علی سلمان بی بی سی اردو ڈاٹ کام، لاہور

	تحریک انصاف کے کارکنوں نے صدر مشرف اور وزیراعلیٰ پنجاب کی تصویروں والے بینرز اور پوسٹر جلائے

صدر جنرل مشرف کو دو سو تریپن اور جسٹس ریٹائرڈ وجیہہ الدین کو تین ووٹ ملے جب کہ ایک ووٹ مسترد ہوا ہے۔ بعد میں وزیراعلیٰ پنجاب چودھری پرویز الہی نے ایک پریس کانفرنس میں اعلان کیا کہ آئینی فارمولے کے تحت پنجاب سے صدر کو چوالیس ووٹ ملے ہیں اور ان کے مخالف ایک بھی ووٹ نہیں بن سکا۔

ان کا کہنا تھا کہ چونکہ پنجاب میں چھ ووٹوں سے ایک ووٹ بنتا ہے اس لیے جسٹس ریٹائرڈ وجیہہ الدین کے تین ووٹ ملکر ایک بھی نہیں بن پایا۔

مبصرین کا کہنا ہے جسٹس وجیہہ الدین کے تین ووٹ اس لیے کسی حد تک سیاسی اہمیت کے حامل ہیں کہ پنجاب اسمبلی میں ہونے والی پولنگ میں اپوزیشن کے ایک بھی ممبر نے شرکت نہیں کی تھی اور ووٹ ڈالنے والے تمام اراکین سرکاری تھے۔

وزیر اعلیٰ سے پوچھا گیا کہ کیا وہ ان تین اراکین کے خلاف ایکشن لیں گے جنہوں نے پارٹی فیصلے کی خلاف ورزی کرتے ہوئے جسٹس ریٹائرڈ وجیہہ کو ووٹ ڈالے تو انہوں نے کہا کہ ’یہ خفیہ بیلٹنگ تھی‘۔

واضح رہے کہ اے پی ڈی ایم کے سینتالیس اراکین مستعفی ہوچکے ہیں جن میں سے تین کے استعفے منظور نہیں ہوئے۔ حکمران مسلم لیگ کے تین دیگر اراکین نے بھی پولنگ میں حصہ نہیں لیا جن میں صغرا امام، پرویز نکئی اور عارف تسنیم شامل ہیں۔

پیپلز پارٹی کے نعرے  صوبائی پارلیمان کی تاریخ میں یہ پہلا واقعہ تھا پیپلز پارٹی کے اراکین نے بائیکاٹ کرتے ہوئے گو مشرف گو کے نعرے نہیں لگائے بلکہ صرف وزیراعظم بے نظیر، جئے جئے بھٹو کے نعرے لگائے

موجودہ صوبائی پارلیمان کی تاریخ میں یہ پہلا واقعہ تھا پیپلز پارٹی کے اراکین نے بائیکاٹ کرتے ہوئے گو مشرف گو کے نعرے نہیں لگائے بلکہ صرف وزیراعظم بے نظیر، جئے جئے بھٹو کے نعرے لگائے۔ اس موقع پر قاسم ضیاء نے صحافیوں کو کہا کہ وہ باوردی صدر کو تسلیم نہ کرنے کے اپنے موقف پر قائم ہیں۔ اسی لیے وہ بائیکاٹ کر کے جا رہے ہیں۔

جسٹس ریٹائرڈ وجییہ الدین کی پولنگ ایجنٹ ربیعہ باجوہ ایڈووکیٹ کو پنجاب اسمبلی میں داخل نہیں ہونے دیا گیا۔ حکمران مسلم لیگ کے پارلیمانی سیکرٹری ملک محمد احمد نے کہا کہ قواعد کے مطابق صرف ووٹر ہی پولنگ ایجنٹ بن سکتا ہے۔

	پنجاب اسمبلی کے ارد گرد پولیس کی بھاری نفری تعینات رہی اور پنجاب اسمبلی کو جانے والے راستوں میں رکاوٹیں کھڑی کی گئی تھیں

پنجاب اسمبلی کے ارد گرد پولیس کی بھاری نفری تعینات رہی اور پنجاب اسمبلی کو جانے والے راستوں میں رکاوٹیں کھڑی کی گئی تھیں۔ اے پی ڈی ایم نے پنجاب اسمبلی کے گھیراؤ کا اعلان کیا تھا لیکن بظاہر کوئی ناخوشگوار واقعہ پیش نہیں آیا۔

پنجاب بھر میں جزوی ہڑتال ہوئی لیکن زیادہ تر کاروباری مراکز اور مارکیٹیں کھلی رہیں۔

ہمارے نامہ نگار عباد الحق کے مطابق لاہور میں وکلاء نے یوم سیاہ منایااور لاہور ہائی کورٹ بار ایسوسی ایشن اور ڈسٹرکٹ بار ایسوسی ایشن لاہور نے اپنے احتجاجی اجلاسوں کے بعد الگ الگ مظاہرے کیے۔

پنجاب بھر میں جزوی ہڑتال  پنجاب بھر میں جزوی ہڑتال ہوئی لیکن زیادہ تر کاروباری مراکز اور مارکیٹیں کھلی رہیں

ہائی کورٹ بار نے جی پی او چوک میں مظاہرہ کیا جس میں تحریک انصاف کے کارکنوں نے صدر مشرف اور وزیراعلیٰ پنجاب کی تصویروں والے بینرز اور پوسٹر جلائے۔ لاہور بار کے صدر سید محمد شاہ نے سنیچر کو عدالتیں بند کیے جانے کی مذمت کی ہے۔