقوامی میڈیا کا کردار شروع ہی سے غیر ذمہ دارانہ رہا ہے۔

انہوں نے کہا کہ سوات میں مقامی میڈیا اتنا بااثر اور فعال بھی نہیں ہے جتنے اسلام آباد سے شائع ہونے والے اخبارات ہیں کیونکہ پورے مالاکنڈ ڈویژن سے گنے چنے چند اخبارات شائع ہوتے ہیں لیکن ان کے اتنے وسائل بھی نہیں جبکہ ان اخبارات اور صحافیوں کو مختلف قسم کے مسائل کا بھی سامنا ہے۔

انہوں نے کہا کہ ’ وادی میں ایک سال سے ہزاروں شہری مارے جاچکے ہیں، ان کے جان و مال محفوظ نہیں، ہزاروں لوگ علاقہ چھوڑ چکے ہیں، تعلیمی ادارے تباہ ہوگئے ہیں، پورا ضلع کرفیو کی زد میں ہے لیکن میڈیا اب جاگ رہا ہے ۔‘

ان کے مطابق سوات میں جس حد تک تباہی ہوئی ہے میڈیا میں اس کی بہت ہی کم کوریج ہوئی ہے کیونکہ وہاں صحافیوں کو آزادانہ نقل و حرکت کی اجازت ہے اور نہ وہ آزاد رپورٹنگ کرسکتے ہیں۔

سوات میں اب تک ہونے والی کارروائیوں میں تین صحافی جان بحق ہوچکے ہیں جبکہ ایک صحافی شیرین زادہ کے گھر پر سکیورٹی فورسز کی طرف سے فائرنگ میں اس کی ہمشیرہ انتقال کرگئی تھیں۔ اس کے علاوہ انگریزی اخبار سے منسلک صحافی حمید اللہ جان کے مکان کو بھی گولہ باری میں تباہ کیا گیا تھا۔

سوات کے مسئلے پر گہری نظر رکھنے والے شعبہ صحافت پشاور یونیورسٹی کے لیکچرار سید عرفان اشرف کا کہنا ہے کہ میڈیا کوریج ہمیشہ سے نئی تبدیلیوں اور رحجانات کی متلاشی رہی ہے لیکن گزشتہ کچھ عرصہ سے سوات آپریشن میں ذرائع ابلاغ کےلیے کوئی نئی بات نہیں رہی تھی۔

تاہم انہوں نے کہا کہ ’ عسکریت پسندوں کی طرف سے سکولوں کی تباہی اور لڑکیوں کو تعلیم سے محروم رکھنے کے اعلان کے بعد میڈیا نے اپنے کیمروں کے دھانے طالبان کے خلاف کچھ اس طرح سے کر دیئے ہیں کہ مہذب دنیا اس اقدام کو ترقی اور خوشحالی کے خلاف ایک بڑی سازش سمجھنے لگی اور اس کا خمیازہ طالبان سے زیادہ عام لوگوں کو آپریشن میں تیزی کی صورت میں برداشت کرنا پڑا رہا ہے۔‘