علی سلمان بی بی سی اردو ڈاٹ کام، لاہور

	ایم ایم اے قائدین کا خیال ہے کہ حکومت پر عوامی دباؤ برقرار رکھنا چاہیئے

وردی اتاریں ورنہ جلسہ بھی، لانگ مارچ بھی: بینظیر

طلباء اور وکلاء سراپا احتجاج

ضلعی عدالتوں کا تین روزہ بائیکاٹ

ملک میں وکلاء کا احتجاج، گرفتاریاں

پاکستان میں ایمرجنسی:خصوصی ضمیمہ

پشاور میں وکلاء کی بھوک ہڑتال

مجلس عمل کے قائدین کا کہنا ہے کہ حکومت کے خلاف مشترکہ تحریک چلانے کے لیے بینظیر نے انہیں پیغام بھجوایا ہے اور اس بارے میں اہم پیش رفت آل پاٹیز کانفرنس کا انعقاد ہے۔ آل پارٹیز بلانے کا فیصلہ متحدہ مجلس عمل کی سپریم کونسل کے ایک ایسے اجلاس میں کیا گیا جس کے انعقاد میں پولیس نے بار بار رکاوٹ ڈالی۔

	اپوزیشن کی قومی مجلس مشاورت چودہ نومبر کو اسلام آباد میں ہوگی

انہوں نے کہا کہ ایم ایم اے نے ایمرجنسی کو باضابطہ طور پر مسترد کرتے ہوئے اس کے خاتمے کا مطالبہ کیا ہے اور کہا ہے کہ عدلیہ کو بحال اور میڈیا پر سے پابندی ختم کی جائے۔

مولانافضل الرحمان نے کہا کہ ان کے مطالبات تسلیم نہ ہونے کی صورت میں پندرہ نومبر کو ملک گیر یوم احتجاج منایا جائے گا۔ پندرہ نومبر پاکستان کے کالعدم آئین کے تحت پرویز مشرف کی صدرات کے حالیہ دور کا آخری دن ہے۔

مجلس عمل کے صدر قاضی حسین احمد اپنی نظر بندی کی وجہ سے اجلاس میں صدارت نہ کرسکے البتہ فیصلوں کی منظور ان سے ٹیلی فون پر لے لی گئی۔

قاضی حسین احمد منصورہ میں نظر بند ہیں اور مجلس عمل نے اپنی سپریم کونسل کا اجلاس اسلام آباد سے لاہوراس لیے منتقل کیا تاکہ یہ اجلاس قاضی حسین احمد کی زیر صدرات ہو سکے۔

پولیس نے ایمرجنسی کے روز سے منصورہ کو محاصرے میں لے رکھا ہے اور جمعرات کو سپریم کونسل کے اجلاس کے لیے مولانا فضل الرحمان سمیت ایم ایم اے میں شامل جماعتوں کے سربراہ منصورہ پہنچے تو پولیس نے انہیں اندر جانے سے روک دیا۔

	ایم ایم کے مطابق مشترکہ تحریک چلانے کے لیے بینظیر نے انہیں پیغام بھجوایا ہے

پولیس نے میڈیا سے بھی بدسلوکی کی اور انہیں منصورہ میں داخل نہ ہونے دیا تاہم ذرائع ابلاغ کے چند نمائندے منصورہ میں داخل ہوگئے۔امیر جماعت اسلامی قاضی حسین احمد نے صحافیوں کوبتایا کہ حکومت مخالف مشترکہ تحریک چلانے کے لیے پیپلز پارٹی نے ان سے رابط کیا ہے۔

جے یو آئی کے ترجمان مولانا امجد خان نے کہا کہ پیپلز پارٹی کو اے پی سی میں شرکت کی باضابطہ دعوت بھجوائی جارہی ہے۔ بینظیر بھٹو نے ماضی میں اے پی ڈی ایم کا حصہ بننے سے اس لیے انکار کیا تھا کیونکہ ان کے بقول وہ چند مذہبی جماعتوں کے ساتھ اتحاد بنانا نہیں چاہتی تھیں۔ جے یوآئی کے ترجمان نے بی بی سی کو بتایا کہ کل سینٹر رضا ربانی اور خورشید شاہ نے دوبار ان کی جماعت کے امیر مولانا فضل الرحمان سے ملاقات کی اور انہیں بینظیر کا پیغام پہنچایا۔ ان کے بقول وہ پیغام مشترکہ تحریک چلانے کی تجویز پر مبنی تھا۔

جماعت اسلامی کے امیر اور مجلس عمل کے صدر قاضی حسین احمد نے صحافیوں کو بتایا کہ مسلم لیگ نون کے جلاوطن سربراہ نواز شریف سے دو بار ٹیلی فون پر ان کا رابطہ ہوا ہے اور انہوں نے اپوزیشن کی مشترکہ جدوجہد کی حمائت کی ہے۔

مبصرین کا کہا ہے کہ ایمرجنسی کے نفاذ نے اپوزیشن کی ان جماعتوں کو بھی حکومت سے دور جانے پر مجبور کر دیا ہے جو کسی حد تک مفاہمت کا راستہ اختیار کرنا چاہتی تھیں۔اب حزب مخالف کی جماعتیں بظاہر متحدہ اپوزیشن کی جانب بڑھتی دکھائی دے رہی ہیں جو مشرف کے آٹھ سالہ دور میں اب تک ممکن نہیں ہوسکا۔