رفعت اللہ اورکزئی بی بی سی اردو ڈاٹ کام، پشاور

	عراق کے بعد پاکستان صحافیوں کے لیے سب سے خطرناک جگہ ہے

ایوان صدر سے جاری ہونے والے ایک اعلامیے کے مطابق صدر نے مقتول صحافی کے ورثاء سے دلی رنج و غم کا اظہار کیا اور صوبہ سرحد کی حکومت کو ہدات کی ہے کہ وہ قاتلوں کو گرفتار کرے اور انہیں قرار واقعی سزا دلائے۔

سوات میں صحافی کا اغواء اور قتل

جیو ٹی وی کے مطابق موسیٰ خان خیل سوات میں ان کے نامہ نگار کے طور پر کام کرتے تھے۔ جیو ٹی وی کے اہلکار حامد میر نے سوات میں صحافیوں سے بات کرتے ہوئے کہا کہ موسیٰ خان کو دھمکیاں مل رہی تھی۔

مقامی طالبان کے ترجمان مسلم خان نے سوات کے صحافی شیریں زادہ سے بات کرتے ہوئے کہا کہ مقامی طالبان موسیٰ خان کی موت کے ذمہ دار نہیں ہیں اور کوئی تیسری قوت جو سوات میں امن قائم کرنے کے لیے ہونے والی کوششوں کو سبوتاژ کرنا چاہتی ہے، وہ اس قتل میں ملوث ہے۔

حاجی مسلم خان نے کہا کہ طالبان صحافی کے قتل کی تحقیقات کریں گے اور ذمہ داروں کو سزا دیں گے۔

صحافیوں کا احتجاج

پاکستان میں صحافیوں کی تنظیم ’پی ایف یو جے‘ کی اپیل پر ہونے والے مظاہروں میں حکومت سے مطالبہ کیا گیا کہ وہ موسیٰ خان خیل کے قاتلوں کو گرفتار کرے اور صحافیوں کو تحفظ فراہم کرے۔

مظاہروں کا سلسلہ مقتول صحافی کے آبائی علاقے سوات سے شروع ہوا جہاں مینگورہ پریس کلب میں صحافیوں نے احتجاجی مظاہرہ کیا اور موسیٰ خان کے قتل پر شدید احتجاج کیا۔ صحافیوں کے اس مظاہرے میں جیو ٹی وی کے اہلکار حامد میر نے صحافیوں سے بات کرتے ہوئے کہا کہ موسیٰ خان کو دھمکیاں مل رہی تھی۔

اسلام آباد سے نمائندہ بی بی سی اعجاز مہر کے مطابق پریس کلب کے باہر درجنوں صحافیوں نے بازؤں پر سیاہ پٹیاں باندھ کر احتجاجی مظاہرہ کیا اور صحافیوں کے خلاف تشدد میں اضافے کے خلاف نعرے لگائے۔ صحافیوں نے چائنا چوک کے قریب واقع پریس کلب کے سامنے احتجاجی جلوس بھی نکالا۔