عبدالحئی کاکڑ بی بی سی اردو ڈاٹ کام، پشاور

	مولانا فضل اللہ اور مولانا صوفی محمد پانچ برس بعد ملے

صوبائی حکومت اور کالعدم ’تحریکِ نفاذ شریعت محمدی‘ کے درمیان ہونے والے معاہدے کے بعد مولانا فضل اللہ نے پہلی مرتبہ اپنے غیر قانونی ایف ایم چینل پر خطاب کرتے ہوئے کہا ہے کہ علاقے میں شریعت کے نفاذ کے لیے ان کے ساتھیوں کی قربانیاں رنگ لے آ ئی ہیں۔

سوات: حکومت کا اعلانِ جنگ بندی

انہوں نے مزید کہا کہ وہ تعلیم کے حصول کے مخالف نہیں بلکہ بقول ان کے ’تعلیم کی آڑ میں مبینہ طور پر ہونے والی فحاشی‘ کے خلاف ہیں۔ ان کے بقول سکول اور کالج کی طالبات کی تعلیم کے حصول سےمستقل طور پر پابندی اٹھانے کے متعلق ان کی تنظیم کے علما بہت جلد طریقہ کار وضع کریں گے۔

مولانا فضل اللہ کا کہنا تھا کہ ان کی جانب سے جو دس دن کی جنگ بندی کا اعلان کیا گیا ہے اسے مستقل کرنے کا حتمی فیصلہ ان کی شوریٰ کرے گی۔

انہوں نے یہ بھی کہاہے کہ ان کا مقصد حکومت کرنا نہیں بلکہ شریعت کا نفاذ ہے اور جب تک شریعت نافذ نہیں ہوتی تب تک وزیر اعظم، صدر اور وزرا بھی خود کو محفوظ تصور نہ کریں۔

انہوں نے کہا کہ امریکا کے خلاف ’جہاد‘ جاری رہے گا اور اس کے لیے ان کے ساتھیوں کے لیے دیگر محاذ بھی کھلے ہوئے ہیں۔ان کا بظاہر اشارہ قبائلی علاقے باجوڑ اور افغانستان کی طرف تھا۔

مولانا فضل اللہ نے غیر سرکاری تنظیموں کے بارے میں کہا کہ انہیں وہ علاقے میں اس وقت تک کام کرنے کی اجازت نہیں دیں گے جب تک انہیں یقین نہ ہو جائے کہ حکومت نفاذ شریعت ریگولیشن کو عملی کرنے میں مخلص ہے۔

انہوں نے مزید کہا کہ انہوں نے ملاقات کے دوران کالعدم تحریکِ نفاذ شریعت محمدی کے سربراہ مولانا صوفی محمد پر واضح کردیا ہے کہ نظام عدل ریگولیشن کے تحت تعینات ہونے والے علاقہ قاضی کو بااختیار ہونا چاہیے اگر ایسا نہیں ہوگا تو وہ پھر سے اپنی مسلح جدوجہد شروع کردیں گے۔البتہ انہوں نے کہا کہ انہیں مولانا صوفی محمد پر مکمل اعتماد ہے۔

واضح رہے کہ مولانا فضل اللہ کے خطاب سے کچھ دیر قبل ملاکنڈ ڈویژن کے کمشنر سید جاوید نے حکومت کی جانب سے مستقل جنگ بندی کا اعلان کرتے ہوئے کہا تھا کہ پیر سےلڑکوں کے سکول کھول دیے جائیں گے۔ البتہ انہوں نے کہا تھا کہ لڑکیوں کے سکول سرِ دست نہیں کھولے جا سکتے۔

مبصرین کا خیال ہے کہ طالبان نے کوشش کی ہے کہ حکومت کی بجائے لڑکیوں کی تعلیم سے جزوی طور پر پابندی ہٹانے کا اعلان کرکےخود ہی اس کا کریڈٹ لے لیں۔