دلاور خان وزیر بی بی سی اردو ڈاٹ کام پشاور

	خودکش حملہ آور نے چیک پوسٹ کے ساتھ گاڑی ٹکرا دی: حکام

سوات میں پاکستانی فوج کے ایک ترجمان کرنل عتیق الرحمان نے بی بی سی کو بتایا کہ اس حملے میں چار سکیورٹی اہلکار ہلاک جبکہ تین زخمی ہوئے ہیں۔

اس سے قبل فوج کے ایک اور ترجمان میجر ناصر خان نے بی بی سی کو بتایا کہ پیر کو گیارہ بجے کے قریب تحصیل خوزہ خیلہ کے علاقے گواشکوڑہ میں واقع ایک چیک پوسٹ پر خودکش حملہ ہوا جس میں ہلاکتوں کا خدشہ ہے۔انہوں نے کہا یہ دور دارز علاقہ ہے لہذا معلومات حاصل کرنے میں کچھ وقت لگے گا۔

انہوں نے کہا کہ خودکش حملہ آور نے چیک پوسٹ کے ساتھ گاڑی ٹکرا دی۔ اس کے بعد سکیورٹی فورسز نے راستے کو بند کیا ہے کسی کو انے جانے کی اجازت نہیں ہے۔

یاد رہے کہ گزشتہ روز سوات میں مقامی طالبان نے تین سکیورٹی اہلکاروں کو اغواء کرنے کا دعوٰی کیا تھا جبکہ حکام نے ایک اہلکار کے لاپتہ ہونے کی تصدیق کی ہے۔

سوات میں مقامی طالبان کے ترجمان حاجی مسلم خان نے بی بی سی کو ٹیلی فون کرکے بتایا تھا کہ گزشتہ دو دنوں میں تین سکیورٹی اہلکار کو اغواء کیا گیا ہے۔ انہوں نے کہا کہ ان کی تحویل میں کل سکیورٹی اہلکاروں کی تعداد اب چھ ہوگئی ہے کیونکہ بقول ان کے تین سکیورٹی اہلکار اس سے پہلے اغواء کیے گئے تھے۔

مسلم خان نے ان اہلکاروں کے بدلے میں مختلف جیلوں میں قید اپنے پچیس طالبان جنگجوؤں کی رہائی کا مطالبہ کیا ہے۔ سوات میں مقامی انتظامیہ نے ایک سکیورٹی اہلکار کی لاپتہ ہونے کی تصدیق کی ہے۔

گزشتہ روز سوات میں فوج نے دو مختلف کارروائیوں میں ایک طالبان کمانڈر سمیت گیارہ جنگجوؤں کو ہلاک کرنے کا دعوٰی کیا تھا۔