اعجاز مہر بی بی سی اردو ڈاٹ کام، اسلام آباد

فالٹ لائن کے باعث بالاکوٹ میں محفوظ تعمیرات ممکن نہیں ہیں

ماہرین نے سینیئر وزراء کو بتایا ہے کہ صوبہ سرحد میں واقع پرانی جگہ پر دوبارہ شہر تعمیر کرنا بہت خطرناک ہے۔ بالا کوٹ کے متعلق ماہرین نے کہا ہے کہ وہاں ’فالٹ لائنیں ایک تو بہت زیادہ ہیں اور دوسرا وہ آڑی اور ترچھی ہیں‘۔ ان کے مطابق ایسی صورتحال کی وجہ سے جس جگہ یہ شہر آباد تھا وہاں کم لاگت میں محفوظ تعمیرات ممکن نہیں ہیں۔

صدر جنرل پرویز مشرف نے بالا کوٹ کے مکینوں کےلیئے فوری مناسب جگہ کا انتخاب کرنے کے لیئے وزیراعلیٰ سرحد اکرم درانی کو ہدایت کی ہے اور کہا کہ نئی جگہ پر زلزلے سے محفوظ مکانات والا ماڈل سٹی تعمیر کیا جائے۔

واضح رہے کہ زلزلہ آنے سے پہلے اس تاریخی شہر میں تین لاکھ افراد آباد تھے۔ زلزلے میں بالاکوٹ کے ہزاروں رہائشی ہلاک اور کئی دوسرے بے گھر ہو گئے تھے۔

حکومت نے یہ فیصلہ بھی کیا ہے کہ زلزلہ زدہ علاقوں میں تعمیر نو کا مرحلہ سات اپریل سے شروع کیا جائے گا اور تمام تباہ حال مکانوں کے مالکان کو رقوم لینے کے لیئے فارم بھی تقسیم کیے جائیں گے۔

اجلاس میں فیصلہ کیا گیا کہ سات اپریل سے مکانوں کے معاوضوں کے حصول کے لیئے جو فارم جاری ہوں گے وہ دس روز کے اندر جمع کراکے متاثرین رقوم حاصل کر سکتے ہیں۔

اجلاس کے بارے میں جاری کردہ بیان میں بتایا گیا ہے کہ کلی طور پر تباہ ہونے والے مکان کے مالک کو پچھہتر ہزار جبکہ جزوی طور پر تباہ مکان کے لیئے پچاس ہزار روپے کی قسط جاری ہوگی۔

اجلاس میں ’فیڈرل ریلیف کمیشن‘ کا ادارہ ختم کرنے اور اس کا ایک سیل، بحالی اور تعمیر نو کے متعلق ادارے میں قائم کرنے کی باضابطہ منظوری بھی دی گئی۔ صدر نے یتیموں، بیواؤں، معذوروں اور انتہائی ضرورت مند افراد کو چھ ماہ تک ماہانہ تین ہزار روپے کی امداد دینے کی بھی منظوری دی۔