بیورو رپورٹ بی بی سی اردو ڈاٹ کام، پاکستان

	’منصفانہ انتخابات کے انعقاد کے لیے تمام ضروری اقدامات کر لیے گئے ‘

اسلام آباد میں ایک پریس کانفرنس سے خطاب کرتے ہوئے چیف الیکشن کمشنر نے بتایا کہ انتخابی شیڈول کے تحت ریٹرننگ افسروں سے کاغذاتِ نامزدگی بدھ اکیس نومبر سے حاصل کیے جا سکیں گے جبکہ مکمل شدہ کاغذاتِ نامزدگی جمع کروانے کی آخری تاریخ چھبیس نومبر ہے۔

ایمرجنسی پر خصوصی ضمیمہ

’صدر بش صرف درخواست ہی کر سکتے ہیں‘

ایمرجنسی کی تصویری کوریج

چیف الیکشن کمشنر کا کہنا تھا کہ کاغذات کی جانچ پڑتال کا عمل ستائیس نومبر سے تین دسمبر تک جاری رہے گا اور ان کی منظوری یا نامنظوری کے حوالے سے اپیلیں سات دسمبر تک داخل کروائی جا سکیں گی جن پر فیصلہ چودہ دسمبر کو سنایا جائے گا۔

جسٹس ریٹائرڈ قاضی محمد فاروق کے مطابق کاغذات واپس لینے کی آخری تاریخ پندرہ دسمبر ہو گی جس کے بعد سولہ دسمبر کو امیدواروں کی نظرِ ثانی شدہ حتمی فہرست جاری کر دی جائے گی۔

انتخابات کی تیاریوں کے حوالے سے چیف الیکشن کمشنر نے صحافیوں کو بتایا کہ صاف اور شفاف انتخابات کے انعقاد کے لیے تمام ضروری اقدامات کر لیے گئے ہیں۔ ان کا کہنا تھا کہ ان انتخابات میں شفاف بیلٹ باکس استعمال کیے جائیں گے۔ قاضی فاروق کا کہنا تھا کہ انتخابی فہرستیں مکمل ہیں اور ریٹرننگ افسران کی تعیناتی کی جا چکی ہے جبکہ انتخابی عملے کو عالمی معیار کے مطابق تربیت دینے کا انتظام کیا گیا ہے۔

انہوں نے کہا کہ ان انتخابات کی مانیٹرنگ کے لیے آنے والے غیر ملکی مبصرین کو نہ صرف خوش آمدید کہا جائے گا بلکہ انہیں ہر ممکن سہولیات بھی فراہم کی جائیں گی۔ الیکشن کمشنر نے مبصرین کو پولنگ سٹیشنوں تک رسائی فراہم کرنے اور ان کے معلوماتی کتابچہ بھی جاری کرنے کا اعلان کیا۔

یاد رہے کہ پیر کو ہی الیکشن کمیشن نے عام انتخابات کے لیے ضابطۂ اخلاق کی منظوری بھی دی ہے تاہم حزب مخالف کی اہم جماعتوں نے اس ضابطۂ اخلاق کو مسترد کر دیا ہے۔

ضابط اخلاق کو حتمی شکل دینے کے لیے چیف الیکشن کمشنر کی سربراہی میں الیکشن کمیشن کا اجلاس اسلام آباد میں منعقد ہوا تھا جس میں ان سیاسی جماعتوں کو شرکت کی دعوت دی گئی تھی جن کی تحلیل ہونے والی قومی اسمبلی میں نمائندگی تھی۔

تاہم حزب مخالف کی بڑی جماعتوں پیپلز پارٹی، مسلم لیگ(ن) اور متحدہ مجلس عمل نے الیکشن کمیشن کو متنازعہ قرار دیتے ہوئے اجلاس کا بائیکاٹ کیا تھا تاہم سابق حکمران جماعت مسلم لیگ (ق) اور پیپلز پارٹی شیرپاؤ گروپ کے علاوہ مسلم لیگ فنکشنل، جمعیت علماء اسلام سمیع الحق گروپ اور پاکستان عوامی پارٹی کے رہنماؤں نے اجلاس میں شرکت کی تھی۔