اعجاز مہر بی بی سی اردو ڈاٹ کام، اسلام آباد

	آٹھ اکتوبر کے زلزلے کے بعد ’سیسمک سروے‘ کا کام جاری ہے

جمعرات کو وزیراعظم شوکت عزیز کی زِیر صدارت ہونے والے کابینہ کے اجلاس میں اس بارے میں وزارت ہاؤسنگ کی جانب سے تفصیلی رپورٹ پیش کی گئی۔

کابینہ کے اجلاس کے متعلق بریفنگ دیتے ہوئے وفاقی وزیر اطلاعات نے بتایا کہ نئی درجہ بندی کے بعد دونوں شہروں کو ’زون ٹو، سے نکال کر ’زون تھری‘ میں شامل کیا گیا ہے۔

تاہم انہوں نے بتایا کہ اس کے باوجود بھی دونوں شہروں میں کثیر المنزلہ عمارتوں کی تعمیر پر کوئی پابندی نہیں لگائی گئی۔

البتہ انہوں نے کہا کہ آئندہ نئی تعمیر ہونے والی عمارتوں اور مکانوں کے لیے سن دوہزار تین میں عالمی سطح پر منظور کیے گئے تعمیراتی قواعد اور ضوابط نافذ کرنے کا فیصلہ کیا گیا ہے۔

	آٹھ اکتوبر کے زلزلے سے ملک میں بڑی تباہی پھیلی تھی

وزیر نے بتایا کہ گزشتہ سال آٹھ اکتوبر کے شدید زلزلے کے بعد پاکستان کے زیرانتظام کشمیر اور صوبہ سرحد میں ابھی ’سیسمک سروے‘ کا کام جاری ہے اور جیسے ہی وہ مکمل ہوگا تو حکومت چاروں صوبوں کے لیے تعمیراتی قواعد و ضوابط نافذ کرے گی۔

انہوں نے بتایا کہ ملک بھر میں نئے اور عالمی تعمیراتی قواعد کے بارے میں عوام کو مطلع کرنے کے لیے اشتہاری مہم کے ساتھ ساتھ مختلف شہروں میں سیمینار بھی منعقد کیے جائیں گے۔

وزیر نے بتایا کہ ادھر وفاقی کابینہ نے ملک میں تیل کی قیمتوں میں عالمی مارکیٹ میں ہونے والے اضافے کے بعد نجی تیل کمپنیوں کو ہر پندرہ روز بعد تیل کی نئی قیمتوں کے تعین کے بارے میں دیا گیا اختیار واپس لے کر ’آئل اینڈ گیس ریگولیٹری اتھارٹی‘ کو دیا گیا ہے۔

انہوں نے یہ نہیں بتایا کہ ا س پر عمل درآمد کب سے ہوگا اور یہ ’اوگرا‘ نامی اتھارٹی کب اور کیسے قیمتوں کا تعین کرے گی۔