پاکستانی سرحد کے اندر امریکی حملوں پر شدید رد عمل پایا جاتا ہے

تجزیہ نگار رحیم اللہ یوسف زئی نے بی بی سی اردو سے بات کرتے ہوئے بتایا ہے کہ جس گھر پر حملہ ہوا وہ میر علی کے ایک گاؤں میں واقع ہے اور اس حملے میں ہلاک ہونے والے افراد کی تعداد پانچ ہے۔

’محسود ذمہ دار ہیں‘

پاکستان: امریکی توجہ کا نیا مرکز

امریکی حملے پر سرحد کا رد عمل

امریکی حملے پر پاکستان کا احتجاج

امریکی گولہ باری: آٹھ فوجی زخمی

رحیم اللہ یوسف زئی نے کہا کہ حملہ اتنا شدید تھا کہ بنوں اور میران شاہ تک اس کی آواز سنی گئی۔ شمالی وزیرستان میں ہونے والا یہ حملہ پاکستان کی حدود میں ہونے والے امریکی حملوں کے سلسلے کا تازہ ترین واقعہ ہے۔

انہوں نے کہا کہ مقامی لوگوں کے مطابق حملہ کرنے والے دو طیارے تھے جنہوں نے ایک مکان کو نشانہ بنایا۔ انہوں نے کہا کہ حملے کا نشانہ بننے والا مکان ایک قبائلی کا تھا اور یہ نہیں معلوم ہو سکا کہ ہلاک ہونے والے لوگ کون تھے۔

غیر مصدقہ ذرائع کے مطابق میزائل فائر کیے جانے سے پہلے امریکی طیارے پر فائرنگ کی گئی تھی اور ہلاک ہونے والوں میں غیر ملکی بھی شامل ہیں۔

امریکی حکام کہہ چکے ہیں کہ وہ پاکستان کی خود مختاری کا احترام کرتے ہیں لیکن اس کے ساتھ انہوں نے یہ اشارہ بھی دیا ہے کہ وہ شدت پسندوں کے خلاف سرحد پار حملے بند نہیں کریں گے۔