علی حسن،
بی بی سی ڈاٹ کام ، حیدرآباد |  |
|  گزشتہ انتخابات میں مخالفین نےسخت صورتحال کا سامنا کیا ہے |
پاکستان میں نچلی سطح پراختیارات منتقل کرنے کےمنصوبے کےتحت ضلعی حکومتوں اور بلدیاتی اداروں کے دوسرے انتخابات کا پہلا مرحلہ گزر گیا۔ 25 اگست کو دوسرے مرحلے کے لیے ووٹنگ ہوگی۔ پہلے مرحلے میں جو کچھ ہوا، اس میں انتخابات کرانے والوں کے لیے سبق ہی سبق ہیں اور ان لوگوں کے لیے بھی چیلنج ہے جو صاف شفاف انتخابی عمل کا دعوی کرتے نہیں تھکتے۔ صوبہ سندھ کے جن نواضلاع میں انتخابات ہو چکے ہیں ، ان میں سواۓ
کراچی، ہر ضلع میں طاقتور اور بڑے زمیندار گھرانے ہی اپنی طاقت میں مزید اضافہ کرتے ہی نظر آتے ہیں - ضلع تو ان کی ہی دسترس میں رہے گا اب ان کے ضلعوں میں اکثر تعلقے
(تحصیل) بھی ان کی ہی دسترس میں جاتے نظر آتے ہیں ۔ کونسلوں میں منتخب ہونے والے کونسلروں کی اکثریت ان لوگوں پر مشتمل ہے جو صرف ہاں میں ہاں ملاۓ گی اس طرح جیسے کوئی ہاری اپنے زمیندار کی مرضی سے اختلاف کی جسارت نہیں کرسکتا ۔ |  بلدیاتی انتخابات میں پلہ طاقت وروں کے ہاتھ میں ہے |
نئے نظام کی مقبولیت کا راگ الاپنے اور دعوی کرنے والے لوگ یہ بھول جاتے ہیں کہ مقبولیت اور پذیرائی کا تعلق نظام میں موجود کسی اچھائی سے نہیں ہے بلکہ اس نظام کے تحت پہلی مدت میں جس قدر ترقیاتی فنڈ جاری کیےگئےان کے پیش نظر، ان گھرانوں نے جو پہلے ہی وسائل پر حاوی ہیں ، اپنی اپنی گرفت مزید مضبوط کرنے کے لیے میدان میں کود پڑے ہیں تاکہ ان کے علاقوں میں نالیاں اور گلیاں بھی ان ہی کی رضامندی سے تعمیر اور مرمت ہو سکیں ۔ فیض کے تمام سرچشمے ان سے ہی وابستہ افراد کے لۓ مخصوص رہیں۔ مخالفین کو مخالفت کی سزا اس طرح دی جائے کہ ان کی اور ان کے حامیوں کی گلیاں خراب رہيں اور نالیاں ابلتی ہی رہیں۔ گزشتہ انتخابات میں مخالفین نے اسی قسم کی صورتحال کا سامنا کیا ہے ۔ سیاسی جماعتیں ضلعی حکومتوں اور بلدیاتی اداروں کے دوسرے انتخابات کے عمل کا حصہ اس لی بنیں کہ ان کے سیاسی مخالف ان کے حامیوں پر زندگی تنگ نہ کر سکیں ۔
| بلدیاتی انتخابات  انفرادی طور پر تو لوگوں کو فائدہ ہی فائدہ نظر آرہا ہے لیکن اجتماعی طور پر ووٹ کی پرچی سے بھرے جانے والےصندوق کا تقدس تو بری طرح متاثر ہوا  |
صوبہ سندھ کی حد تک یہ بات واضح ہو گئی ہے کہ جب ’سیاں جی ہوں کوتوال تو خوف کس کا‘۔ بدعنوانی، بےایمانی، انتظامی کمزوری اور کوتاہی، غفلت ، دانستہ درگزر کر دینے کے ساتھ ساتھ ہراساں کرنے کے جو بھی ممکن طریقے اور ذرائع ہوسکتے تھے، ان پر حکومت کے حامی امیدواروں نے کسی خوف و خطر کے بغیر کھل کر بھرپور انداز سے عمل کیا جس کی گواہی نتائج بھی دے رہے ہیں ۔ انفرادی طور پر تو لوگوں کو فائدہ ہی فائدہ نظر آرہا ہے لیکن اجتماعی طور پر ووٹ کی پرچی سے بھرے جانے والےصندوق کا تقدس تو بری طرح متاثر اور
مجروح ہو ا ہے۔ اس کا حکمرانوں کے پاس کوئی علاج ہوتو ان لوگوں کو بھی ضرور آگاہ کریں جو بندوق کی بجاۓ صندوق کے تقدس اور طاقت پر تقین رکھتے ہیں، جو بلٹ کی بجاۓ بیلٹ کو اہم ہتھیار سمجھتے ہیں اور جو برچھی پر پرچی کو ترجیح اور فوقیت دیتے ہیں لیکن پاکستانی حکمراں جراح تھوڑی ہیں کہ جراحی کرتے پھریں ۔ | 
یہ صفحہ دوست کو ای میل کیجیئے
پرِنٹ کریں
