احمد رضا بی بی سی اردو ڈاٹ کام، اسلام آباد

	مشرف اور بینظیر کے درمیان شاید ہی اعتماد کا رشتہ باقی ہو:راجہ ظفر الحق

جان نیگرو پونٹے نے جہاں جنرل مشرف پر ایمرجنسی جلد از جلد ختم کرنے کا مطالبہ کیا وہاں ان کی جانب سے آئندہ سال جنوری میں عام انتخابات کرانے کے اعلان کا خیر مقدم بھی کیا اور ساتھ ہی بینظیر بھٹو اور جنرل مشرف سے یہ بھی کہا کہ وہ مفاہمت کے لیے پہلے سے جاری بات چیت کے سلسلے کو بحال کریں کیونکہ ان کے بقول اس سے سیاستدانوں کو تصادم کی فضاء سے واپسی میں مدد ملے گی۔

ان بیانات پر بات کرتے ہوئے پاکستان مسلم لیگ (ن) کے چئرمین راجہ ظفرالحق نے کہا کہ امریکی نائب وزیر خارجہ کے بیان سے ظاہر ہوتا ہے کہ جنرل پرویز مشرف کے متعلق امریکہ کی پالیسی میں کوئی تبدیلی نہیں آئی ہے۔ ان کا کہنا تھا کہ ’وہ (امریکہ) پاکستان کے سولہ کروڑ عوام پر ابھی تک ایک ہی شخص کو ترجیح دے رہے ہیں اور ان کی پالیسی میں کوئی تبدیلی نہیں ہوئی‘۔

ان کا کہنا ہے کہ سوات کی موجودہ صورتحال کے پیش نظر جنرل مشرف یہ سمجھتے ہیں کہ امریکہ ان پر اس سے زیادہ دباؤ نہیں ڈال سکتا اور’اس لیے وہ آرام سے اپنے اس فیصلے کا انتظار کر سکتے ہیں جس کی توقع انہیں سپریم کورٹ سے ہے کہ وہ ان کے صدارتی انتخاب کو جائز قرار دے گی اور اس کے بعد وہ پاکستان کے منتخب صدر ہونے کا اعلان کریں گے اور پھر دیکھیں گے کہ وردی اتارنی ہے یا نہیں‘۔

	جان نیگرو پونٹے نے جنرل مشرف پر ایمرجنسی جلد از جلد ختم کرنے کا مطالبہ کیا

راجہ ظفر الحق نے کہا کہ نیگرو پونٹے کو ایمرجنسی کے نفاذ کے ساتھ برطرف کیے گئے ججوں کی بحالی کی بھی بات کرنی چاہیے تھی جو انہوں نے نہیں کی۔پاکستان مسلم لیگ (ن) کے چئرمین نے امریکی نائب وزیر خارجہ کی جانب سے بینظیر بھٹو اور جنرل پرویز مشرف کو مفاہمت کے لیے بات چیت کا سلسلہ دوبارہ شروع کرنے کے مشورے پر تبصرہ کرتے ہوئے کہا کہ یہ ایک رسمی سی بات ہے اور مشورے سے بڑھ کر کچھ نہیں ہے کیونکہ ان کے خیال میں اب جنرل مشرف اور بینظیر بھٹو کے درمیان شاید ہی اعتماد کا رشتہ باقی ہو۔ انہوں نے کہا کہ بینظیر بھٹو نے کل جماعتی اجلاس بلایا ہوا ہے اور توقع ہے کہ وہ اب اپنی سیاسی پوزیشن کو مستحکم کرنے پر توجہ دیں گی۔

انہوں نے کہا کہ آئندہ عام انتخابات میں حصہ لینے یا نہ لینے کے بارے میں تمام سیاسی جماعتوں کو مل جل کر متفقہ فیصلہ کرنا چاہیے۔

تین نومبر سے پہلے جو پوزیشن سپریم کورٹ اور چیف جسٹس کی تھی اس کو بحال کیے بغیر اور نکتہ آغاز بنائے بغیر ممکن نہیں ہے کہ حالات کو سدھارا جا سکے، پی سی او کے تحت، ایمرجنسی کے تحت کسی آئین کے بغیر ہونے والے الیکشن جھوٹے اور فراڈ الیکشن ہوں گے‘۔ منور حسن

ادھر متحدہ مجلس عمل کے رہنما منور حسن نے جان نیگرو پونٹے کی جانب سے جنرل مشرف کے جنوری میں انتخابات کرانے کے اعلان کا خیرمقدم کرنے کی مذمت کی اور کہا کہ سپریم کورٹ کے برطرف چیف جسٹس سمیت دیگر ججوں کی بحالی کے بغیر عام انتخابات کا انعقاد دھوکہ ہوگا۔

منور حسن کا کہنا تھا کہ’تین نومبر سے پہلے جو پوزیشن سپریم کورٹ اور چیف جسٹس کی تھی اس کو بحال کیے بغیر اور نکتہ آغاز بنائے بغیر ممکن نہیں ہے کہ حالات کو سدھارا جا سکے، پی سی او کے تحت، ایمرجنسی کے تحت کسی آئین کے بغیر ہونے والے الیکشن جھوٹے اور فراڈ الیکشن ہوں گے‘۔

انہوں نے کہا کہ حزب اختلاف کی جماعتوں میں بڑی حد تک ذہنی ہم آہنگی موجود ہے کہ جنرل مشرف اور ان کی من پسند نگراں حکومتوں کی موجودگی میں ہونے والے انتخابات میں حصہ نہ لیا جائے اور اس پر غورو خوض کرنے کے لیے کل اے پی ڈی ایم کا اجلاس ہورہا ہے اور کل جماعتی کانفرنس پر بھی اس پر بات ہوگی جس کے بعد امکان ہے کہ تمام جماعتیں اس اتفاق رائے کو برقرار رکھیں گی۔

نیگرو پونٹے کو ایمرجنسی کے نفاذ کے ساتھ برطرف کیے گئے ججوں کی بحالی کی بھی بات کرنی چاہیے تھی جو انہوں نے نہیں کی۔ راجہ ظفر الحق

ادھر بینظیر بھٹو کی جماعت پاکستان پیپلز پارٹی نے امریکی نائب وزیرِ خارجہ کے اس بیان پر اب تک کوئی ردعمل ظاہر نہیں کیا ہے۔ بینظیر بھٹو کے ترجمان فرحت اللہ بابر کا کہنا ہے کہ اس پر بینظیر بھٹو خود ہی کوئی تبصرہ کریں گی۔