ہارون رشید بی بی سی اردو ڈاٹ کام، اسلام آباد

	صدر نے الیکشن کمیشن کی تعریف کی اور اپنی تمام حامی سیاسی جماعتوں کا شکریہ بھی ادا کیا۔

ایوان صدر اسلام آباد میں صدارتی انتخاب میں ’غیرسرکاری‘ جیت کے بعد صحافیوں سے بات کرتے ہوئے صدر نے عوام سے اپیل کی کہ وہ ان لوگوں کا ساتھ نہ دیں جو انہیں احتجاج اور ہڑتال پر اکسا رہے ہیں۔

غیر سرکاری نتائج: مشرف پانچ سال اور؟

صدارتی انتخاب: خصوصی ضمیمہ

آدھی اسمبلی میں مشرف کی حمایت

پنجاب: وکلاء کا یوم سیاہ اور احتجاج

’سیاسی ساکھ کا سوال باعث پریشانی‘

اس سال نو مارچ میں چیف جسٹس افتخار محمد چوہدری کے خلاف ریفرنس دائر کرنے کے بعد سے وکلاء ان کے سب سے بڑے مخالف گروپ کی صورت میں سامنے آئے تھے۔ جو اب بھی ان کے خلاف آئینی جنگ لڑ رہے ہیں۔

البتہ ایک سوال کے جواب میں کہ سپریم کورٹ میں ان کا مقدمہ زیر سماعت ہے تو اگر فیصلہ ان کے خلاف آتا ہے تو کیا وہ صدارت چھوڑ دیں گے، ان کا کہنا تھا کہ پہلے عدالت کو ایک فیصلے پر پہنچنے دیں اس کے بعد دیکھا جائے گا۔

گزشتہ تین چار روز میں ٹی وی چینلوں کو دیے گئے انٹرویو کے مقابلے میں وہ زیادہ پراعتماد اور جارحانہ موڈ میں دکھائی دے رہے تھے۔ سوٹ میں ملبوس صدر نے میڈیا کے کردار کا ذکر کرتے ہوئے کہا کہ وہ ان کی آزادی کے سب سے بڑے حامی ہیں لہذا انہیں عوام کو اچھی اچھی باتیں بتانی چاہیں۔

صدر نے صرف تین سوالات کے جواب دیے۔ حزب اختلاف کی طرف سے بائیکاٹ کے بارے میں انہوں نے کہا کہ جمہوریت کا مطلب اکثریت ہوتا ہے۔ ’چون پچپن فیصد اراکین نے مجھے ووٹ دیا لہذا ایسا کوئی مسئلہ نہیں۔‘

حزب اختلاف کی جماعتوں کا ذکر کرتے ہوئے صدر نے انہیں ٹکراؤ اور لڑائی کی پالیسی ترک کرنے کا مشورہ دیا۔ پیپلز پارٹی سے مفاہمت کے بارے میں سوال کا انہوں نے جواب نہیں دیا صرف اتنا کہا کہ ان کی مفاہمت کی پیشکش تمام جماعتوں کے لیئے ہیں۔

صدر نے صدارتی انتخاب مکمل کرنے پر الیکشن کمیشن کی تعریف کی اور اپنی تمام حامی سیاسی جماعتوں کا شکریہ ادا کیا۔