رفعت اللہ اورکزئی بی بی سی اردو ڈاٹ کام، پشاور

	عاشورہ کے موقع پر علاقے میں کرفیو لگا دیا گیا تھا (فائل فوٹو)

اس طرح کی اطلاعات بھی ہے کہ علاقے میں جنگ چھڑ گئی ہے تاہم حکام اس کی تردید کر رہے ہیں۔ عینی شاہدین کے مطابق شہر میں حالات سخت کشیدہ ہیں اور مختلف علاقوں سے راکٹ اور مارٹر گولوں کی آوازیں آرہی ہیں۔

ہنگو کے ضلعی رابط افیسر فخر عالم محمد زئی نے بی بی سی کو بتایا کہ بدھ کی صبح کچھ افراد نے شاہو روڈ سے جلوس نکالنے کی کوشش کی تاہم فوجی دستوں نے ان پر ہوائی فائرنگ کرکے انہیں منتشر کردیا۔

مقامی لوگوں کا کہنا ہے کہ کچھ لوگوں نے محلہ گنجانو کلے سے جلوس نکالنے کی کوشش کی تھی تاہم فوج نے ان پر فائرنگ کرکے منتشر کرنے کی کوشش کی جبکہ اس دوران شہر پر مختلف علاقوں سے راکٹ اور مارٹر گولے بھی نامعلوم مقامات سے داغے گئے۔

قبل ازیں کرفیو کے نفاذ اور علاقے میں امن وامان برقرار رکھنے کی خاطر مقامی انتظامیہ نے علاقے میں عاشورۂ محرم کے موقع پر علم اور ذوالجناح کے جلوسوں کی اجازت نہیں دی تھی۔

	گزشتہ سال ہنگو میں فرقہ وارانہ فسادات ہوئے تھے (فائل فوٹو)

واضح رہے کہ عاشورہ کی صبح ہنگو میں قومی امام بارگاہ کے سامنے راکٹ گرنے اور اس کے بعد فائرنگ کے واقعات میں دو افراد ہلاک جبکہ چودہ زخمی ہوگئے تھے جس کے فوری بعد شہر کو فوج کے حوالے کر کے وہاں کرفیو نافذ کر دیا گیا تھا۔

دو روز پہلے پشاور میں خود کش حملے کے بعد سے پورے ملک میں عاشورہ کے موقع پر سکیورٹی سخت کر دی گئی تھی۔ پیر کو بنوں امام بارگاہ پر بھی راکٹ حملہ کیا گیا اور ڈیرہ اسماعیل خان میں ایک خود کش حملہ ہوا تھا۔

گزشتہ سال فروری میں ہنگو بازار میں عاشورہ کے دن خودکش حملے اور فرقہ ورانہ تشدد کے واقعات میں پچاس کے قریب لوگ ہلاک ہوئے تھے جبکہ چھ سو زائد دوکانوں کو جلایا گیا تھا۔