دلاور خان وزیر بی بی سی اردو ڈاٹ کام، ڈیرہ اسماعیل خان

	’پہاڑی سلسلوں میں دس اور گولے بھی گرے ہیں لیکن کسی جانی نقصان کی اطلاع نہیں ملی ہے البتہ قیمتی درختوں کو نقصان پہنچا ہے‘

جنوبی وزیرستان کے صدر مقام وانا سے موصول ہونے والی اطلاعات کے مطابق گزشتہ رات کو دو بجے قریب وانا سے پچیس کلومیٹر دور مغرب کی جانب افغان سرحد کے قریب انگوراڈہ کے علاقے زیڑہ لیٹہ میں واقع ایک پاکستانی چیک پوسٹ پر امریکہ اور اس کے ’اتحادیوں‘ نے گولہ باری کی جس کے نتیجہ میں پنجاب رجمنٹ کے اٹھ فوجی اہلکار زخمی ہوگئے ہیں۔

مقامی لوگوں کے مطابق پاکستان کے حدود میں پہاڑی سلسلوں میں دس اور گولے بھی گرے ہیں لیکن اس میں کسی جانی نقصان کی اطلاع نہیں ملی ہے۔البتہ گولہ باری سے قیمتی پہاڑی درختوں کو شدید نقصان پہنچا ہے۔

مقامی انتظامیہ کے ایک اہلکار نے بی بی سی کو واقعہ کی تصدیق کرتے ہوئے بتایا کہ زخمیوں کو ایک ہیلی کاپٹر کے ذریعہ بنوں منتقل کر دیا گیا ہے۔انہوں نے کہا کہ گولہ باری میں چیک پوسٹ مکمل طور پر تباہ ہوگئی ہے۔

مقامی لوگوں کا کہنا ہے کہ افغانستان کے علاقے برمل سے مزید دس سے زائد مارٹر کے گولے پاکستان کے تین مختلف علاقے انگوراڈہ، باغڑ اور موسی نیکہ میں گرے ہیں جو زوردار دھماکوں کے ساتھ پھٹے جس سے پورے علاقے میں شدید خوف و ہراس پھیل گیا ہے۔

یاد رہے کہ اس پہلے گیارہ جون کوامریکی طیاروں نے پاکستان کے قبائلی علاقے مہمند ایجنسی میں بھی پاکستان کی سکیورٹی فورسز کے اہلکاروں کے ایک ٹھکانے پربمباری کی تھی جس کے نتیجہ میں گیارہ اہلکاروں سمیت انیس افراد ہلاک ہوگئے تھے۔ یہ بھی معلوم ہوا ہے کہ گولہ باری کے بعد امریکی جاسوس طیاروں نے جنوبی شمالی وزیرستان میں نچلی پروازیں شروع کی ہے۔