رفعت اللہ اورکزئی، دلاور خان وزیر بی بی سی اردو ڈاٹ کام، پشاور

	طالبان نے مستقل جنگ بندی کا فیصلہ شورٰی پر چھوڑ دیا تھا

طالبان کے ترجمان مسلم خان نے یہ دعویٰ بھی کیا ہے کہ امن معاہدے کے بعد حکومت نے ان کے ایک ساتھی کو دیر میں ہلاک اور پشاور سے تین ساتھیوں کو گرفتار کیا تھا۔ تاہم اب حکومت نے گرفتار کیے جانے والے تین افراد میں سے دو کو رہا کر دیا ہے۔

لڑکیوں کو تعلیم کی جزوی اجازت

سوات: حکومت کا اعلانِ جنگ بندی

تمام تر کوشش کے باوجود کوئی سرکاری اہلکار طالبان ترجمان کے بیان پر تبصرے کے لیے دستیاب نہیں ہو سکا۔

اس سے پہلے ملنے والی اطلاعات میں بتایا گیا تھا کہ صوبہ سرحد کے ضلع سوات میں مستقل جنگ بندی کے حکومتی اعلان کے ایک دن بعد ہی مقامی طالبان نے سوات کے ضلعی رابطہ افسر کو اغواء کر لیا ہے۔

مقامی حکام کے مطابق سوات کے نئے ڈی سی او خوشحال خان اپنے چھ محافظوں کے ہمراہ مینگورہ کی جانب آرہے تھے کہ قمبر کے علاقے میں انہیں اغوا کر لیا گیا۔
عینی شاہدین کا کہنا ہے کہ مسلح افراد نے ڈی سی او اور ان کے چھ محافظوں کو جی ٹی روڈ پر بندوق کے زور پر یرغمال بنایا اور کسی نامعلوم مقام پر لے گئے۔

طالبان کے ترجمان مسلم خان اس سلسلے میں بی بی سی سے بات کرتے ہوئے الزام لگایا تھا کہ معاہدے کے بعد حکومت نے خلاف ورزی کی ہے اور پشاور میں تین ساتھیوں کو گرفتار کیا اور دیر میں ایک کو ہلاک کیا گیا ہے۔ تاہم مسلم خان کا کہنا تھا کہ ابھی خوشحال خان ان کے پاس ہیں اور جلد ہی انہیں رہا کردیا جائے گا۔

	لوگ کسی رکاوٹ کے بغیر ایک جگہ سے دوسری جگہ جا سکتے ہیں

سوات کے طالبان کے ترجمان مسلم خان نے بی بی سی سے بات کرتے ہوئے کہا تھا کہ’ڈی سی او کو اغوا نہیں کیا گیا ہے بلکہ وہ ان کے مہمان ہیں اور انہیں جلد ہی آزاد کر دیا جائے گا‘۔

ادھر حکومت کی جانب سے مستقل جنگ بندی کے اعلان کے بعد سکیورٹی فورسز نے سوات میں غیر ضروری چیک پوسٹوں کو ختم کر دیا ہے جبکہ دوسری طرف وادی سے نقل مکانی کرنے والے لوگ واپس اپنے گھروں کو لوٹنا شروع ہوگئے ہیں۔

سوات میڈیا سنٹر کے ایک اعلی اہلکار نے بی بی سی کو بتایا تھا کہ گزشتہ روز صوبہ سرحد کی جانب سے سوات میں مستقل جنگ بندی کے اعلان کے بعد اتوار کو سکیورٹی فورسز نے تمام غیر ضروری چیک پوسٹوں کو ختم کردیا ہے۔
انہوں نے کہا کہ جن چیک پوسٹوں کو ختم کیاگیا ہے ان میں وہ چیک پوسٹیں شامل ہیں جو کرفیو کے دوران لگائی جاتی تھیں۔ ان کا کہنا تھا کہ کرفیو کے خاتمے کے بعد غیر ضروری چیک پوسٹوں کی ضرورت بھی نہیں رہی۔ یاد رہے کہ سنیچر کو کمشنر مالاکنڈ ڈویژن نے اعلان کیا تھا کہ سوات میں قائم تمام غیر ضروری چوکیوں کو ختم کر دیا جائےگا۔

ادھر جنگ بندی کے اعلان کے بعد سوات اور ملحقہ علاقوں سے نقل مکانی کرنے والے افراد اپنے گھروں کو واپس لوٹنا شروع ہوگئے ہیں۔ ایک پولیس اہلکار نے بی بی سی کو بتایا کہ مستقل جنگ بندی کے اعلان کے بعد سوات سے نقل مکانی کرنے والوں میں سے تقریباً پچاس فیصد گھرانے واپس اپنے گھروں کو لوٹ رہے ہیں۔انہوں نے کہا کہ زیادہ تر خاندان گاڑیوں میں اور کچھ لوگ پیدل واپس جا رہے ہیں۔

	غیر ضروری چیک پوسٹوں کی ضرورت بھی نہیں رہی:حکام

خیال رہے کہ سوات میں جنگ بندی کے حوالے سے صوبائی حکومت اور کالعدم ’تحریکِ نفاذ شریعت محمدی‘ کے درمیان ہونے والے معاہدے کے بعد مولانا فضل اللہ نے کہا تھا کہ ان کی جانب سے جو دس دن کی جنگ بندی کا اعلان کیا گیا ہے اسے مستقل کرنے کا حتمی فیصلہ ان کی شوریٰ کرے گی۔