علی سلمان بی بی سی اردو ڈاٹ کام، لاہور

	وزیر قانون رانا ثناءاللہ خان نے کہا ہےکہ بلدیاتی اداروں کے حسابات کی چھان بین دراصل اس تبدیلی کا آغاز ہے

لوکل گورنمنٹ آرڈیننس کے تحت مقامی حکومت کے کسی بھی عہدیدار کو بے ضابطگی کی بنیاد پر نہ صرف برطرف بلکہ گرفتار کیا جاسکتا ہے اور اس کا اختیار صوبے کے وزیر اعلیٰ کے پاس ہے۔

سندھ میں ایک اور پنجاب میں پانچ کے سوا تمام اضلاع کے ناظمین مسلم لیگ قاف یا اس کے اتحادیوں کے حمایت یافتہ ہیں۔

پنجاب کے وزیر قانون و پارلیمانی امور رانا ثناءاللہ نے بی بی سی سے گفتگو کرتے ہوئے کہا کہ بیشتر ضلعی حکومتوں کے ناظم اور نائب ناظم اداروں پر بوجھ بن چکے ہیں اورانہیں ہٹانا ضروری ہے۔

عام انتخابات سے پہلے پنجاب کے سابق وزیر قانون راجہ بشارت کا یہ خیال تھا کہ شاید آنے والی حکومت ہر ضلع اور ہر تحصیل میں ایک نئی محاذ آرائی کی متحمل نہیں ہو سکے گی۔ اس لیے بلدیاتی حکومتوں کو فوری خطرہ نہیں ہے اور وہ ڈیڑھ برس کی باقی مدت پوری کریں گی لیکن سندھ اور پنجاب میں بظاہر یوں محسوس ہو رہا ہے کہ مقامی حکومتوں کی تبدیلی کا عمل شروع ہوگیا ہے۔

مسلم لیگ قاف کے یا اتحادی  سندھ میں ایک اور پنجاب میں پانچ کے سوا تمام اضلاع کے ناظمین مسلم لیگ قاف یا اس کے اتحادیوں کے حمایت یافتہ ہیں

پیپلز پارٹی کے ذرائع کا کہنا ہے کہ کراچی اور حیدرآباد کے سوا بیشتر اضلاع میں تحاریک عدم اعتماد پر کام کیا جا رہا ہے۔

لوکل گورنمنٹ آرڈنینس مجریہ دوہزار پانچ کے تحت ضلعی ناظم کو دوتہائی اور نائب ناظم کو سادہ اکثریت سے تبدیل کیا جاسکتا ہے۔

البتہ پنجاب میں یہ طریقہ کار استعمال نہیں کیا جارہا بلکہ اسی قانون کی اس شق کو استعمال میں لائے جانے پر غور ہورہا ہے جس کے تحت بے ضابطگی کے الزام میں برطرفی اور گرفتاری عمل میں لائی جاسکتی ہے۔

پنجاب کےوزیرقانون کہتے ہیں کہ بے ضابطگی تو ناظمین کا غیرجماعتی بنیادوں پر منتخب ہونے کے بعد مسلم لیگ قاف میں شامل ہونا بھی ہے کیونکہ بعض تو باقاعدہ مسلم لیگ قاف کے عہدیدار ہیں۔

مسلم لیگ قاف میں شامل ہونا بھی بے ضابطگی تو ناظمین کا غیرجماعتی بنیادوں پر منتخب ہونے کے بعد مسلم لیگ قاف میں شامل ہونا بھی ہے کیونکہ بعض تو باقاعدہ مسلم لیگ قاف کے عہدیدار ہیں۔ وزیرقانون

مسلم لیگ نون سےتعلق رکھنے والے صوبائی وزیر نے کہا کہ ان کے یہ دونوں عمل ان کی برطرفی کے لیے کافی ہیں لیکن کے اس کے باوجود حسابات کی جانچ پڑتال شروع کی گئی ہے تاکہ کسی کے پاس اعتراض کی کوئی گنجائش ہی نہ رہے۔ یہ چھان بین آڈیٹر جنرل سے کروائی جارہی ہے۔

وزیراعلی پنجاب سردار دوست محمد کھوسہ نے جمعہ کولاہور میں میڈیا سے گفتگو کرتے ہوئے بلدیاتی اداروں کے حسابات کی جانچ پڑتال کے عمل کو بلا امتیاز قرار دیا اور کہا کہ یہ کوئی انتقامی کارروائی نہیں ہے۔ تاہم سیاسی مبصرین کہتےہیں دیکھنا یہ ہے حسابات کے جانچ پڑتال کے بعد برطرفیوں کی ممکنہ کارروائیوں سے ہی واضح ہو گا کہ نشانہ صرف مسلم لیگ قاف کے ہی حمایت یافتہ ناظمین ہیں یا نہیں۔